Вработената како рефернт во Одделението за управни работи Куманово која одобрувала регистрација на возила без исполнување на техничките услови, го оштетила буџетот за  417.500 денари, соопшти МВР.

Според новите детали од полицијата  за овој случај, вработената со иницијали М.П. издавала регистарски таблици и платливи обрасци без да им изврши наплата, односно без да и бидат приложени уплатници за извршена уплата или непосредно да изврши наплата преку службениот Пос Терминал со банкарската картичка.

„Пријавената М.П.,  иако била свесна и знаела дека не се исполнети законски пропишаните предуслови,  несовесно постапила во вршење на своите овластувања и должности, без претходно да ја запази процедурата за регистрација на возила, со што нанела материјална штета на буџетот на МВР во износ од 417.500 денари“, соопшти МВР.

Одделот за внатрешна контрола, криминалистички истраги и професионални стандарди против М.П. поднесе предлог за поведување на постапка за кршење на работниот ред и дисциплина и изрече задолжителна мерка за отстранување на работно место-суспензија до завршување на дисциплинската постапка.

Како што веќе објави „Макфакс“, МВР претходно информираше дека таа дала зелено светло за регистрација на возила без технички преглед, но и на возач со истечена лична карта, за второто била на боледување.

Полицијата во Гази Баба информираше дека е пронајдено шестгодишното девојче од Куманово кое вчера од страна на неговата мајка беше пријавено за исчезнато.

Од кумановската полиција велат дека дека детето наместо во градски автобус во Куманово, влегло во автобус кој сообраќал до Скопје.

Според информаците, детето кое го згрешило автобусот на враќање кон домот, било најдено од случаен минувач.

Вчера во 13 часот, во близина на хотелски комплекс на улицата „Наум Охридски“ во Охрид, полициски службеници од Регионалниот центар за гранични работи „Запад“, приведоа 13 албански државјани.

Тие претходно биле затекнати при изведување градежни активности, без да поседуваат соодветна дозвола за работа.

Од преземените мерки, било констатирано дека тие, на 14.04.2025 година, оствариле легален влез во државата но, не поседувале соодветни одобренија и дозвола за привремен престој по основ на работа, согласно член 80 од Законот за странци. Тие немале ни сертификати кои биле обврзани да ги поседуваат согласно со предвидените норми за имплементацијата на Законот за ратификација на Договорот за услови за слободен пристап до пазарот на трудот во Западен Балкан.

По целосно документирање на настанот, Регионалниот центар „Запад“, ќе поднесе соодветна пријава, соопшти полицијата.