Свет
Мутира вирус што се пренесува преку комарци: се шири бргу, регистрирани случаи и во Европа
Мистериозен вирус, кој некогаш бил ограничен на регионот на Амазон, претрпе генетски промени и во поопасна верзија почна да се шири во Америка. До неодамна вирусот Oropouche, кој се пренесува преку комарци, беше релативно непозната болест, главно ограничена на басенот на Амазон во Јужна Америка. Но, од крајот на 2023 година оваа инфекција почна да се шири надвор од својата вообичаена област.
Од 1 август годинава пријавени се повеќе од 8.000 случаи на таканаречена„треска на мрзливост, со два смртни случаја во Бразил. Повеќето од инфекциите биле во Јужна Америка, но се појавиле и во САД и во Европа.
Поради наглото зголемување на случаите, Американскиот центар за контрола и превенција на болестите (ЦДЦ) издаде здравствено предупредување до лекарите во САД. Првите случаи на вирусот во Европа беа откриени во јуни и јули оваа година кај патниците што се заразиле за време на нивниот престој во Бразил и Куба, пишува Би-би-си.
Поради вирусот оропуче, Панамериканската здравствена организација издаде епидемиолошко предупредување и го подигна нивото на ризик за јавното здравје на високо. „Иако болеста досега имаше благи симптоми, потребен е зголемен надзор поради географското ширење на преносот и појавата на потешки случаи“, се вели во соопштението на агенцијата.
Вирусот Oropouche е ендемичен во регионот на Амазон во Јужна Америка и се шири преку каснувања од инсекти. Најчесто го шират малите мушички Culicoides paraensis, кои ги има во изобилство на големо подрачје на Америка. Сепак, може да се пренесе и од комарците Culex quinquefasciatus и Ochlerotatus serratus, кои се наоѓаат во тропските и суптропските региони.
Досега не е забележан директен пренос од човек на човек. Кога вирусот ќе влезе во крвотокот, може бргу да се прошири во телото. Се чини дека се акумулира особено во мозокот и црниот дроб. Името го добил по селото во кое е забележан првиот случај. Имено, властите во 1955 година првпат го изолирале овој вирус од крвта на болен шумски работник во населбата Вега де Оропуче во Тринидад и Тобаго.
Досега се регистрирани околу 500.000 случаи на зарази, но вистинската бројка е веројатно поголема бидејќи симптомите се многу слични со другите болести што предизвикуваат треска. Во доцните 80-ти инфекциите почнаа да се појавуваат во Панама, Перу и Еквадор, а од 2000 година во Боливија, Колумбија, Еквадор и Француска Гвајана.
По неодамнешната анализа на вирусот, научниците открија дека има промена во неговиот генетски код поради што тој поефикасно се репродуцира во заразените клетки. Ова значи дека потенцијално може да предизвика посериозни симптоми и полесно се шири со каснување од комарец.
Претходно оваа година, две млади и инаку здрави жени починаа во Бразил откога беа заразени. Властите ја истражуваат третата смрт на средовечен маж. Имаше и неколку случаи на инфекција кај трудници, кои резултираа со смрт на нероденото дете или проблеми со развојот на мозокот на бебето.
Вирусот предизвикува симптоми слични на грип – висока температура, главоболка, болки во мускулите, гадење и повраќање. Во тешки случаи може да предизвика менингитис.
Според ЦДЦ, симптомите обично почнуваат од три до десет дена по каснувањето и траат од три до шест дена. Симптомите може повторно да се појават неколку дена или недели по закрепнувањето.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.