Германската министерка за надворешни работи Аналена Баербок ја повика израелската влада да се откаже од копнената офанзива врз градот Рафа и, наместо тоа, да се согласи на прекин на огнот со оглед на влошената хуманитарна ситуација за Палестинците во Газа.

„Во Рафа 1,3 милион луѓе живеат во многу тесен простор под најстрашни услови“, рече министерката во средата пред почетокот на нејзината дводневна посета на Израел.

„Под овие услови офанзивата на израелската армија врз Рафа целосно ќе ја загрози хуманитарната ситуација“, рече Баербок.

Таа нагласи дека луѓето во Рафа „не може само да исчезнат во воздух“ и дека им требаат безбедни места и безбедни коридори за да не бидат фатени во вкрстен оган уште повеќе.

„Им треба повеќе хуманитарна помош. И им треба прекин на огнот“, рече Баербок додавајќи дека „Газа е на работ на колапс“ и дека многу луѓе ги следеле израелските наредби за евакуација и избегале од борбените зони во северна Газа „често само со деца во рацете и облеката на себе“.

Копнената офанзива што ја најави израелската армија против Хамас во Рафа во јужниот дел на Газа наиде на остри критики од меѓународната заедница.

Баербок пристигна во Израел во средата на нејзиното петто патување во Израел по терористичкиот напад на 7 октомври предводен од палестинското исламистичко движење Хамас, во кој загинаа повеќе од 1.200 луѓе.

Во масовните воздушни напади и копнената инвазија што следуваше Израел уби 28.576 Палестинци во Газа и рани 68.291, објави во средата Министерството за здравство на Газа.

Според податоците на ОН, околу 85 отсто од жителите на Газа се внатрешно раселени во густо населениот крајбрежен појас од почетокот на израелската инвазија.

Предвидено е Баербок да се сретне со својот колега, шефот на дипломатијата на Израел, и со израелскиот премиер Бенјамин Нетанјаху. Предвидена е средба и со лидерот на опозицијата, Јаир Лапид. В четврток е закажана средба со претседателот Исак Херцог.

Портпаролот на германското Министерство за надворешни работи рече дека разговорите во Израел ќе се фокусираат на политичкиот пат кон нов хуманитарен прекин на огнот во Газа.

Тоа треба да создаде можност да се ослободат дополнителни заложници и да се преговара за одржлив прекин на огнот, рече портпаролот.