Свет
Пензиониран полковник на американската армија одавал државни тајни преку страница за запознавање

Пензиониран полковник на американската армија во Небраска е обвинет за испраќање доверливи информации преку страница за запознавање и денеска ќе се појави на суд, јавува Би-би-си.
Дејвид Френклин Слејтер (63), уапсен во саботата, до 2022 година бил вработен во Стратешката команда – Стратком, која го надгледува американскиот арсенал на нуклеарни ракети.
Тој беше обвинет дека незаконски испраќал документи кои „може да се искористат за да им нанесат штета на САД“.
Слејтер е обвинет за заговор и две точки за неовластено откривање информации за националната одбрана и се соочува со затворска казна до 10 години.
Во обвинението пишува дека Слејтер ги проследил информациите што ги дознал од доверливите брифинзи на Стратком, кои се однесуваат на руската воена операција во Украина.
Тој ги испраќал податоците на лице за кое верувал дека е жена во Украина.
За време на преписката тој често добивал прашања за тајните на американската национална одбрана, велат обвинителите.
Би-би-си пренесува дека една од пораките, со датум од 11 март, гласи: „Драги, што се прикажува на екраните во приватната соба?? Многу интересно“.
На 23 март на Слејтер му беше поставено прашање за некоја земја, но тој дел во обвинението беше преработен, па не е јасно за која земја се однесуваше прашањето.
„Ти си мојот таен агент. Со љубов“, му рекол контактот откако одговорил.
„Драг мој Дејв, благодарам за вредните информации“ и „Ти си мојот таен шпион, љубов“, гласат другите пораки.
Во документите не пишува со кого контактирал Слејтер ниту, пак, името на страницата за запознавање.
Случајот го истражуваа ФБИ и Канцеларијата за специјални истраги на воздухопловните сили на САД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.
Регион
Топлотниот бран ги затвори Акропол и археолошките локалитети во Атина

Поради топлотниот бран и високите температури што од почетокот на седмицава ја зафатија Грција, археолошките локалитети во Атина, како и Акропол и во текот на викендов ќе бидат затворени за туристи во периодот од 12 до 17 часот.
Новиот топлотен бран што ја зафати Грција, според најавите и прогнозите се очекува да трае до недела.
Вчера беше најтоплиот ден, просечната максимална температура достигна 37,6 степени Целзиусов, на Пелопонез измерени речиси 46 степени, а во многу делови од земјата надмина 42 степени.
Свет
Русија до Западот: Тврдоглаво игнорирате додека режимот во Киев се обидува да ја спаси кожата на Зеленски

„Тврдоглаво се обидувате да игнорирате како темелно корумпираниот режим во Киев се обидува да ја спаси кожата на украинскиот претседател Володимир Зеленски, доведувајќи ја во прашање иднината на својата земја. За тоа детално ќе разговараме на посебниот состанок што го побаравме за 31 јули, каде што предлагаме фокусирање на акциите што ја поткопуваат потрагата по дипломатски пат за решавање на украинскиот конфликт – вклучително и обидите да се попречи директниот руски-украински преговарачки процес во Истанбул“, изјави заменикот на рускиот амбасадор во ОН, Дмитриј Пољански, на седницата на Советот за безбедност, обраќајќи им се на претставниците на западните земји, пренесува ТАСС.
Според него, Русија подолго време и доследно предлага решавање на украинската криза по дипломатски пат.
„Но вас тоа не ве задоволува – сè додека сте подготвени да продолжите да се борите против Русија преку рацете на Украинците. А фактот што ги има сè помалку – воопшто не ве вознемирува“, предупреди рускиот дипломат.
Русија и Украина во мај и јуни одржаа две рунди преговори, по што следуваше размена на заробеници и предавање на телата на загинатите украински војници. Двете страни исто така разменија нацрти меморандуми за решавање на конфликтот.