Скопје
Две нови детски катчиња во урбаниот дел на општина Кисела Вода
Продолжува роденденската седмица на Општина Кисела Вода, која под слоганот “Кисела Вода, 69 години храброто срце на градот”, се одвива од вчера. Веќе традиционално, во склоп на празнувањето, секојдневно се реализираат поголеми инфраструктурни проекти, а вечерите се резервирани за културното лето. Утрово, градоначалникот Орце Ѓорѓиевски отвори две нови детски катчиња. Првото во населбата Кисела Вода, второто во Бирарија.
На улицата ,,Ѓорѓи Димитров” се поставени современи реквизити за детска игра, безбедни дури и за најмладите, изграден е терен за мал фудбал со вештачка трева, а поставена е и урбана опрема, со што дечињата, но и повозрасните добиваат нов простор за игра и одмор. Ваков простор за себе добија и жителите на улица ,,Антон Попов”. Покрај детските реквизити, тука е изграден и летниковец и поставена урбана опрема, сето тоа, оплеменето со парковско зеленило и дрвца.
-Со големо задоволство денес отвораме две нови детски катчиња во населбите Кисела Вода и Бирарија кои ќе донесат радост и забава на најмладите и на нивните најблиски. Овие катчиња не се само места за игра, туку и за дружење, рекреација и одмор на сите генерации. Моја стратегија и заложба како градоначалник е да инвестирам во проекти кои ќе ги опфатат сите генерации, сите сфери од општинското работење и сите населби и населени места во нашата општина. Целиме кон постигнување на рамномерен развој и подобрување на квалитетот на живот на сите наши граѓани и токму затоа, нашите проекти, па и овие, кои ги промовираме во роденденската седмица на општината, се шаренолики и разновидни. Вчера поставивме камен-темелник на новото училиште во селото Драчево, а денеска ги отвораме овие две нови локации кои најмногу ќе ги користат најмладите. Во нивната изградба, предвидовме и содржини за родителите, бабите и дедовците кои често доаѓаат со децата или се одмораат во близина. Во изминатите три години, интензивно работиме на изградба на нови и реконструкција на постоечки паркови, детски катчиња и рекреативни центри. Со гордост можам да кажам дека бројот на вакви проекти веќе достигна околу 20. И ова е насоката кон која ќе продолжиме и понатаму. Сакам да ги поканам сите жители на општина Кисела Вода и на градот Скопје да ни се придружат на втората вечер од културното лето, кое ќе се одржи вечерва во населбата Расадник, каде ќе настапат “Два Бона” и Пајак. А два часа претходно, во паркот Шопен, пензионерите од Кисела Вода ќе ја одржат хуманитарната коријада на ќе можат да се купат печива подготвени од нив. Настанот ќе биде музички збогатен со настап на членови на Здружението на пензионери и хорот “Вања Лазарова”-изјави градоначалникот Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Изградба на стадионот во општина Илинден
Општина Илинден во соработка со Фудбалската федерација на Македонија (ФФМ) започна со изградба на фудбалскиот стадион во Илинден, кој ќе се реализира во неколку фази.
Во рамки на проектот во првата фаза ќе се изврши целосна промена на фудбалскиот терен со негово проширување и поставување на нова вештачка трева, поставување на дренажа и одводнување на фудбалскиот терен, со што ќе се добие професионална подлога за одржување на фудбалски натпревари. Дополнително со проектот е опфатено да се изградат соблекувални, административни и помошни простории, нова трибина со капацитет од околу 1000 гледачи, осветлување на фудбалскиот стадион, изградба на заштитна ограда околу стадионот, партерно уредување на просторот со паркинг места како и хортикултурно уредување на просторот на околу стадионот.
Увид на работните активности направи градоначалникот на Општина Илинден, Александар Георгиевски кој истакна дека изградбата се одвива со предвидената динамика, и истакна дека граѓаните на општина Илинден и фудбалерите ќе добијат модерен и квалитетен фудбалски стадион на којшто ќе можат да се одржуваат натпревари од највисок ранг согласно критериумите и правилата на УЕФА.
Согласно предвидената динамика и активности сите овие градежни работи се планираат во фази да бидат реализирани до крајот на 2025 година. Изградбата на фудбалскиот стадион во Илинден е уште едно исполнето предизборно ветување пред граѓаните на општина Илинден, на градоначалникот Георгиевски.
Скопје
Минатата недела санкционирани 203 непрописно паркирани возила на територијата на општина Центар
ЈП Паркинзи на Општина Центар и Општина Центар во соработка со Сообраќајната полиција-Скопје минатата недела санкционираа 203 непрописно паркирани возила кои го попречувале нормалното и безбедно одвивање на сообраќајот.
„Во периодот од 24.07. до 30.07.2024 година, со помош на специјалните возила „Пајак“ на ЈП ПОЦ отстранети се 102 непрописно паркирани возила, а со поставување на механичко средство „Блокатор“ санкционирани се 101 возила кои биле затекнати на резидентни паркиралишта, а не биле корисници-резиденти на секторот во којшто биле паркирани“, соопшти ПОЦ.
ЈП ПОЦ и Општина Центар континуирано ќе ја спроведуваат оваа мерка со цел да се доведе во ред сообраќајниот хаос и проблемот со непрописното паркирање на комерцијалните и резидентните паркиралишта и улици на територија на општина Центар.
Скопје
Без вода дел од Гази Баба
Регионалниот центар за управување со кризи на Град Скопје, по добиеното известување од ЈП Водовод и канализација – Скопје, ги известува граѓаните дека денеска без вода ќе бидат улици во општината Гази Баба.
• Поради отстранување појавен уличен дефект на водоводна мрежа со пречник од ф-150мм, на улицата 16-та Македонска Бригада бб (Парк Шума Гази Баба), од 08:00 часот до завршување со интервенцијата, прекинато водоснабдување ќе имаат корисниците од улиците: 16-та Македонска Бригада, Јани Лукровски, Ташко Караџа и Трифун Хаџијанев во општина Гази Баба.