Украина „мора да биде на масата“ во преговорите што ќе следат по средбата на Доналд Трамп и Владимир Путин во Алјаска в петок, изјави денес германскиот канцелар Фридрих Мерц.

Мерц одржа заедничка прес-конференција со украинскиот претседател Володимир Зеленски по нивните видео-конференциски разговори со европските лидери, генералниот секретар на НАТО и американскиот претседател Доналд Трамп.

Германскиот канцелар нагласи дека мора да се следи единствениот правилен редослед на настани: прво треба да се договори прекин на огнот, а потоа да следи долгорочен мировен договор.

„Прекин на огнот“ меѓу Москва и Киев „мора да дојде на прво место“ за да можат сите преговори да продолжат „по правилен редослед“, рече тој по видео-конференцијата.

Мерц нагласи дека мора да има силни безбедносни гаранции, почитувајќи го суверенитетот на Украина.

Мерц вели дека Европа прави сè што може за да „помогне во поставувањето на агендата“ за средбата меѓу претседателот на Соединетите Американски Држави и рускиот претседател во Алјаска.

Тој вели дека се надева дека Трамп ќе биде успешен на средбата.

„Безбедносните интереси на Европа и Украина мора да бидат заштитени во Алјаска“, рече Мерц на прес-конференција, а за тоа, како што изјави, разговарал и со Трамп.

Американскиот претседател Доналд Трамп изјави дека Украина мора да биде вклучена во разговорите за територијата како дел од секој договор за прекин на огнот со Русија, изјави францускиот претседател Емануел Макрон.

Тврдењето на Макрон е прв показател за исходот од разговорите меѓу Трамп, европските лидери и украинскиот претседател Володимир Зеленски, со цел обликување на состанокот на Трамп со рускиот претседател Владимир Путин во Алјаска во петок.

Инсистирањето на Трамп за вклучување на Украина, доколку се потврди, би можело да значи одредено олеснување за Украина и нејзините сојузници, кои стравуваа дека Трамп и Путин би можеле да постигнат договор што би им наштетил на европските и украинските безбедносни интереси и би ја поделил украинската територија.

Трамп и Путин ќе се сретнат в петок во Алјаска за да разговараат за тоа како да се стави крај на три и полгодишниот конфликт, најлошиот во Европа од Втората светска војна.

Генералниот секретар на НАТО, Марк Руте, изјави дека „топката сега е во дворот на Путин“ по учеството во видеоповик со американскиот претседател Доналд Трамп, украинскиот претседател Володимир Зеленски и европските лидери.

Great call with @POTUS, @ZelenskyyUA & European leaders ahead of President Trump’s meeting with Putin in Alaska. We are united in pushing to end to this terrible war against 🇺🇦 & achieve just and lasting peace. Appreciate @realDonaldTrump leadership & close coordination with…

— Mark Rutte (@SecGenNATO) August 13, 2025

„Ние сме обединети во нашите напори да ја завршиме оваа ужасна војна против Украина и да постигнеме праведен и траен мир“, објави Руте на социјалните мрежи.

„Го ценам лидерството на Трамп и тесната координација со сојузниците. Топката сега е во дворот на Путин“, додаде тој, осврнувајќи се на претстојната средба меѓу Трамп и Путин во Алјаска.