Култура
Поповиќ поднесе неотповиклива оставка од функцијата директор на НУ Охридско лето

Директорката на НУ Охридско лето, Наташа Поповиќ, денеска, во Министерството за култура и туризам поднесе неотповиклива оставка поради лични причини.
Оставката ја достави лично до министерот Зоран Љутков.
Поповиќ ја раководи најзначајната музичко-сценска манифестација изминативе шест години, во кои се реализира квалитетна уметничка програма со светски и домашни уметници, кои оставија белег во богатата фестивалска програма.
Во нејзиниот мандат фестивалот Охридско лето одбележа значаен јубилеј – 60 години од постоењето, и тоа во време на пандемијата на коронавирусот. Се реализира квалитетна програма со учество на домашни и странски уметници, но и со почитување на мерките и препораките за заштита на публиката и учесниците кога сите културни манифестации беа откажани.
Во 2020 година Поповиќ како директор на Охридско лето ја прими Светиклиментовата награда, повелба со која фестивалот како наш најголем културен бренд, еден од главните фактори на музичката и театарската култура на земјата, беше издвоен за најголем промотор на националното музичко творештво и амбасадор на македонската уметност во светот.
Значаен проект во изминативе шест години е и проектот „Годови“, реализиран во соработка со националниот сервис МРТ. Станува збор за колаж од снимени фрагменти од концерти и изјави и личности што се вградиле во развојот на овој најреномиран фестивал во регионот.
Исто така, под нејзино раководство, архивската документација, културното пишано богатство на манифестацијата, првпат е предадена на трајно чување во Архивот на Охрид.
Во техничко-сценскиот дел комплетно нов лик доби сцената на Долни Сарај, каде што се извршија поголеми реконструктивни зафати, а се обезбеди и нов објект за продажба и маркетинг, сувенирницата што комплетно се опреми и од оваа година треба да биде пуштена во употреба.
Поповиќ пред оставката изјави дека се гордее на сработеното, на квалитетната програма богата со многубројни звучни имиња. Заблагодарувајќи им се на вработените, рече дека се гордее што имала можност да работи со посветен и професионален тим, кој се справува со сите предизвици.
„Особено се гордеам на високиот квалитет на програмата и на успешните шест фестивалски изданија, кои се позитивно оценети од стручната критика, од делегатите на Европската асоцијација на фестивалите (ЕФА), кои беа тука на свечените отворања на фестивалот, но и од нашата верна публика. Ми беше огромна чест и задоволство да работам на оваа функција со еден прекрасен тим, кој многу ми помогна за да бидам успешен директор и менаџер, тим што е за пример и почит не само во Охрид туку и пошироко во државата, но и со селекторките на музичката и на драмската програма на фестивалот, Бисера Чадловска и Сања Арсовска“, рече Поповиќ, која годинава доби признание – благодарница од амбасадорката на Република Србија во Република Северна Македонија, Невена Јовановиќ, за големиот придонес во промоцијата на српската култура во земјата. Од амбасадорката на САД, Анџела Агелер, ѝ беше врачено признание за големи достигнувања и соработка во промовирањето на американската уметност и култура во Република Северна Македонија, кое беше одобрено со печат од Стејт департментот во Вашингтон. Претседателот на Република Италија, Серџо Матарела, ја одликува директорката Поповиќ со орден „Витез на Редот ‘Ѕвезда на Италија’“.
Минатата година Поповиќ како директорка на Охридско лето беше избрана за жена на годината од областа на културата во рамките на конференцијата „Жени претприемачки“, што се одржа шести пат во Македонија.
Таа најави дека професионалната кариера ќе ја продолжи во културата, во уметноста, која е и нејзина професија.
Вработените ѝ се заблагодарија и ѝ порачаа дека беше вистинско задоволство да се работи со неа и дека остануваат нејзини вистински пријатели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Култура
Македонскиот народен театар вечерва ја изведува „Народен пратеник“ во Народно позориште – Белград

129 години по праизведбата на „Народен пратеник“ и 101 година од неговото прво печатено издание, „Народен пратеник“ на Македонски народен театар вечерва игра во Народно позориште – Белград.
Оваа прва комедија на Бранислав Нушиќ, во изведба на моќна актерска екипа и режисерски конципирана од страна на Егон Савин, по впечатливата и одлично забележана изведба на реномираниот фестивал и добиената специјална награда за колективна актерска игра од „Стериино позорје“ – вечерва во 20:30 часот игра на сцената „Раша Плаовиќ“.
Силните впечатоци и импресиите што ги сподели новосадската публика и критиката за двете изведби се патоказ и очекување тоа да се доживее и по оваа изведба.
Култура
Историски ден за МНТ: триумф на ансамблот во „Народен пратеник“

3 јуни 2025 – ден што со особена чест ќе биде запишан во поновата историја на Македонскиот народен театар.
Наградата што секој актер и ансамбл ја посакуваат – Специјалната Стериина награда за колективна актерска игра – му припадна на ансамблот на претставата „Народен пратеник“ од Бранислав Нушиќ, во режија на Егон Савин, а во продукција на Македонскиот народен театар – Скопје.
Ова е награда што ја слави и ја велича не само актерската вештина туку и сплотеноста што се раѓа на сцената – заедништвото во процесот на создавање, како и силата на колективната енергија што живее низ целото траење на претставата.
Александар Микиќ, Дарја Ризова, Тони Михајловски, Јордан Симонов, Тања Кочовска, Александар Михајловски (со снимен глас), народот: Дејан Стамчевски, Синан Ракип, Скендер Бериша, Зекирија Алим, Мирослав Атанасовски, Мартин Китановски и Хусеин Халили, како и целиот тим зад сцената – го заслуживте ова признание!
ПР
Култура
Премиера на балетот „Госпоѓа Бовари“ – одбележување 25 години уметничка дејност на примабалерината Марија Кичевска-Шокаровска

На 25 јуни 2025 година со почеток во 20.00 часот на големата сцена на Националната опера и балет, ќе се одржи премиерата на новата балетска продукција „Госпоѓа Бовари“, инспирирана од безвременскиот роман на Густав Флобер. Ова сценско остварување е посветено на јубилејот од 25 години уметничка дејност на примабалерината, Марија Кичевска Шокаровска која со својата енергија, емоција и посветеност остави длабок белег во историјата на македонскиот балет.
Ова балетско дело, поставено во два чина ја раскажува драмата на женската душа, копнежот по страст, слобода и трагичниот судир со општествените норми.
Диригент е Едуард Амбарцумјан од Ерменија, кореографијата ја потпишува Виктор Ишчук од Украина, кој со прецизност и современ израз го доловува духот на 19 век, додека музичката подлога е составена од дела на К. Сен-Санс, М. Равел, Ж. Масне, Ф. Менделсон и Г. Ф. Хендл, сценографијата и костимографијата се на Андреј Злобин и Гана Ипатиева од Украина, светло дизајн, Милчо Александров, а концерт-мајстор е Јане Бакевски.
Особено значајно е што оваа премиера е посветена на Марија Кичевска Шокаровска, која со својата уметничка кариера остави неизбришлив печат во историјата на македонскиот балет.Таа ќе ја толкува главната улога на Ема Бовари, во останатите улоги ќе настапат, Франциско Хименез Руиз (Шарл Бовари), Балаж Лочеи (Рудолф Буланже), Дмитро Чеботар (Трговецот Лере) и Ендру Кук (Доктор Оме) заедно со солистите, балетскиот ансамбл и оркестарот на Националната опера и балет.
Билетите се пуштени во продажба, онлајн и на билетарницата на МОБ.