Македонија
Костадиновска-Стојчевска: Компаниите ќе ги поддржиме со 180 милиони евра, а просечната плата ќе достигне 1.100 евра
Коносителката на ИЕ5 , на коалицијата за европска иднина, Бисера Костадиновска-Стојчевска на средба со компаниите членки на Регионалната стопанска комора Битола, заедно со носителот Јован Митрески и кандидатот за пратеник Матодија Илиевски, порача дека нема откажување од силна домашна економија, која ја отвораме кон големиот европски пазар.
Претставувајќи ја програмата за следниот мандат порача дека сега е вистински момент за освојување на големиот европски пазар и дека заедно ќе успееме македонката економија да биде европска.
„Во новиот мандат нашите граѓани ќе имаат просечна плата од 1.100 евра, минимална плата од 600 евра. За прв пат во историјата имаме едноцифрена невработеност од 7 проценти“, рече пред стопанствениците на овој регион Костадиновска-Стојчевска.
Таа додаде дека заедно со нив, СДСМ и коалцијата носат нова енергија во македонската економија, и подобар животен стандард.
„ Преку директна финансиска помош од 200 евра, во времетраење од една година од вработувањето, за прво вработување на млади лица до 26 години ќе обезбедиме клучна поддршка за олеснување на нивниот влез во работната сила“, порача коносителката Костадиновска-Стојчевска која додаде дека СДСМ има предвидено 180 милиони евра помош за развој на македонските компании.
„Носиме 3,5 милијарди капитални инвестиции за напредок на економијата и отворање нови работни места“, вели Костадиновска-Стојчевска претставувајќи ја изборната програма во Изборната единица 5.
Костадиновска-Стојчевска, со носителот на ИЕ5, Јован Митревски и кандидатот за пратеник, Методија Илиевски, порача дека Владата предводена од СДСМ заедно со бизнис секторот ја преброди економската криза и дека сега имаме нови предизвици пред нас – повисок стандард и побогат живот за нашите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денес дожд и грмежи, можно е краткотрајно невреме со силен ветер и град
Времето денеска ќе биде променливо облачно и нестабилно со пороен дожд и грмежи. Локално ќе има услови за појава на невреме со интензивен пороен дожд, силен ветер и изолирана појава на град.
Минималната температура ќе се движи од 9 до 15, а максималната ќе достигне од 21 до 27 степени.
Во Скопје ќе биде променливо облачно и нестабилно со пороен дожд и грмежи. Во делови од котлината ќе има услови за појава на краткотрајно невреме со интензивен пороен дожд, силен ветер и изолирана појава на град. Минималната температура ќе се спушти до 14, а максималната ќе достигне до 25 степени.
Македонија
ДИК ги соопшти местата на кои ќе се прегласува на 22 мај
Државната изборна комисија (ДИК) денеска, на 105. седница, едногласно го усвои предлогот да се повтори гласањето во Изборната единица (ИЕ) 5 на избирачките места 1470/1 и 1470 во Општина Долнени, 1.194 и 1.202 во Општина Крушево, 1844 во Општина Струга и 1272 во Општина Охрид, како и во ИЕ 6 на избирачкото место 2101 во Општина Желино. Гласањето ќе се одржи идната среда, на 22 мај 2024 година.
ДИК на седницата ги разреши и претседателите на избирачките одбори, членовите и нивните заменици во избирачките места 1470/1 и 1470 во Општина Долнени, 1194 и 1202 во Општина Крушево, 1844 во Општина Струга, 1272 во Општина Охрид и 2101 во Општина Желино.
Со оглед дека се кратки роковите за избор на нови избирачки одбори, за да биде регуларно прегласувањето, општинските изборни комисии (ОИК) ќе треба да ангажираат некои од веќе постојните избирачки одбори, или од најблиските избирачки места или некои други, и за тоа ќе треба да достават известување до ДИК.
Кампањата за повторното гласање ќе трае до понеделник, 20 мај, 00.00 часот. Притоа, ќе важат истите листи за болни и немоќни лица, ќе нема можност да се пријавуваат нови.
Според ДИК, има можност за измени и предлози за овластени претставници на кандидати. Тоа важи и за членовите на избирачките одбори кои се предложени од политичките партии.
Македонија
Кацарска ја чува обезбедување, денес добила закани дека „страшно ќе одговара“
Непознато лице денеска напладне во близина на ТЦ „Рамстор“ во центарот на Скопје вербално и се заканувало на претседателката на Уставниот суд, Добрила Кацарска. По инцидентот интервенирало нејзиното обезбедување.
„Полициски службеници од полициската станица Центар денеска во 14:00 часот го лишиле од слобода В.П.Г. (57) од Богданци, постапувајќи по претходна пријава дека во угостителски објект во трговски центар на подрачјето на Центар во Скопје упатил закани кон Д.К.(67) од Скопје со зборовите ‘ќе одговараш, страшно ќе одговараш’. Лицето било задржано во полициска станица и по целосно документирање на случајот во координација со јавен обвинител против него ќе биде поднесена кривична пријава по член 144 од Кривичниот законик“, соопшти МВР.
Пред неколку дена во подземна гаража на зграда во Центар пронајдени се импровизиран кревет и кујнски нож на гражаното место на Кацарска.
Од МВР потврдуваат дека известен е јавен обвинител, предметите се подигнати за вештачење и се преземаат мерки за расчистување на случајот.