Македонија
Поддршка во вредност од околу 210.000 евра: Тасевски на примопредавање на опрема за граничната полиција од Германија
Во рамки на соработката помеѓу Министерствата за внатрешни работи на Сојузна Република Германија и Република Северна Македонија денеска амбасадорката Петра Дрекслер предаде дополнителна полициска опрема на Министерство за внатрешни работи на Република Северна Македонија, претставувано од директорот на Бирото за јавна безбедност, Сашо Тасевски, при што во Центарот за обука на Министерството за внатрешни работи во Идризово, се спроведе официјална церемонија за примопредавање на опремата, на која соодветно беше презентирана донираната опрема.
Пред одржувањето на церемонијата се реализираше и билатерална средба помеѓу амбасадорката Петра Дрекслер и директорот на Бирото за јавна безбедност Сашо Тасевски, на која беше разговарано за одличната оперативна соработка помеѓу полициите на двете земји, која се спроведува помеѓу соодветните служби во рамки на Бирото за јавна безбедност и Канцеларијата за врски на германската Сојузна полиција во рамки на Амбасадата на Сојузна Република Германија во Скопје, како и за намерата за продолжување на поддршката од германска страна за Министерството за внатрешни работи во иднина.
Поддршката е со вкупна вредност од околу 210.000 евра и опремата е набавена од страна на Сојузната полиција. На Граничната полиција на Република Северна Македонија и се предаваат пет патролни возила, еден минибус, како и уреди за проверка на документи. Освен тоа, во Центарот за обука на МВР во Идризово со нов мебел и техника се опремени две училници за обуки.
Од 2020 година германската Сојузната полиција ги поддржува колегите од Република Северна Македонија со полициска опрема и тоа со вкупна вредност од преку два милиони евра.
Помошта во вид на опрема се реализира преку Канцеларијата за врски на германската Сојузната полиција во Скопје и со тоа се нуди поддршка на Гранична полиција на Република Северна Македонија уште поефикасно да се справи со предизвиците при сузбивањето на прекуграничниот криминал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Поплавувања и штети од пороен дожд и град во Куманово, Старо Нагоричане и Липково, се очекува зголемување на водостојот на Лепенец
Центарот за управување со кризи информира дека заради локалните врнежи на дожд има пријави за поплавувања и штети од град во Општина Куманово, Општина Старо Нагоричане и Општина Липково.
На Единствениот повикувачки број за итни случаи 112 во ЦУК е добиена пријава за поплавен двор во кој има трафостаница на ЕВН. Локација е на ул. „11 Октомври“ бр.77 зад објектот на „Живко Фурна“. Регионалниот ЦУК Куманово веднаш извести до ЕВН за да се преземат безбедносни интервентни мерки од нивна страна. Истовремено за настанот е реализирана координативна комуникација со лице за контакт од Општина Куманово.
На 112 во ЦУК добиена е пријава од лице од село Младо Нагоричане – Општина Старо Нагоричане, поточно во месност викана Подкаменчиња, кој пријавува дека заради обилните врнежи на дожд и град има голема штета. Информира дека уништени му биле 300 родни дрвца и дека му е оштетен му кровот од неговата викенд куќа. Од страна на Регионалниот ЦУК Куманово, за настанот е известено лице за контакт од Општина Старо Нагоричане.
На територијата на Општина Липково, во селата Липково, Отља, Оризаре и Слупчане во 18.15 часот почна да врне дожд, проследен со ветар и има паднато многу град. ЦУК известува дека има оштетено земјоделски садници и дека има оштетено автомобили од паднатиот град, според првите податоци добиени од Општина Липково.
ЦУК предупредува дека, според УХМР се очекува зголемување на дел од реките. Конкретно, заради обилни врнежи од дожд во Косово, таму е зголемен водостојот на реката Лепенец. Во текот на вечерните и ноќните часови се очекува да има зголемување на водостојот и во нашата земја. Истовремено, ЦУК предупредува на внимателно движење покрај коритото на реката Лепенец.
Македонија
Телеграма за сочувство до раководството и до иранскиот народ, упати претседателот на Левица, Димитар Апасиев
„Во име на Политичката партија Левица, изразувам сочувство до народот на Исламската Република Иран за трагичната загуба на претседателот Ебрахим Раиси, министерот за надворешни работи, Амир Абдолахјан, како и придружната делегација во неодамнешната хеликоптерска несреќа.
Претседателот Раиси и министерот за надворешни работи, Абдолахјан, не беа само ценети лидери, туку тие го посветија својот живот да му служат на иранскиот народ и да ги унапредат интересите на сопствената нација на светската сцена“, се вели во Телеграмата од Левица.
„Претседателот Раиси и министерот Абдолахјан беа цврсти бранители, чувари на правата и достоинството на угнетените народи ширум светот. Тие се спротивставија на империјализмот и се залагаа за глобална правда и солидарност. Нивната посветеност да се спротивстават на угнетувањата и експлоатациите, длабоко одекна со вредностите на нашата партија за антиимперијализам и солидарност со угнетените и служеше како инспирација за сите кои се стремат кон поправеден свет.
Жалиме за загубата и на другите членови на делегацијата кои загинаа во несреќата. Нивната посветеност кон нивната земја ќе биде трајно запаметена.
Во ова време на тага, стоиме во солидарност со Владата и народот на Иран. Нашите мисли и молитви се со семејствата на жртвите, како и со целиот народ во Иран“, се додава во Телеграмата од Левица.
Скопје
Ѓорѓиевски: „Вардар” мора да постои – обезбедена поддршка за баражот
За ФК „Вардар“ пред најважниот натпревар оваа сезона, е обезбедена финансиска поддршка од градоначалникот на Општина Кисела Вода Орце Ѓорѓиевски. На денешниот тренинг на тимот тој лично на „Вардар“, Вардарци и Комити им даде збор дека за многу брзо време работите ќе се променат на подобро, и „Вардар“ никогаш повеќе нема да биде во оваа ситуација.
– „Вардар“ е душата на Скопје и како еден од нив, ќе го дадам и последниот атом од мене за да се одржи клубот. Како и во минатото, така и сега во пресрет на баражот во недела, обезбедени се финансиски средства за да опстои нашата гордост. „Вардар“, Вардарци и Комити не се оставени сами на себе. Мојата подадена рака ќе стои секогаш тука за нив. И да, ќе одиме на врвот – таму каде што припаѓаме! А во една блиска иднина, за многу брзо време кога работите ќе се променат на подобро, „Вардар“ никогаш повеќе нема да биде во оваа ситуација. Го имате мојот збор!
Се гледаме во недела, во 17 часот на стадионот во Струмица. ФК ВАРДАР : ФК ДЕТОНИТ ПЛАЧКОВИЦА! За Вардар, за нашето славно минато и блескава иднина, истакна градоначалникот Орце Ѓорѓиевски, кој и минатата година, пред историскиот натпревар со Кавадарци му обезбеди финансиска поткрепа на спортската гордост на Скопје, „Вардар“.