Македонија
„Вреди“: Иницијативата за оспорување на двојазичноста е обид за државен удар

Без намера да ја загрозуваме независноста на Уставниот Суд, сметаме дека е неопходно да предупредиме од опасноста, прашањето на употребата на Албанскиот јазик како службен јазик да се третира како можност за дневно политичка пресметка, велат од „Вреди“
Со оглед на фактот дека иницијативата доаѓа од анти НАТО партија која го глорифицира комунистичкиот режим на Енвер Хоџа, најмалку што очекуваме, додаваат од партијата, е истата да се отфрли со констатација дека е обид за државен удар.
„Особено што станува збор за оспорување на процесот на стапување на сила на Законот за употреба на јазиците, без да навлегува во неговата содржина. Доколку ваквата иницијатива евентуално се прифати, тогаш се отвора Пандорината кутија и за промената на Уставното име, кое исто така е извршено без потпис на тогашниот претседател на републиката, Ѓорѓе Иванов. Не сметаме дека Уставниот Суд треба да придонесе евентуална ревизија на нашето полноправно членство во најмоќниот воено-политички сојуз, НАТО Алијансата.
Нашиот став за балансерот е јасен и соопштен во неколку наврати. Овој механизам стана предмет на злоупотреба кога Македонци се изјаснуваа како Албанци за да се вработат во државна администрација. Затоа, сметаме дека е неопходно да се усвои Закон за правична застапеност.
Што се однесува до душебрижниците од албанската опозиција, кои на секоја кривина бараат причина за да креираат меѓуетнички тензии со единствена цел, да го спасат фамилијарниот криминал на Али Ахмети, им порачуваме да му одговорат на Албанскиот народ:
Што правевте пет години од 2019 до 2024 и зошто не ја отфрливте можноста, Уставниот суд воопшто да ја преиспитува употребата на Албанскиот јазик како службен јазик?
Иницијативата на Левица до Уставниот Суд е доставена во 2019 година, кога ДУИ е на власт. Во тоа време за претседател на Уставниот суд е избран Сали Мурати, кој денес е пратеник од редовите на таканаречениот Европски фронт.
Во 2009 и 2014, екипата на Али Ахмети по налог на Никола Груевски и Сашо Мијалков го избраа Ѓорѓе Иванов за претседател на републиката. Во 2024 срамно не ја подржаа претседателската кандидатурата на Арбен Таравари и со тоа спречија Албанците за прв пат во историјата да имаат шанса за победа во вториот круг“, истакнуваат во соопштението од „Вреди“.
Ова како што оценуваат, е директен доказ за лицемерието на ДУИ, кои на секој чекор оставаат кукавички јајца за интересите на Албанците.
Според „Вреди“, крајно време е да престанат да ја потценуваат интелигенцијата на албанскиот народ и да ја прифатат одговорноста за нивните погрешни, неодговорни и криминални политики.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Децата со аутизам се само поразлични, не се деца со маана

Претседателката Гордана Сиљановска-Давкова денеска прими родители од Здружението на граѓани за третман на лица со аутизам, АДХД и Аспергерог синдром „Во мојот свет“, по повод 2 април – светскиот ден за подигање на свеста за аутизмот.
На средбата, родителите истакнаа дека сè уште се сами во борбата за подобрување на животот на своите чеда. Отсуствува системско решавање на проблемите. Родителот, велат тие, нема никаква поддршка. Има многу малку лични асистенти кои им помагаат, тешкиот товар паѓа на нив и затоа дел од нив не работат. Истовремено, поради отсуство на емпатија, секојдневно се соочуваат со чудни погледи и стигматизација на нивните деца. Најболно и најстрашно за нив, истакнуваат, е кога ќе помислат кој ќе се грижи за детето по нивната смрт.
Слушајќи ги проблемите со кои се соочуваат родителите, претседателката потенцираше дека децата треба да ни се најважни, бидејќи, како што рече, „убедена сум дека секое дете може да дојде до израз ако му се даде шанса“.
Таа, во волонтерството препознава едно од можните решенија на проблемот. По примерот на САД и многу други држави, учениците, средношколци и студентите, како волонтери би добивале поени што ќе се земаат предвид при евалуацијата. „Да дадеш нешто, без да бараш ништо за возврат, тоа е едноставно љубов“, смета таа.
Уште еден голем проблем на којшто посочија родителите е отсуството на разбирање и прифаќање, за жал, не се разговара ниту во семејството. Децата уште од градинка треба да учат дека некои нивни врсници се поразлични од нив и да ги прифатат како такви. Само на тој начин ќе се развие инклузивната свесност, велат родителите.
Во оваа насока претседателката се заложи за креирање интегрално решение, коешто ќе вклучи измени не само во законите за основно и за средно образование, туку и во други закони каде посебен дел ќе им биде посветен на децата со попреченост. „На тие деца им е потребно да учествуваат во социјалниот живот, а не да бидат оставени на маргините на општеството“, заклучи таа. Час поскоро треба да се обезбеди простор за Центарот за аутизам во Тетово, со оглед на веќе пристигнатата бугарска донација.
Од здружението „Во мојот свет“ укажаа дека забрзано расте бројот на лица со аутизам, од 2000 година до сега, пораснал за 317%. Поради недостиг на национален регистар, според статистиката на ЕУ и на СЗО, се претпоставува дека во земјава има од 15 до 20 000 лица со аутистичен спектар на нарушување кои нестрпливо очекуваат разбирање и помош.
Македонија
Муцунски во работна посета на Брисел: Проширувањето мора да биде врвен политички приоритет со јасна и предвидлива траекторија

Министерот за надворешни работи и надворешна трговија, Тимчо Муцунски, од денеска до петок престојува во работна посета на Брисел, Кралството Белгија.
Во рамки на посетата, министерот Муцунски одржа одделни обраќања пред претставници на неколку бриселски тинк-тенкови, како и пред Центарот за европски политики (EPC), каде говореше за стратешката определба на државата – членството во Европската Унија.
Министерот изрази искрена благодарност до Европската Унија и земјите членки за покажаната солидарност и брзата реакција по трагичната несреќа во Кочани, оценувајќи ја како автентичен пример за европски вредности на дело.
Говорејќи за евроинтегративниот процес на државата, Муцунски ја нагласи целосната усогласеност на земјата со Заедничката надворешна и безбедносна политика на ЕУ, како и посветеноста на Владата на реформската агенда. Тој истакна дека државата е технички подготвена за отворање на првиот кластер од пристапните преговори и очекува јасен, предвидлив и кредибилен пат напред – без нови одлагања и блокади.
Министерот подвлече дека членството во ЕУ е стратешка определба на државата, а процесот на проширување не смее да се третира само како техничко прашање, туку како прашање поврзано со економски раст, стабилност и заеднички европски вредности.
Муцунски порача дека Европската Унија мора да го задржи проширувањето како врвен политички приоритет, со јасна и предвидлива траекторија, предупредувајќи дека евентуално одложување на процесот би имало сериозни последици за кредибилитетот на политиката на проширување во регионот на Западен Балкан.
Македонија
Филипче нема легитимитет да нуди концепти за Македонија, велат од ЗНАМ

Политичката партија ЗНАМ реагира на предложениот концепт за општествен и политички дијалог од страна на претседателот на СДСМ, Венко Филипче,нарекувајќи го самопрогласен лидер на опозицијата без политички легитимитет.
Од партијата на Максим Димитриевски велат дека Филипче е одговорен за длабоките системски грешки во општеството, меѓу кои модуларната болница, криминална набавка на вакцините во време на Ковидот, случајот со Онкологија, но и измените на Кривичниот Законик, со кој се амнестираа функционери.
Партијата во реакцијата го оспорува политичкиот легитимитет на Филипче, коментирајќи: „Македонската јавност не е дементна за да заборави дека директорот на Фондацијата Заев во претходните 8 години го промовираше концептот Едно општество за сите, едно за Вицето. Од тие причини, СДСМ и Венко Филипче апсолутно немаат политички кредибилитет, ниту легитимитет да нудат било какви концепти за Македонија овој момент“.
Се додава и дека Венко Филипче и СДСМ не можат да бидат решение на проблемите, бидејќи покажале дека тие се проблем за секое решение.
ЗНАМ праша и дали, самопрогласениот лидер на опозиција (како што го нарекува Филипче), со ова бара начин да се факторизира како политички фактор во јавноста и да седне на преговарачка маса, имајќи ја в предвид очајната состојба на неговата партија.