Откако му ги откривме сите скандали на Максим Димитриевски, откако јавно проговоривме за сите сомнежи за коруптивни шеми со парцели и станови, за криминал и лично богатење, градоначалникот на Куманово, сака да не замолчи, изјави Анита Мургашанска – советничка во Советот на град Скопје од СДСМ.

Наместо да даде одговори и отчет пред граѓаните, наместо да одговара, додаде таа, Максим Димитриевски поднел тужба, дека бил навреден и наклеветен.

„Но, замислете, тужбата е за мои говори во Советот на општина Куманово. Димитриевски се плаши од вистината и затоа сака да ја заташка, да ги прикрие злоупотребите и да го замолчи секој што му се спротивставува и јавно му ги обелоденува“, рече Мургашанска.

„Јас како одговорна советничка сум гласот на граѓаните, јавно зборувам за скандалите и сомнежите за криминал на Максим Димитриевски и така и ќе продолжам. Јасно му порачувам дека нема ниту да ме уплаши ниту да ме замолчи“, рече таа.

Мургашанска најави дека СДСМ ќе продолжи да ја разобличува секоја негова злоупотреба и ќе бара институционална реакција од надлежните.

„Мора да се истражи најголемиот коруптивен скандал во општина Куманово со земјиште, во организација на Максим Димитриевски и неговиот кум Драган Митевски. Како Димитриевски и неговиот кум заработиле 350.000 евра? Институциите мора да дадат одговор? Како тоа Димитриевски добил стан од 97 метри квадратни во центарот на Куманово за само 2.500 евра?“, праша таа.

Партиските вработувања и трупањето несуштински кадри во услови кога нема доволно контролори на летање, според премиерот Христијан Мицкоски, не е вистинската причина за најавите на контролорите за штрајк на 10 јуни и затворање на небото доколку не престане непочитувањето на систематизација. Одговарајќи на новинарски прашања на повторното отворање на комплексот „Македонско село“ на Водно, премиерот Мицкоски најавите ги нарече закани од кои не се плаши.

„Не мислам дека е тоа причината. Се закануваат оние што правеа упад и кои тепаа. Е сега немаат внимание и не се толку силни да тепаат и тоа е. Ние од такви не се плашиме“, рече премиерот Мицкоски.

Струковиот синдикат на контролорите на летање со писмо до управниот одбор на М-НАВ побара да се поништи последниот оглас за вработување советници на директорите и друг помошен кадар оти реално неопходно е вработување контролори. Од таму повторно алармираа за нарушени човечки односи, блокирани јавни набавки, непочитување на колективниот договор и непочитување на спогодбата со која минатогодишниот штрајк беше ставен во мирување.

Состојбата во М-НАВ ескалира лани на почетокот на годината кога група од осуммина предводени од Беким Незири, тогаш советник во М-НАВ и функционер во ДУИ, упаднаа во контролната кула и натепаа контролор кратко по прес-конференцијата, на која Синдикатот обвини за партиски вработувања и злоупотреби. Обвинителството отвори постапка за кривично дело загрозување на воздушниот сообраќај, а некои од осомничените беа во притвор или куќен притвор додека траеше истрагата.

По седум години, денес се отвори етнокомплексот „Македонско село“. Премиерот Христијан Мицкоски рече дека Скопје добива уште едно туристичко место, со убав поглед и преубави соби и апртмани.

„За мене, претставува задоволство што уште еден заборавен, запуштен и би рекол полууништен објект се става во функција, тоа е овој комплекс наречен ‘Македонско село’. Благодарност до инвеститорите, до концесионерите, кои се охрабрија да инвестираат и им да понудат и на Скопје и на сите оние што ќе го посетуваат Скопје уште едно туристичко, алтернативно и би рекол ултраквалитетно место, каде што може да се ужива во преубав поглед, во преубави соби, апартмани и сигурен сум и во превкусна храна, така што јас би им посакал многу среќа во работата, се разбира“, рече Мицкоски.

Тој ги повика сите оние што не го посетиле „Македонско село“ да дојдат во посета.

„И, се разбира, во периодот што следува да се погрижиме сето она што, за жал, изминативе седум години беше заборавено, уништено, девастирано, полека, но сигурно го обновуваме и повторно му го враќаме сјајот и го ставаме во функција, едно по едно, во зависност од приоритетите и можностите“, рече Мицкоски.