Македонија
Љутков: Велосипедската рута „Транс Динарика“ е збогатување на македонската туристичка понуда
Министерот за култура и туризам, Зоран Љутков, денеска, на промоцијата на велосипедската рута „Транс Динарика“ истакна дека Министерството за култура и туризам во овој проект препознава одлична можност за промоција на рекреативниот туризам, историските локалитети, природната убавина и разновидните искуства на местата низ кои поминува рутата, но и зацврстување на локалната економија, создавање можности за вработување и поттикнување на културната размена.
„Оваа рута овозможува запознавање со прекрасните пејзажи на земјите од Западен Балкан, со разните традиции, со храната и приказните од овој регион. Многу посетители, за кои е достапна и детаљна дигитална навигација, првпат може да поминат низ локалитетите, селата и националните паркови на УНЕСКО“, рече министерот Љутков, кој изрази уверување дека пред нас се уште многу заеднички иницијативи во секторот туризам, со кои ќе покажуваме дека само обединети можеме да го претставиме Западен Балкан како атрактивна туристичка и културна дестинација.
Потенцирајќи дека првпат од осамостојувањето на државава, Владата во својот состав има Министерство за култура и туризам, односно кон секторот култура го интегрираме и секторот туризам, Љутков истакна дека оваа Влада во туризмот препозна важен столб за промоција на културното и природното наследство што го поседуваме, но и фактор за раст и развој на националната економија.
„Нашите заложби се квалитетни политики, мерки и проекти, кои имаат цел унапредување на туристичката инфраструктура на нашата држава како примамлива туристичка дестинација за странски посетители“, рече министерот за култура и туризам додавајќи дека ваквите настани и меѓународни проекти се од голема полза за стекнување нови искуства и добри практики за развивање разни сегменти од туризмот.
„Верувам дека македонскиот туризам, како и туризмот во регионот на Западен Балкан, има светла и обединета иднина. Владата и Министерството за култура и туризам се отворени за соработка во проектите што го развиваат одржливиот туризам, со почитување на животната средина и локалните заедници. Како министер за култура и туризам ќе направам сè што е во наша надлежност за потенцијалите на оваа рута и во иднина да се развиваат“, рече министерот Љутков додавајќи дека ние сме мала земја, која може да понуди многу, а оваа патека е вистинско збогатување на туристичката понуда.
На промотивниот настан се обратија и амбасадорката на Кралството Шведска, Ами Ларсон Џеин, и програмскиот менаџер на програмата „Рекономи“, Пауло Родригез.
Велоспедската рута „Транс Динарика“ е проект на регионалната програма „Рекономи“ (Reconomy), финансиски поддржана од Шведската меѓународна агенција за развојна соработка, спроведена и управувана од швајцарската меѓународна развојна организација Helvetas, во земјите од Источна Европа и од Западен Балкан. Рутата овозможува возење велосипед 5.000 километри во шест земји од Западен Балкан, вклучително и 605 километри во нашата држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Дел од две скопски населби без струја
Регионалниот центар за управување со кризи на Град Скопје, по добиеното известување од ЕВН, известува дека поради планирани зафати во електро дистрибутивната мрежа без напојување со електрична енергија ќе останат:
• од 09:00 до 12:00 часот Сеизмологија, Пржино, Институт за земјотресно инженерство, Француска амбасада и ул.Милан Мијалковиќ. (Општина Центар)
• од 08:00 до 15:30 часот Дел од улица Регионален пат R1102 Скопје – Катланово на потегот од бензинска Мак Петрол до исклучок кон с. Огњанци, улица 3, дел од улица 7 и дел од улица 2. (Општина Петровец)
Македонија
Поради водоводен приклучок: дел од Центар без вода за пиење
Регионалниот центар за управување со кризи на Град Скопје, по добиеното известување од ЈП Водовод и канализација – Скопје, соопшти дека денеска- петок, поради изведување на водоводен приклучок од Ф-80мм на ул.Македонија ( спроти Спомен куќата на Мајка Тереза ) во населба Центар, прекинато водоснабдување ќе имаат корисниците на потегот од Димитрие Чуповски до Даме Груев и дел од Луј Пастер , од 08:30 часот до завршување.(општина Центар)
Македонија
Променливо облачно со повремени врнежи од дожд, кои наместа ќе бидат пообилни
Времето денеска ќе биде променливо облачно со повремени врнежи од дожд, кои наместа ќе бидат пообилни и поројни, проследени со појава на грмежи.
Ќе дува слаб до умерен ветер претежно од североисточен правец.
Минималната температура ќе биде во интервал од 10 до 15, а максималната ќе достигне од 18 до 25 степени.
Во Скопје, времето ќе биде променливо облачно со повремени врнежи од дожд, попладне пообилни проследени со грмежи. Минималната температура ќе се спушти до 15, а максималната ќе достигне до 22 степени.
Во сабота во западните делови ќе има услови за слаб локален дожд. Потоа во следните денови времето ќе биде сончево со мала до умерена облачност. Дневната температура ќе биде во постепен благ пораст.