Спорт
Македонскиот шахист Тони Лазов олимписки вицешампион
Македонскиот интернационален мајстор Тони Лазов освои сребрен медал на втората табла на 45. Шаховска олимпијада што се одржа од 10 до 22 септември во Будимпешта.
Лазов, кој го почна турнирот со рејтинг 2360, освои 7,5 поени од осум партии и со рејтинг-перформанс 2763 заврши втор на втората табла, зад олимпискиот првак, велемајсторот Таи Даи Ван Нгујен од Чешка со 2783, а бронзата му припадна на Едиз Ѓурел од Турција со 2755.
Пред 24-годишниот неготинец капитулираа велемајсторите Качпер Пјорун (рејтинг 2599) од Полска и Јаник Пелетје (2526) од Швајцарија, ИМ Аделард Баи (2378) од Тајван, ФИДЕ-мајсторите Диого Алјо (2192) од Зеленортските Острови и Рикардо Ернесто Чавез (2185) од Ел Салвадор, кандидат-мајсторот Џејмисон Едрих Као (2125) од Хонгконг и Коси Тиери Егбе (1847) од Того. Единственото реми го забележа против ВМ Јорден ван Хорест (2696) од Холандија.
Ова е четврти поединечен медал за Македонија на шаховските олимпијади по бронзениот на учителот на Лазов, ВМ Трајко Недев, во Ереван 1996 со 8 поени од 11 партии како резерва, златниот на ВМ Драгољуб Јаќимовиќ на третата табла во Истанбул 2000 со 7/9 и среброто на ВМ Владимир Георгиев на третата табла во Калвија (Шпанија) со 9/12.
Македонија во Будимпешта го освои 61. место во конкуренција на 188 машки селекции со 6 победи и 5 порази.
Златниот медал ѝ припадна на Индија, сребрениот на САД, а бронзениот на Узбекистан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Потер ја следи ситуацијата во Евертон, подготвен е да ја прифати понудата ако Дајч добие отказ
Поранешниот менаџер на Брајтон и Челзи, Греам Потер е подготвен да се врати на работа.
Потер пред 18 месеци го напушти Челзи, оттогаш се поврзува со бројни клубови како Кристал Палас, Ајакс, дури и со клупата на англиската репрезентација, но конкретни преговори не водел со ниту еден клуб.
Поранешниот тренер на Брајтон сега го следи расплетот на ситуацијата во Евертон и е подготвен да ја прифати понудата на клубот во случај Шон Дајч да добие отказ.
Евертон е изедначен на последното место во Премиер лигата со Вулверхемптон со само еден освоен бод и гол разлика 5:14.
Шон Дајч и претходно бил во слични ситуации, но секогаш наоѓал начин да се извлече.
Ако сега не му успее, Греам Потер е подготвен да го преземе великанот од „Гудисон“.
Во следното коло Евертон го пречекува Кристал Палас.
Спорт
(Видео) Билансот на „Виенскиот срам“, се бројат повредени полицајци
Големото дерби меѓу виенските ривали Австрија и Рапид мина во сенка на жестоко насилство на хулиганите на двата клуба.
Натпреварот заврши со победа на домаќинот Рапид (2:1), кој со тоа го зазеде првото место на табелата. Ден по дербито ретко кој зборува за играта, головите, убавите потези.
Според официјалниот полициски извештај, шестмина припадници на оваа служба биле повредени при големите немири кои се случиле на самиот терен, каде се судриле хулиганите на двата клуба.
Вкупно во текот на вечерта во болницата помош побарале девет лица.
Ситуацијата, да потсетиме, ескалира кога најжестоките приврзаници на Рапид, многумина со маски, истрчаа кон гостинската трибина, вооружени со стапови и пиротехнички средства, целосно подготвени за напад. Нивните соперници веднаш реагираа, па тој дел од теренот се претвори во вистинско бојно поле.
Австриските медиуми во преден план го потенцираат и отсуството на каква било реакција од страна на редарите, кои стоеја на страна и го следеа судирот на хулиганите“.
И полицијата не реагираше веднаш, туку тргна во акција неколку минути по најсилниот судир на хулиганите, што беше тема и на австриските медиуми.
„Поразот на виенскиот фудбал“ е можеби најдобриот опис на страниците на „Курир“ по се што се случи во неделата вечерта на стадионот Рапид.
22/09/2024 Austria 🇦🇹 Rapid Wien – Austria Wien pic.twitter.com/zDJLiFYirr
— 𝐂𝐚𝐬𝐮𝐚𝐥 𝐔𝐥𝐭𝐫𝐚 𝐎𝐟𝐟𝐢𝐜𝐢𝐚𝐥 (@thecasualultra) September 22, 2024
Спорт
Многу сум среќен, имав голема поддршка од тимот, изјави младиот шахист Лазов од ШК „Алкалоид“, кој се закити со сребро на Олимпијадата
Актуелниот државен првак на Македонија во шах и член на ШК Алкалоид, ИМ Тони Лазов, го постигна најголемиот успех во кариерата на Шаховската Олимпијада, која заврши во Будимпешта, освојувајќи сребрен медал за својот индивидуален настап на втората табла, со одличен рејтинг-перформанс (2763)!
Лазов игра во одлична форма последниве две години, при што претходната година на Европското екипно првенство освои велемајсторска норма, која и овојпат му беше на дофат. Со освоени извонредни 7,5 бода од 8 партии (со седум победи, од кои две извојувани на првата табла, и само со едно реми), тој се етаблираше како иден лидер на националната селекција. Воедно, на својот актуелен рејтинг од 2360 поени тој сега ќе додаде нови 33 освоени на Олимпијадата.
Откако го започна турнирот со уверливи победи против послабо рангираните селекции, во четвртото коло тој ремизираше со холандскиот велемајстор Јорден ван Форест (2696 рејтинг, триесет и петторангиран во светот), а за да влезе во игра за медал, пресудни беа победите над ВМ Јаник Пелетие (2526) од Швајцарија и над ВМ Каспер Пиорун (2599) од Полска.
„Многу сум среќен што успеав да освојам медал. Имав голема поддршка од тимот. Голема благодарност и до мојот тренер, ВМ Трајко Недев, кој ме подготвуваше за време на турнирот, и до мојот клуб ШК Алкалоид, кој секогаш ме поддржува“, изјави Тони Лазов.
Со овој успех 24-годишниот Лазов се приклучува кон „клубот на медалисти“, во кој досега беа тројца негови колеги од ШК Алкалоид: ВМ Драгољуб Јаќимовиќ има златен медал од Олимпијадата во Истанбул 2000 година на третата табла, ВМ Трајко Недев има бронза од Олимпијадата во Ереван 1996 година на четвртата табла, додека, пак, единствената дама во ова друштво е Весна Секуловска, чиј медал е освоен на Европското екипно првенство во Пловдив 2003 година, сребро на втората табла. Воедно, неговиот тренер ВМ Трајко Недев е единствениот кој има и сребрен медал од ЕП 2003 година, освоен на третата табла, и сребрен од Светското првенство за шахисти над 50 години 2023 година, на втората табла.
Тони Лазов е најмладиот носител на шаховски олимписки медал во Македонија, а кариерата ја започнува во шаховските школи на ШК Алкалоид, активно играјќи шах од својата 10-годишна возраст.
ИМ Тони Лазов беше единствениот член на ШК Алкалоид во составот на машката репрезентација на Македонија на оваа 45. Шаховска Олимпијада во Будимпешта. Тимот го стартуваше турнирот како 62-рангирана екипа, а во конечниот пласман заврши на 61. место од 188 екипи кои настапија. Репрезентативците имаа 6 победи и 5 порази и освоија 12 бода, еден повеќе од женската екипа.
Женската репрезентација беше 57-рангирана, а заврши на 77. место од 169 екипи славејќи 4 победи. Три средби завршија со поделба на поенот, а доживеа и 4 порази.