Министерството за надворешни работи и надворешна трговија информира дека вчера беше реализирана евакуација на четири македонски државјани, односно едно семејство (мајка и три деца), со лет од Тел Авив до Атина.

Заклучно со денес, вкупниот број на евакуирани македонски државјани изнесува 12 лица – осум преку Египет со владин авион и четири преку Атина. Најголемиот дел од евакуираните се деца – седум од вкупно 12 лица.

Согласно информациите од дипломатско-конзуларното претставништво во Тел Авив, и имајќи го предвид прекинот на огнот во сила од 24 јуни и стабилизирањето на безбедносната состојба, државјаните кои првично беа подготвени за итна евакуација во моментов го одложуваат своето заминување. Рестрикциите поврзани со конфликтот со Иран се укинати, а училиштата, институциите и продавниците повторно функционираат.

Министерството, преку Амбасадата во Тел Авив, останува во редовна комуникација со сите граѓани кои изразиле интерес да го напуштат Израел, доколку повторно се јави потреба, и ќе продолжи навремено да ја информира јавноста.

И понатаму останува во сила препораката да се избегнуваат патувања во земјите од Блискиот Исток.

Во рамки на теренските активности, претседателот на СДСМ, Венко Филипче, беше во Кавадарци каде што оствари средби со граѓани и со членови на СДСМ. Од таму Филипче зборуваше за првата година на ВМРО-ДПМНЕ, предупредувајќи дека државата тоне, додека владините функционери се кријат зад празни зборови и лажни успеси.

„Откако сфатија дека незадоволството расте и граѓаните се чувствуваат измамени, од ВМРО-ДПМНЕ велат дека најдоброто допрва ќе дојдело. По четири години локална власт и една централна, ВМРО-ДПМНЕ порачува: не гледајте што правевме досега, туку гледајте кон иднината“, рече Филипче пред присутните.

Тој реагираше на, како што истакна, обидите на власта да го релативизира сопствениот неуспех.

„Но јас имам една порака до Мицкоски – денот по утрото се познава. А утрото кое требаше да донесе надеж, гордост и перспектива, донесе само понижувања, негрижа, ароганција и своеволие. Додека Мицкоски држи прес-конференции за „успеси“ што никој не ги видел, земјоделците се оставени без денар поддршка, економијата е заглавена во место, со негативен раст. Нема поврат на ДДВ за фирмите, нема раст на платите. Нема реформи во судството. Нема мерки за цените. Има само долгови – 7 милијарди евра нов долг за една година. Има и галопирачка инфлација, во време кога властите нè убедуваат дека сме економски „тигар““, додаде Филипче, потенцирајќи ја апсурдноста на владините наративи во споредба со реалноста.

Во завршницата на своето обраќање, тој ја истакна директната реакција на граѓаните од теренот.

„Манипулациите не поминуваат кај граѓаните – денес тоа јасно го почувствував во Кавадарци. Сите се свесни дека не може ништо добро да се очекува од оваа власт. Напротив, како што тргнале состојбите, најлошото допрва доаѓа“, рече Филипче.

Завршувајќи го обраќањето, тој ја пренесе пораката на СДСМ:

„СДСМ останува таму каде што власта одамна не е – меѓу народот. Битката што следи не е само изборна – таа е борба за нормалност“, заклучи Филипче во Кавадарци.

По девет часа интензивна работа и посипување на повеќе од 40 камиони земја на локацијата во Трубарево, повеќе нема бел чад, ниту мирис на изгорена пластика, кабли и слични штетни материјали, информира градоначалникот на Општна Гази Баба, Бобан Стефковски. Тој претходно кажа дека причина за загадениот воздух и смрдеата што се ширеше низ општините Гази Баба и Аеродром бил пожар во Трубарево каде горел отпад односно делови од возила. Како што кажа Стефковски, причинител на загадување е човечки фактор.

„Јавна благодарност до комуналните редари од Секторот за инспекција на Општина Гази Баба, кои и покрај тоа што вчера беа на терен со мене до 02:00 часот по полноќ, утрово од 10:00 часот повторно беа активни на терен и го открија изворот на загадувањето. Јас сум најголемиот критичар на нивната работа, секогаш барам повеќе резултати, но во овој случај заслужуваат јавно признание – лично од мене. Благодарам и на луѓето од ЈКП Гази Баба, кои со механизација работеа неуморно – повеќе од 9 часа!“, објави Стефковски рано утрово на „фејсбук“.

Претходно, тој кажа дека вчера, инспекциската служба на Општина Гази Баба, при сеопфатна теренска акција, пронајде локација во непосредна близина на Трубарево, од која се ширеше густ бел чад.

„При увидот на лице место, утврдено е дека од страна на непознат сторител била истурена и запалена поголема количина отпад – делови од возила поминати на преса! При горењето се ширеше неподнослив мирис на изгорена пластика, кабли и други штетни материјали, што директно го загадуваше воздухот. Локацијата е тешко пристапна, но токму тоа, заедно со природата на отпадот, јасно укажува на намера – нарачан, свесен, човечки чин со огромни последици! Оваа локација е директен причинител на загадувањето и непријатниот мирис кој ги погоди граѓаните од делови на Гази Баба и Аеродром во изминатите денови“, објави градоначалникот.

Тој им порача на нарачателите на овој, како што рече монструозен чин, дека тоа што го направиле е еднакво на геноцид.

„Ќе направам сè што е во моја моќ да се дознае Вашето име – Прво, за да бидете казнети, Второ, за да не можете да ги погледнете Вашите деца во очи, знаејќи дека самите сте ги труеле“, вели Стефковски.