Македонија
Петровска: Целосно размонтирање на случајот за убиството пред „Мавровка“ – МВР криеше кои се убијците
Поранешната министерка за одбрана и актуелна пратеничка, Славјанка Петровска вели дека е потребно целосно размонтирање на убиството кое деновиве се случи кај „Мавровка“.
„Кога Мицковски зборува за политички глодари, треба да се потсети на неговите некрофилски изјави во минатото. А сега да потсетиме на фактите за осомничените за убиството кај Мавровка.
Убиството се случува на 20.08.2024 година, во сред бел ден, во центарот на Скопје. МВР соопштува дека еден осомничен е уапсен, се трага по вториот кој е во бегство. Имиња ниту пак иницијали нема.
Ова е крајно невообичаено затоа МВР секогаш соопштува имиња или барем иницијали на приведените.
Особено ако трага по опасен, вооружен криминалец, зарем не чувствуваа одговорност кон граѓаните да ги предупредат за лицето кое е вооружено и бега!?
На 21.08.2024, 24 часа по убиството при мој телевиски настап поставувам прашање: Зошто иницијалите на приведениот и оној по кој се трага се кријат?
Дали е тоа можеби затоа што двајцата се затвореници, кои се избегани од затвор и го сториле убиството?
Одговор од МВР нема.
После нов 24 часовен молк, и притисок од новинарите МВР срамежливо, но потврдно одговара на моето прашање.
Денес, Премиерот на хартија, зошто појма нема што му се случува во државата, на оваа тема вели: да, избегани се, ама во време на СДСМ.
Ајде вака Премиерче на хартија: на 28 јануари 2024 година, е избрана нова Влада, во која по предлог на ДПМНЕ, министер за внатрешни работи е Панче Тошковски, партиски адвокат и претседател на комисијата за правни прашања на ДПМНЕ( патем и пишувач на партискиот статут на ДПМНЕ во кој името на државата е избришано)
Истиот тој, тогаш и сегашен министер за внатрешни работи потпишува повеќе од 100тина решенија за распоредување на полициски службеници, меѓу кои и раководни лица согласно неговите убедувања. Па така началникот на СВР Скопје, кој да потсетам е задолжен за редот, мирот и безбедноста во градот Скопје е негов избор, не на СДСМ.
Е сега, кога има бегство од затвор, на сила стапува МВР, тие распишуваат потерница и имаат законска обврска за пронаоѓање на бегалецот.
Кој е министер за внатрешни работи? Панче Тошковски. Кој го предалага него? Мицковски и ДПМНЕ. Што не ти е јасно тука?
Одиме на вториот бегалец. Тој бега во месец јули, кога Министер за внатрешни е Панче Тошковски, а директор на Управата за извршување на санкции, Александар Пандов. Целата структура во МВР е променета по налог на Панче Тошковски.
Повеќе од 30 дена и овој затвореник е во бегство и МВР не го наоѓа.
Е сега имам нови прашања:
МВР знаеле уште од април, односно јули месец дека двајцата затвореници се во бегство. Но, исто така знаеле и за каков профил на криминалци станува збор. Имено, од нивните досиеа и претходни дела знаеле дека се опасни, секогаш вооружени, корисници на наркотични средства и често агресивни и насилни.
Знаејќи го ова, прашувам кои се оперативни активности биле превземени од денот на нивното бегство до кобниот ден на убиство на невин човек?
Колку пати биле проверени куќите и објектите за кои МВР од претходно имало оперативни сознанија дека тие ги користат. Дали биле применети посебно истражни мерки над нив и над членовите на нивните семејства?
И конечно, како способните началници на Панче и МВРО дозволија овие опасни криминалци во сред бел да дојдат во центарот на градот и да извршат убиство? “, пишува Петровска.
Колку за споредба, како што вели, во време на СДСМ еден од овие затвореници беше успешно вратен во затвор, без во меѓувреме да стори убиство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со државната министерка за Европа и клима го германското МНР, Лирман
Министерот за надворешни работи и надворешна трговија, Тимчо Муцунски, денеска оствари средба со државната министерка за Европа и клима при Министерството за надворешни работи на Сојузна Република Германија, Ана Лирман.
Двајцата соговорници го истакнаа задоволството од развојот на одличните билатерални односи, кои се карактеризираат со интензивен политички дијалог и активна размена на посети на високо и највисоко ниво во изминатите години.
Особено беше нагласена важноста од зајакнување на меѓусебната соработка во рамките на евроинтегративниот процес на нашата земја, како и континуираната поддршка од Германија на тој пат. Беше изразено и заемно задоволство од придобивките на Берлинскиот процес, во насока на забрзување на евроинтеграциите. Потенцирајќи ја потребата од поголема предвидливост на интегративниот процес, Министерот Муцунски потврди дека нашата земја останува стратешки посветена на забрзување на процесот за пристапување во ЕУ, со фокус на квалитетно спроведување на реформите.
Министерката Лирман го поздрави напредокот во реформските процеси, уверувајќи дека германската поддршка на интегративниот пат на нашата земја ќе продолжи и понатаму и потврдувајќи дека Германија останува сигурен партнер на патот кон Европската унија.
Македонија
Министерството за одбрана: Кујната не е затворена, АХВ изрече мерка на компанијата која ја приготвува храната за Министерството и Армијата
Министерството за одбрана упатува демант во однос на пласираната информацијата дека Кујната на Воената академија е затворена од страна на Агенцијата за храна и ветерина.
„Ве информираме дека по направениот вонреден хигиенски епидемиолошки надзор од страна на надлежните институции, Агенцијата за храна и ветерина излезе со соопштение во кое јасно е наведено дека во Касарната Гоце Делчев каде е лоцирана Воената академија не се најдени недоследности.
Според резултатите од Центарот за јавно здравје, од страна на АХВ е изречена мерка на компанијата која ја приготвува храната за потребите на Министерството за одбрана и Армијата. По добивањето на овие информации Министерството за одбрана ќе започне постапка согласно закон и договорот за јавна набавка“, наведе министерството во демантот.
АХВ претходно денес објави дека инспекциските служби изрекоа мерка за спроведување на повторна дезинфекција, а земени ќе бидат и нови контролни брисеви.
„Изречената мерка по спроведениот вонреден инспекциски надзор за времено затворање на кујната ќе остане на сила се додека со новите лабораториски тестирања не се потврди нејзината безбедност“, се наведува во нивното соопштение објавено денес.
Македонија
Бугарското МНР: Посетата на Сиљановска не беше официјална и затоа не предвидува поставување на државни знамиња
Бугрското Министерството за надворешни работи застана во одбрана на ставовите на амбасадорот Жељаско Радуков кој вчера одбил да ја прифати протестната нота за изостанувањето на македонското знаме, за време на фотографијата од средбата помеѓу претседателката Гордана Сиљановска-Давкова и нејзиниот колега, Румен Радев.
Бугарското МНР во изјава за бугарската „Нова“ соопшти дека амбасадорот бил поканет на разговор во Министерството за надворешни работи на Северна Македонија по повод посетата на претседателката Гордана Силјановска – Давкова, на 13 септември и коментарите во врска со фотографиите поврзани со оваа посета.
„Посетата беше по повод културен настан – гостување на Националната опера и балет на Република Северна Македонија во Софија и нема карактер на државна, официјална или работна посета. Во такви случаи, протоколарната практика не предвидува интонирање на химните, поставување други државни знамиња, како и други протоколарни атрибути. Горенаведеното го изјави и амбасадорот Радуков вчера во разговорот со дипломатите од МНР на РСМ“, наведуваат во својот став од бугарското министерство,
Се додава дека бугарската страна испратила покани до министрите кои ја придружувале Сиљановска-Давкова, за средби со нивните бугарско колеги, меѓутоа, за жал, поканата од министерот за надворешни работи, Иван Кондов, до министерот за надворешни работи и надворешна трговија, Тимчо Муцунски била одбиена.
Од македонското МНР, пак, очекуваат бугарскиот амбасадор во земјава да ја пренесе пораката до властите во Софија.
„На вчерашната средба во Министерството за надворешни работи и надворешна трговија, на која усно и писмено беше изразена нашата загриженост поради отстапувањето од договорениот протокол за фотографирање на претседателката Силјановска Давкова и претседателот Радев, амбасадорот на Бугарија, Жељаско Радуков, одби да го прифати нотата. Појаснуваме дека амбасадорот Радуков вербално се запознал со целата содржина на нотата и одбивањето да ја прифати не значи дека пораките пренесени на оваа средба имаат различно или помало значење”, велат од Министерството.
По посетата, од кабинетот на Сиљановска истакнаа дека фотографирањето не било однапред предвидено и ќе побараат објаснување од бугарската страна.
„Средбата и заедничкиот ручек поминаа во извонредно пријателска атмосфера, од пречекот до крајот. Она што фрли сенка на настанот е отстапувањето од договорениот протокол за средбата, според кој, не требаше да има фотографии во рамките на затворениот простор. Но, за жал, пред почетокот на тет-а-тет средбата, претседателот Радев ја покани претседателката да направат заедничка фотографија пред бугарското знаме, иако ваков потег и чин не беше предвиден, ниту договорен. Сакаме да веруваме дека се работи за протоколарен превид, а не за намерна постапка и отстапка од договореното и веќе утре ќе побараме објаснување од бугарска страна“, рекоа од Кабинетот на Давкова.
СДСМ ја опиша средбата како дипломатски дебакл. Од опозициската партија констатираа дека Сиљановска и министрите во Софија биле пречекани како претставници на некои локални бугарски клубови или општински институции, а не како меѓународни високи претставници на држава членка на НАТО и важен партнер на Бугарија.