Македонија
(Видео) 12 села се зафатени со пожарите, горат стари куќи, викендички, Ангелов апелира на внимателност

12 села се зафатени со пожарите на отворено информира директорот на ЦУК, Стојанче Ангелов.
Најважно од се, како што вели, е дека досега немаат добиено ниту една пријава за загинато или повредено лице, а сите жители на селата зафатени со пожарите се навремено евакуирани од нивните куќи.
Денеска со пожари биле зафатени неколку села: и тоа на територијата на Општина Куманово, три села каде имало претежно викендици, во овие села според Ангелов се изгорени неколку куќи, кои биле претежно стари.
Пожар има и на територијата на Општина Старо Нагоричане и таму со огнот биле зафатени три села. И во овие села според директорот на ЦУК имало малку жители и претежно стари куќи. И на територијата на Општина Свети Николе се зафатени три села. Во дел од овие села имало стари но и нови куќи кои биле зафатени од пожарите.
Пожар има и на територијата на Пробиштип и Штип, каде е зафатено селото Караорман, кое како што вели Ангелов е живо село, полно со луѓе.
Според него начинот на кој започнале пожарите и нивното ширење поради ветерот направиле тие да бидат многу тешки за гаснење. Се дејствувало и со полициските и армискиот хеликоптер, како и трите Ер-трактори на Дирекцијата за заштита и спасување. Голема благодарност Ангелов упатува до локалните пожарникари и населението кои со лопати, гранки и се што имале пред себе, успеале да го изгаснат огнот на некои места каде тоа било можно.
Ангелов со апел за особена внимателност од страна на граѓаните поради најавите дека ветерот ќе продолжи и утре.
„Во моментов имаме повеќе од 20 активни пожари на отворено, некои од нив се делумно под контрола а најважно од се, е дека се обидуваме да ги заштитиме населените места“, појасни Ангелов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) Храбри полицајци гаснеа пожар во Бутел и завршија во болница, Костовски најави награда

Двајца полицајци од полициската станица Бутел денеска покажаа вистински херојство откако ги ризикуваа свои животи за да помогнат во гасењето на пожар кој се закануваше на детска градинка и училиште во општината. Дарко Стајковски и приправникот Филип Стојчевски, при интервенцијата вдишале јаглерод моноксид, поради што се пренесени на Клиниката за токсикологија во Скопје.
За среќа, лекарите потврдуваат дека нивната здравствена состојба е стабилна и дека се под постојан медицински надзор.
Градоначалникот на Бутел, Дарко Костовски, ја поздрави нивната храброст и најави дека општината ќе ги награди.
„Секоја чест за Дарко и Филип! Ова е вистински пример за пожртвуваност и љубов кон заедницата. Благодарение на нивната брза реакција спречена е голема трагедија и спасени се животи. Општината Бутел ќе се погрижи нивниот чин да не остане незабележан“, изјави Костовски.
Во гаснењето на пожарот учествуваа и други екипи, за кои градоначалникот додаде дека исто така ќе бидат соодветно наградени.
Скопје
(Видео) Вистинска драма кај „Борис Трајковски“, евакуација на публика, 9 полицајци завршија во болница

Попладнево околу 16 часот во близина на Спортскиот центар „Борис Трајковски“ во Скопје изби пожар кој предизвика паника кај учесниците и посетителите на меѓународниот ракометен турнир. Благодарение на брзата реакција на полициските службеници и противпожарните екипи, спречено е ширење на огнените јазици кон паркираните возила, околните објекти и лизгалиштето кое е во рамки на спортскиот комплекс.
Според информациите, полицијата извршила навремена евакуација на сите спортисти, спортски работници и публика, со што е избегната поголема несреќа.
Како последица на вдишаниот чад, девет полициски службеници завршија на Одделот за токсикологија каде им е укажана лекарска помош и се на кислородна поддршка. Од болницата информираат дека сите се во стабилна состојба.
Надлежните служби остануваат на терен за да ги утврдат причините за пожарот.
Македонија
„Марш на ангелите“: Кој ги штити виновниците, прашаа родителите во Кочани

Во Кочани денеска се одржа 20-тиот „Марш на ангелите“, тивок протест во спомен на жртвите од трагедијата во дискотеката „Пулс“. Родителите и семејствата на загинатите уште еднаш упатија силни пораки за правда, обвинувајќи дека институциите го штитат криминалот наместо младите животи.
Пред Полициската станица во Кочани тие порачаа дека системот потфрлил затоа што, како што рекоа, имало „заштитници и соучесници во униформа“. Тие побараа неселективна и транспарентна истрага, како и одговор од ОЈО ГОКК за тоа до каде е постапката против вработените во МВР.
„Зошто тие сè уште се на слобода?“ – прашаа родителите.
Маршот започна во 17:05 од „Паркот на револуцијата“, минувајќи низ центарот на градот и завршувајќи пред Основниот суд и Основното јавно обвинителство во Кочани. Таму семејствата порачаа дека нивната борба не е само за сопствените загубени деца, туку за секое дете во државата.
„Без независен и некорумпиран судски систем, вакви трагедии ќе се повторуваат. Нашите деца ги нема, но вие имате обврска да ја истерате правдата“, изјавија родителите.
Маршот, проследен со силен ветер, заврши со апел до институциите конечно да ја преземат одговорноста и да ја докажат вистинската правда.