Свет
Маж од Полска четири години чувал жена заробена во штала: ја запознал на интернет, ја силувал и ја мачел
35-годишен Полјак е осомничен дека држел 30-годишна жена, која ја запознал на веб-страница за запознавање, четири години заробена во штала, ја силувал и ја мачел, пренесува „Телеграф“.
Тие двајца се запознале на интернет, а потоа во 2019 година сопругата на осомничениот Матеуш Ј. отишла во посета на едно мало село кај Глогово на запад од Полска.
Обвинителите рекоа дека жртвата немала пристап до струја, вода, тоалети или средства за хигиена. Поминала четири години во штала, каде што порано имало животни. Никој од соседите на осомничениот не се посомневал ништо.
Жртвата раскажала дека доколку не ги исполнела неговите сексуални очекувања, тој ја тепал, ја мачел и изгладнувал. Наводно таа се породила во блискиот град Нова Сол, а тој ја принудил да го даде детето на посвојување.
„Не можев да им ја кажам вистината на лекарите. Се плашев, а тој ми се закануваше дека ќе биде полошо ако се пожалам“, вели жртвата. За време на затворањето уште неколкупати била хоспитализирана поради разни повреди. Минатата недела повторно, а потоа ги предупредила лекарите, кои повикале полиција.
Полјакот, кој беше уапсен во петокот, ги негира обвиненијата и се соочува со затворска казна до 25 години под обвинение за ментална, физичка и сексуална злоупотреба.
35-годишникот странските медиуми го нарекуваат полскиот Фрицл. Инаку, Џозеф Фрицл беше еден од најозлогласените австриски криминалци, кој 24 години ја држел својата ќерка заробена во зандана под куќата. За тоа време родила седум деца.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русија потврди дека извршила напад врз украински воени и енергетски објекти
Руското Министерство за одбрана соопшти денеска дека Москва синоќа извршила напад врз украинските воено-индустриски и енергетски објекти како одговор на тоа што го нарече „терористички напади“, објавија светските агенции.
„Како одговор на терористичките напади на Украина врз цивилни објекти на руска територија, синоќа вооружените сили на Руската Федерација извршија напад со високопрецизно оружје и беспилотни летала врз претпријатија од воено-индустрискиот комплекс на Украина и енергетски објекти кои го обезбедуваат нивното работење. Целите на нападот се исполнети. Сите целни објекти се погодени“, се вели во соопштението на министерството.
Во меѓувреме, Каспискиот козорциум за гасовод (КТК) денеска соопшти дека ги прекинал своите операции откако неговото пристаниште во Русија на брегот на Црното Море било сериозно оштетено во напад од украински воени беспилотни летала.
Свет
162 лица загинаа во поплавите во јужен Тајланд
Портпаролот на тајландската Влада, Сирипонг Ангкасакулкиат денеска изјави дека 162 лица го загубиле животот во поплавите во јужен Тајланд, пренесуваат агенциите.
Околу еден милион домаќинства и повеќе од три милиони луѓе се погодени во поплавите во 12 провинции во јужен Тајланд предизвикани од обилните дождови во последните неколку дена.
Тајландскиот премиер Анутин Чарнвиракул претходно прогласи вонредна состојба во провинцијата Сонгкла. Поплавите го погодија и најголемиот град во јужен Тајланд, Хат Јаи.
Свет
Без струја останаа повеќе од 600.000 луѓе по руските напади во Украина
Повеќе од 600.000 луѓе останаа без електрична енергија во Украина по руските напади со ракети и беспилотни летала, соопшти украинското Министерство за енергетика.
„Како резултат на нападите, повеќе од 500.000 потрошувачи во Киев и повеќе од 100.000 потрошувачи во неговиот регион останаа утринава без електрична енергија“, наведе Министерството.
Како што беше додадено, речиси 8.000 луѓе во регионот на Харков останаа без електрична енергија. Нападите започнаа синоќа и продолжија утрово.

