Јавниот обвинител на Република Северна Македонија, Љупчо Коцевски, и претседателот на комисијата во Јавното обвинителство за следење евентуални изборни нерегуларности, Џељаљ Бајрами, денеска остварија средба со делегација од Државната изборна комисија (ДИК), составена од претседателот Борис Кондарко, заменик-претседателот Абдуш Демири и членовите Светлана Карапетрова и Александар Даштевски.

Двете институции се договорија да ја зајакнат меѓуинституционалната координација во рамките на своите законски надлежности за организација и следење на изборниот процес на претстојните локални избори.

Јавното обвинителство и Државната изборна комисија посветено работат за да ги овозможат сите услови за фер и ефикасен изборен процес, велат од таму.

Јавниот обвинител Коцевски ги информира претставниците на ДИК дека колегиумот на Јавното обвинителство на РСМ донесе заклучок и за овој изборен процес да се формира привремена комисија задолжена да го следи постапувањето по евентуални изборни нерегуларности поврзани со постоење кривични дела од Глава 16 од Кривичниот законик – Кривични дела против изборите и гласањето, како и други кривични дела што би биле сторени при организирањето и спроведувањето на изборите.

Комисијата ќе има задача на дневна основа да ги следи сите настани од државата поврзани со процесот на организирањето и спроведувањето на локалните избори. За оние настани за кои ќе се оцени дека даваат индиции за евентуални сторени изборни нерегуларности известувањата веднаш ќе се проследат до соодветното основно јавно обвинителство. Во исто време ќе се дадат задолженија до основните јавни обвинителства за итно постапување, односно да формираат предмет и да ги преземат сите дејства за утврдување на сите релевантни факти од кои зависи правилната примена на Кривичниот законик.

За претседател на комисијата е определен Џељаљ Бајрами, јавен обвинител во Јавното обвинителство на Република Македонија, а ќе членуваат и по еден јавен обвинител од сите виши јавни обвинителства, како и еден јавен обвинител од Основното јавно обвинителство Скопје како основно обвинителство што покрива најголемо подрачје.

Јавноста, граѓанските организации, други организации, политички партии, домашни и меѓународни институции и сите што сметаат дека во некоја постапка има индиции за сторено кривично дело поврзано со изборниот процес, ќе може да достават поднесок/пријава до комисијата за следење изборни нерегуларности на електронската адреса [email protected], која ќе биде активна и за овој изборен процес.

Срамно и лицемерно е однесувањето на Филипче и СДС, кои говорат за некаква резолуција, уште пак и за некакво вин-вин решение, велат од ВМРО-ДПМНЕ.

„Ако можеби заборавиле, дека баш поради нив и нивната меѓународна политика изминативе 30 години, Македонија промени име, знаме и Устав.

Дали тоа вин-вин решение е ние повторно да го менуваме Уставот, а другата страна да продолжи со нови барања? Дали во ова нивно вин-вин решение, има писмени гаранции дека ова е последното барање на Бугарија? Дали оваа резолуција на СДС и Филипче е во интерес на македонските граѓани или само задоволување на бугарските барања“, прашуваат од владејачката партија.

Според нив, СДС и Филипче треба да се засрамат.

„Откако нивниот најголем успех во делот на влез на Македонија во ЕУ, беше селфи во авион, треба да се тргнат настрана и да ја остават работата на оние кои и мислат добро на државата, а тоа е ВМРО-ДПМНЕ“.

Изет Меџити, актуелен заменик-претседател на Владата и министер за екологија, е истовремено и кандидат за градоначалник на Општина Чаир. И токму тука лежи суштинскиот проблем: иако ја објави својата кандидатура, Меџити не поднесе оставка од двете високи државни функции кои ги извршува, велат од Алијанса за Албанците.

„Прашањата што се наметнуваат се едноставни:
• Зошто Изет Меџити не поднесува оставка?
• Дали се плаши од пораз на изборите на 19 октомври?
• Зарем не ѝ верува на силата на гласот на граѓаните на Чаир?
• Или решил да си остави „план Б“, односно ако изгуби овде, да продолжи да седи на фотелјата на заменик-претседател на Владата и министер“.

Ова, според Алијанса за Албанците е навредливо за граѓаните, навредливо е за институциите и претставува повреда на принципите на политичката еднаквост.

„Бидејќи Чаир нема потреба од кандидат кој се натпреварува со привилегии од власта, туку од чесна, отворена и транспарентна изборна трка.

Нашето барање е јасно и недвосмислено:
Националната алијанса за интеграција бара итна оставка на Изет Меџити од двете владини функции.

Ако навистина сака да му служи на Чаир, нека излезе пред граѓаните само како кандидат, без власта во џеб и без државни ресурси ставени во служба на неговата кампања.

Чаир нема потреба од кандидат кој се крие зад Владата. Чаир има потреба од визија, искреност и храброст“.

Му порачуваат на Меџити: „Избери: министер или кандидат. Двете не одат заедно!

Секое одложување, секое оправдување, е само доказ за неговиот страв од пресудата на 19 октомври“.