Машкиот и женскиот тим на ШК Алкалоид остварија уште по две нови победи на Екипните првенства на Македонија кои се одржуваат во Струмица.

Викендов, машкиот тим имаше уверливи победи против ШК Куманово и ШК Прилеп, два клуба кои имаат долга традиција како прволигаши и секогаш се незгодни противници кои атакуваат на некое од првите три места во елитната дивизија.

Во дуелот со ШК Куманово победата изразена како 5,5:0,5 беше остварена со стрплива игра, која според капитенот ВМ Влатко Богдановски била обележје на дуелот.

– Со зрела и стрплива игра играчите дојдоа до позиции кои им носат предност. Мечот започна со реми на шестата табла, каде што ВМ Јаќимовиќ во цајтнот не успеа да ја доврши започнатата жртва на најпрецизен начин. Сепак, по четири часа игра уследија победите на ВМ Ивиќ, ВМ Недев и ИМ Стојановски, а подоцна и ВМ Инѓиќ и ИМ Панчевски ја покажаа својата класа добивајќи ги завршниците, со што беше извојувана висока победа.

Подеднакво макотрпен беше трудот на „фармацевтите“ и во дуелот со ШК Прилеп.

– Повторно, без одлучена партија во првите три часа, па ВМ Недев ремизираше на третата табла во нешто подобра ситуација, но со мали можности да игра на победа. Противниците парираа во остра и неизвесна борба на првите две табли, па победите почнаа да се нижат откако ИМ Тони Лазов прв го скрши отпорот на противникот благодарение на прецизно и постапно маневрирање. Потоа, ИМ Филип Панчевски кој наиде на сериозен отпор и одлична игра на ветеранот Стевче Георгиевски, ја реши партијата само благодарение на една мала непрецизност на противникот во финишот, по што тој западна во проблеми со времето за игра. Подеднакво високо техничко ниво демонстрираше и ИМ Дејан Стојановски, кој со мала предност влезе во завршница но во негов стил со прецизна игра стигна до уште една победа. Во финишот, ВМ Ивиќ донесе уште еден триумф покажувајќи големо тактичко умеење, додека на првата табла ВМ Инѓиќ по шест часа игра против жилавата одбрана на противникот западна во цајтнот, но успеа сепак успеа да ремизира,- додава ВМ Богдановски.

Во останатите мечеви од 5.коло ШК Шкупи – ШК Штајниц 3:3,. ШК Гамбит Асеко СЕЕ – ШК Анапсан СЕС 5:1 и ШК Гостивар – ШК Куманово 3:3. Слободен беше тимот на ШК Пелагон. На табелата, ШК Алкалоид има 8 бода, но од четири дуели, додека второпласираниот во моментов ШК Гамбит има исто толку, но ќе биде слободен во последното коло.

На мечевите во женска конкуренција ситуацијата е слична, каде што „дамите“ прокнижија две победи над ШК Шах шех од 4:0 и над Гамбит Асеко СЕЕ со 3,5:0,5 Во првиот случај, ЖФМ Стојковска, ЖИМ Коскоска, ЖФМ Секуловска и Ефтовска забележаа заслужени победи, а во вториот меч. Во вториот случај, ВМ Бела Котенашвили и ИМ Саломе Мелиа ги решија првите две табли, додека Секуловска ремизираше, a Ефтовска го прослави роденденот со победа.

ШК Алкалоид има 10 бода по 5 кола, а со подеднаков износ се и шахистките на МШК Центар, па директниот дуел во последното 7. коло во вторник ќе биде пресуден за титулата.

ПР текст