Полска ќе одвои дополнителни 100 милиони злоти (околу 23,41 милиони евра) за зајакнување на внатрешната безбедност на разузнавачката служба поради руската закана, изјави  премиерот на земјата Доналд Туск.

Варшава тврди дека е цел на руските разузнавачки служби поради улогата на Полска како дистрибутивен центар за снабдување со оружје за Украина.

Ројтерс пренесува дека ваквиот однос на официјалните лица во Варшава е зголемен откако минатата недела судијата кој имал увид во воените тајни пребегнал во Белорусија.

Русија ја пушти во употреба интерконтиненталната балистичка ракета Булава, која се лансира од подморница, објавија државните медиуми, што е нов елемент во модернизацијата на нејзиниот нуклеарен арсенал.

Новинската агенција Тасс го цитираше главниот дизајнер на Булава, Јуриј Соломонов, кој рече дека одлуката е објавена со декрет од 7 мај, истиот ден кога претседателот Владимир Путин го започна новиот шестгодишен мандат во Кремљ.

Путин уште од почетокот на војната во Украина го предупредува Западот дека директната интервенција на силите на НАТО може да предизвика нуклеарен конфликт. Во март тој рече дека не верува оти Вашингтон „брза“ кон тоа, но нагласи и дека руските нуклеарни сили се технички подготвени.

Во ноември, Министерството за одбрана соопшти дека една од подморниците успешно ја тестирала Булава, пукајќи ја од подводна позиција во Белото Море и погодувајќи ја целта илјадници километри оддалечена на полуостровот Камчатка на исток.

Тасс соопшти дека руската Северна и Пацифичка флота сега вклучуваат седум подморници Бореј, од кои секоја има по 16 ракети Булава. Соломонов е главен конструктор на Московскиот институт за топлинско инженерство, а ги развил и руските интерконтинентални балистички ракети Топол-М и Јарс.

Според Вашингтонскиот центар за стратешки и меѓународни студии, Булава има досег од 8.300 километри.

Украински воени хеликоптери по втор пат за два месеци слетале во близина на линијата на фронтот во источна Украина за да се снабдат со гориво и муниција, а од воздух биле забележани од руски дрон, пишува Форбс. Неколку моменти подоцна, руската артилерија со долг дострел – веројатно балистичка ракета Искандер – разнесе три хеликоптери во близина на Павлохрад, 112 километри западно од контактната линија околу населбата Бердичи.

Оваа загуба е катастрофална за малите воздухопловни сили на украинската армија, но и уште еден знак дека Украинците сè уште не можат лесно да одржат соодветна воздушна одбрана по целата линија на фронтот, која е подолга од 960 километри.

Yes, it happened again, this time worse if you want to say so.

Russian Forces hit and destroyed 2x Ukrainian Mi-24 Attack Helicopters standing at a Resupply and Refuel Point in an Open Field(along with a MI-8 in the back, unlikely it was affected) using a D-30SM UMPB bomb (IMO) pic.twitter.com/Do1o8kZTXw

— WarVehicleTracker (@WarVehicle) May 11, 2024

Два нападни хеликоптери Мил Ми-24 и еден Мил Ми-17 беа во мисија во саботата и слетаа на таканаречената „точка за оружје и полнење гориво“, односно ФАРП.

ФАРП е поле во близина на фронтот каде што хеликоптерите можат безбедно да слетаат за да можат помошните трупи брзо да надополнат гориво и муниција. Идејата е екипажот на хеликоптер многу брзо да подигне сè што им треба – идеално за само неколку минути – и повторно да полета пред непријателот да ја таргетира локацијата.

Украинците ги извршуваат овие операции секој ден, бидејќи нивните хеликоптери летаат ниско на мисиите долж линијата на фронтот, пренесувајќи опрема и ранети војници и гаѓајќи ракети без насоки кон руските сили.