Македонија
Стојаноска: Време е овој лажен европски фронт да биде испратен во заборав, затоа сите да го заокружиме бројот 2 за Силјановска Давкова
„Единствена сила која може да ја спречи оваа хаварија е ВМРО-ДПМНЕ. Единствен начин да се спречи ова зло е масовна излезност на претстојните избори и заокружување на бројот 2. Овие избори никој не смее да остане дома. Никој не смее да се уплаши од криминалците и да дозволи да биде поткупен. Овие избори се токму за да ги пикнеме криминалците во затвори, а оттаму да ги извадиме уставобранителите. Овие избори поткупува оној кој има зорт. Овие избори поткупува оној кој ги украл вашите пари. Овие избори заплашува оној кој се плаши. Овие избори уплашени се СДС и ДУИ. Овие избори тие ќе поткупуваат и ќе сеат страв. Овие избори тие ќе предизвикуваат инциденти и ќе објавуваат невистини. Овие избори не им дозволувајте да ве прелажат по трет пат“, рече носителката на ИЕ 6 Дафина Стојаноска на митинг на ВМРО-ДПМНЕ во Брвеница во рамки на претседателските избори.
Таа истакна дека власта имала 7 години можност да се докажат и нешто да сработат.
„Овие избори тие ќе тресат ветувања од ракав, затоа што станаа професионални лажговци. Не им верувајте и не им се плашете. Парите кои ќе ви ги нудат се ваши пари. Потрошија преку 20 милијарди евра, а ништо не изградија. Платија 200 милиони евра казнени поени за неотпочнатиот проект Бехтел и Енка. Се сеќаваме плаќаа милионски суми камата за после 7 години неизградениот нов Клинички центар“, вели Стојаноска.
Таа вели дека за 7 години власта испокраде и испоуништи, колку што за сите останати 25 наназад не се можело.
„Што е најтрагично, истите тие 7 години наназад не’ убедуваа дека сево ова се правело заради влез во Европската Унија. Дури и во оваа кампања ја имаат извалкано со фразите за европски вредности. Не само што го извалкаа нашето свето име Македонија, туку и Европа ја испорезилија. Ни зборуваат за нивните европски вредности и залагања за членство, додека на дело спроведуваат неевропски политики, злоупотребуваа европско знаме во Парламент и нас не’ обвинуваат дека сме анти-европејци“, рече Стојаноска.
Таа посочи дека лажниот европски фронт треба да е погазен од македонскиот народ.
„Заради сево ова, време е овој лажен европски фронт да биде погазен од македонскиот народ и да биде испратен во заборав. Време е Гордана Силјановска Давкова да им покаже дека европска вредност е почитување и применување на законите. Дека европска вредност е спроведување на правдата. Дека европска вредност е почитување на правата и слободите на граѓанинот. Дека европска вредност е квалитетното образование. Дека европска вредност е здравство без криминал. Дека европска вредност е почитувањето и негувањето на македонската традицијата. Дека европска вредност е се’ што тие не беа, не се, не можат да бидат“, истакна Стојаноска.
Таа ги повика сите граѓани на масовна поддршка за Гордана Силјановска Давкова.
„Заради сево ова, ве повикувам сите на масовна и заслужена поддршка за нашата кандидатка за Претседателка на Република Македонија. Да го заокружиме бројот 2, и на 24-ти април, и на 8-ми мај, за да му покажеме на светот дека Македонија не служи за пазарење и поткусурување, туку дека Македонија е земја со богата култура и славна историја, земја со паметни и способни луѓе кои се подготвени и сакаат да ја видат повторно горда“, потенцираше Стојаноска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Инцидент и во Куманово: насилно откорната таблата на српскиот Конзулат, настанот снимен на камера
Амбасадата на Република Србија во Македонија најостро го осудува вандалскиот чин што се случил синоќа на Денот на албанското знаме, кога од фасадата на зградата на Конзулатот на Република Србија во Куманово, во доцните вечерни часови, младо машко лице, обвиено со албанско знаме, насилно ја отстранило таблата со грбот на Република Србија и натписот „Конзулат на Република Србија во Куманово – Почесен конзул“, напишан на српски и македонски јазик.
Притоа, Амбасадата на Република Србија во Скопје изразува длабока загриженост во врска со вчерашното сквернавење на државните симболи на Република Србија и загрозување на безбедноста на просториите на Конзулатот на Република Србија во Куманово, особено имајќи го предвид фактот дека просториите на дипломатско-конзуларните претставништва и резиденцијални објекти наменети за членовите на дипломатскиот персонал на Република Србија, не е првпат да бидат предмет на вандалски напади во земјава.
Во овој поглед, Амбасадата нагласува дека е целосно посветена на соработка со надлежните органи на Република Северна Македонија, со цел што поскоро откривање и процесуирање на сторителот на насилниот чин, чиј идентитет, како што велат, може недвосмислено да се утврди врз основа на достапните снимки од безбедносни камери.
Амбасадата на Република Србија нагласува дека останува посветена на негување пријателски односи со Република Северна Македонија и изразува уверување дека надлежните органи на земјата домаќин, во духот на развиените билатерални односи и добрососедството, ќе направат се за да се реши овој случај на адекватен начин.
Македонија
Се бара притвор за три лица за уништувањето на македонското знаме
Обвинителството поднесе предлог за притвор за три лица за уништувањето на македонското знаме синоќа во централното градско подрачје.
Од тука информираа дека поведена е постапка против три полнолетни лица за предизвикување омраза, раздор или нетрпеливост врз национална, расна, верска и друга дискриминаторска основа. Против уште едно малолетно лице ќе се води редовна постапка според Законот за правда за децата.
„Осомничените на 28.11.2024 година околу 20:00 до 23:00 часот на булевар „Крсте Мисирков“ во Скопје, по завршување манифестација на плоштадот Скендербег по повод прослава на денот на албанското знаме, со излагање на подбив на национални симболи, односно со палење, уништување и кинење на државното знаме, предизвикале омраза, раздор и нетрпеливост врз основа на етничка припадност“, велат од Обвинителството.
За полнолетните осомничени надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор. Со оглед на тоа што е скратена постапката за ова кривично дело, притворот, доколку го определи судот, би бил осум дена, појаснуваат од Обвинителството.
Министерот за внатрешни работи, Панче Тошковски претходно соопшти дека за случајот синоќа биле уапсени осум лица, од кои четири за предизвикување верска и национална омраза.
„Четири од нив се уапсени поради тоа што сториле прекршок, учествувале во тепачка, а другите четири лица се уапсени поради тоа што за нив имаме основано сомнение дека сториле кривично дело 319 од Кривичниот законик, кое се однесува на предизвикување национална, расна и верска омраза, раздор и нетрпеливост, а за што е предвидено минимална казна од една година затвор. За тие четири лица ќе бидат поднесени соодветни кривични пријави за ова дело“, рече Тошковски.
Тој упати порака до сите што имаат на ум да предизвикаат какво било сценарио за дестабилизација на Македонија дека МВР ќе одговори жестоко.
Сквернавењето на државното знаме се случи во центарот на Скопје, придружено со пукање и ненајавено блокирање на скопските улици за време на прославата на Денот на албанското знаме. Дивеењето беше осудено од политичките чинители.
Македонија
Метеоролозите најавуваат снег и во Скопје, максималната температура ќе биде до 6 степени
Времето утре, сабота – 30 ноември, ќе биде претежно облачно и постудено со повремени врнежи, кои во западните и јужните делови ќе бидат поројни и обилни (над 50 л/м2). На планините врнежите ќе бидат од снег од 40 до 50 сантимери, на повисоките места од 10 до 30, а во некои пониски места од дожд и снег и ќе се формира помала снежна покривка.
Во југоисточните делови ќе бидат само од дожд. Ќе дува умерен, а на планините силен северен ветер. Минималната температура ќе биде во интервал од -2 до 4, а максималната ќе достигне од 2 до 6 степени.
Во Скопје облачно со повремени врнежи од дожд и снег, а на околните планини од снег. Ќе дува умерен ветер од северен правец кој краткотрајно ќе засилува. Минималната температура ќе се спушти до 2, а максималната ќе достигне до 4 степени.
Во деновите од викендот ќе има повремени врнежи, кои во западните и јужните делови ќе бидат поројни и обилни (над 60 l/m2). На планините врнежите ќе бидат од снег од 40 до 50 см, на повисоките места од 10 до 30 см, а во некои пониски места од дожд и снег и ќе се формира помала снежна покривка. Во југоисточните делови ќе бидат само од дожд. Ќе дува умерен, а на планините силен северен ветер. Потоа до средината на следната седмица времето ќе биде стабилно со магла по одделни котлини.