Свет
Масовен убиец побегнал од затвор во Најроби: сфатиле дека го нема кога му однеле храна
Кениецот Колинс Халуша, кој призна дека убил 42 жени, денеска побегнал од притворската ќелија во Најроби заедно со уште 13 лица, соопшти локалната полиција.
Полицијата денеска соопшти дека одговорниот службеник и управителот на мензата во полициската станица Џиџири сфатиле дека осомничените исчезнале кога отишле да им донесат појадок во 5 часот по локално време, пренесува „Гардијан“.
Според полициските информации, Халуса и другите затвореници, државјани на Еритреја, приведени поради наводно нелегално престојување во Кенија, ја исекле жичената мрежа во ќелиите и се качиле на ѕидот.
„Беше осомничен со висока вредност, кој требаше да се соочи со сериозни обвиненија. Го истражуваме инцидентот и ќе преземеме соодветни мерки“, изјави Мохамед Амин, шеф на Управата за криминалистички истраги.
Според кениската полиција, Халуса признал дека убил 42 жени во последните две години и ги фрлил нивните тела во каменолом, кој сега се користи како депонија. Од таа локација извадени се најмалку 10 вреќи со делови од тела, соопшти полицијата.
Халуша последен пат се појави пред судот во петокот, каде што судијата нареди да биде задржан уште 30 дена за да ѝ се овозможи на полицијата да ја заврши истрагата, откако неговиот адвокат на првото рочиште изјави дека осомничениот убиец е неспособен да му се суди.
Пронаоѓањето на телата во каменоломот, кој се наоѓа на само 100 метри од полициската станица, повторно го привлече вниманието на кениската полиција, која долго време беше обвинета од групите за човекови права за незаконски убиства.
Полицијата и безбедносните агенции се во центарот на вниманието на антивладините демонстрации, кои почнаа во јуни, при што десетици Кенијци беа пријавени за исчезнати.
Организациите за човекови права, како и Независниот полициски надзорен орган, цивилно надзорно тело за безбедносните сили, рекоа дека ги истражуваат смртните случаи во каменоломот.
Бегството на 13-те затвореници доаѓа шест месеци откако Кевин Кангете, Кениец баран во САД за убиство, побегнал од друга полициска станица во Најроби неколку минути откако полицајците го пуштиле да излезе од ќелијата за да разговара со својот адвокат. Неколку дена подоцна полицијата повторно го уапсила во друга област.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Путин: Десеткратно го зголемуваме производството на дронови
Рускиот претседател Владимир Путин изјави дека неговата земја десеткратно ќе го зголеми производството на беспилотни летала на речиси 1,4 милиони оваа година за да обезбеди победа на руските вооружени сили во Украина.
„Вкупно околу 140.000 беспилотни летала од различни типови се доставени до вооружените сили во 2023 година“, рече Путин. „Оваа година се планира значително зголемување на производството на дронови. Поточно, за речиси 10 пати“.
„Кој ќе реагира побрзо на новите барања на бојното поле ќе победи“, рече Путин на состанокот во Санкт Петербург посветен на развојот на производството на дронови.
Откако Русија испрати десетици илјади војници во Украина во февруари 2022 година, војната главно се заснова на артилериски и напади со беспилотни летала долж силно утврдениот фронт од 1.000 километри во кој учествуваат стотици илјади војници.
И Русија и Украина купија беспилотни летала во странство и го зголемија сопственото производство за низа цели – од уништување артилерија и арсенал на оружје до ударна енергетска инфраструктура и воени бродови, пренесува Ројтерс.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.