Регион
Aдвокатите по сведочењето на малолетниот убиец: од „Рибникар“: едно од најстресните рочишта во кариерата

Во Специјалниот суд заврши денешното рочиште од кривичната постапка против Милјана и Владимир Кецмановиќ, мајката и таткото на момчето, кое на 3 мај минатата година го изврши стравотниот масакр во основното училиште „Владислав Рибникар“. Продолжението на сведочењето на малолетниот убиец е закажано за 17 октомври, пренесуваат медиумите во соседството.
Дека денеска сведочеше малолетниот убиец, потврдија адвокатите, кои ја напуштија зградата на Специјалниот суд. Сепак, тие не сакаа да ги откријат деталите од неговата изјава.
„Преку прашањата што му беа поставени денеска не го дознавме мотивот и зошто тоа се случило, но мислам дека неговата денешна изјава оди во насока оти ќе се дознае. Неговото рочиште не е завршено и ќе продолжи на 17 октомври во истата зграда“, рече Огњен Божовиќ и додаде дека не смее да каже ништо повеќе со оглед на тоа што постапката е затворена за јавноста.
Адвокатката Зора Добричанин-Никодијевиќ по судењето изјави дека е задоволна од денешното рочиште и од сето она што денеска го дознале при сведочењето на момчето убиец.
„За време на сведочењето дознавме многу нови детали, но за тоа не можам и не сакам да зборувам“, изјави Зора Добричанин Никодијевиќ.
Ирина Боровиќ, која заедно со својот татко Боривој Боровиќ ги застапуваа Милјана и Владимир Кецмановиќ, по рочиштето изјави дека јавноста најмногу ја интересираат причините поради кои се случил овој трагично неразбирлив настан.
„Во оваа кривична постапка, ниту во која било друга постапка што се води во овој момент, ниту во оваа судница, ниту на кое било друго место, ние нема да ја дознаеме причината за овој трагичен настан. Сите причини се длабоко некаде во душата на тоа момче, кое, за жал, извршило злосторство, а пред тоа живеело сосема нормален и обичен живот од гледна точка на сите што го познаваат“, изјави Ирина Боровиќ.
Судењето беше затворено за јавноста, а ова беше првпат малолетниот убиец да ја напушта специјализираната детска установа во која се наоѓа од 3 мај минатата година. Тој денеска околу 9 часот со болничко возило на брзата помош во придружба на полиција бил донесен во судот.
Тој не одговара кривично за делото што го сторил на 3 мај минатата година бидејќи во моментот на делото имал 13 години.
Медиумите потстеуваат дека татко му Владимир Кецмановиќ е обвинет дека сторил тешко кривично дело против општата безбедност, со оглед на тоа што детето 13 години го носел на стрелиште и го учел да пука, оружјето не го чувал соодветно, а го имал во својот дом.
Мајката на момчето се товари за кривично дело недозволено држење, носење и тргување со оружје имајќи предвид дека нејзината ДНК-трага е пронајдена на еден од патроните во училишната училница, како и на лентата за коса со која било врзано шишето во кое нејзиниот син го правел „молотовиот коктел“, се наведува во написите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Додик шест години не смее да врши јавна функција: бара помош од Трамп, Орбан и руската амбасада се на негова страна

Судот на Босна и Херцеговина соопшти дека претседателот на Република Српска (РС) Милорад Додик нема да може да извршува никаква јавна функција шест години, не само претседателската, според пресудата.
Лидерот на српскиот ентитет во Босна и Херцеговина е осуден на една година затвор и шестгодишна забрана за политичка активност поради неспроведување на одлуките на високиот меѓународен претставник Кристијан Шмит, пресуда што Додик ја отфрла.
Судот на БиХ првично објави дека Додик нема да може да биде претседател на РС шест години, а потоа испрати ново соопштение во кое објаснува дека оваа одлука, со оглед на промените во законот што ги наметна Шмит, вклучува и забрана за вршење на сите други функции што вклучуваат јавни пари.
Буквалното толкување на ова вклучува и забрана за извршување на функцијата претседател на владејачката СНСД ако партијата на Додик се финансира од буџетот.
Додик во меѓувреме побара меѓународна поддршка и го тагираше американскиот претседател Доналд Трамп на профилот на X, цитирајќи ги неговите зборови од 2024 година во кои повика на прекин на прогонот против него во САД. Тој го спореди својот случај со она што го доживеа Трамп, нагласувајќи дека тој, исто како Трамп, е жртва на политички прогон.
Руската амбасада во БиХ ја оцени пресудата како политичка и го нарече високиот меѓународен претставник „узурпер“.
„Затоа сите пресуди засновани на наводи за наводно кршење на одлуката на високиот претставник не се законски, туку чисто политизирани. Целата одговорност за евентуалната дестабилизација на внатрешнополитичката ситуација во земјата е на промоторите на оваа политичка акција“, соопшти амбасадата.
Унгарскиот премиер Виктор Орбан, исто така, го поддржа Додик, велејќи дека треба да се почитува одлуката на народот на РС кој го избра Додик за свој претседател.
It’s time for everyone to respect the decision of the PEOPLE of Republika Srpska, who elected @MiloradDodik as their President.
There is no place for legal witch-hunts in a democracy.
— Orbán Viktor (@PM_ViktorOrban) August 1, 2025
„Нема место за легален лов на вештерки во демократијата“, напиша Орбан на X.
Фото: ЕПА
Регион
Словенија воведе ембарго на оружје кон Израел

Словенечката влада на вчерашната седница, по предлог на премиерот Роберт Голоб, донесе одлука со која се забранува извоз и транзит на воено оружје и опрема од или преку Словенија за Израел. Исто така, се забранува и увоз на оружје од Израел.
Со оваа одлука Словенија стана првата европска држава што воведува целосна забрана за увоз, извоз и за транзит на оружје поврзано со Израел, истакнаа од кабинетот на премиерот, пренесе „Н1 Словенија“.
Откога Словенија пред две недели ги прогласи израелските министри Безалел Смотрич и Итамар Бен-Гвир за непожелни личности, владата донесе нови санкции против Израел поради насилството и кршењето на човековите права на Палестинците во Појасот Газа и на Западниот Брег.
Новата одлука следува по најавите на премиерот Голоб, кој повеќепати порача дека Словенија ќе дејствува самостојно доколку ЕУ не усвои конкретни мерки до средината на јули.
„Европската Унија, поради внатрешни несогласувања и неединство, моментно не е способна да ја исполни оваа задача“, соопшти словенечката влада.
„Луѓето во Газа умираат бидејќи системски им се оневозможува пристап до хуманитарна помош. Умираат под урнатини, без пристап до пивка вода, храна и основна здравствена нега. Станува збор за целосно блокирање на хуманитарниот пристап и свесно спречување на основните услови за преживување. Во вакви околности должност е на секоја одговорна држава да дејствува, дури и ако тоа значи да чекори пред другите“.
Словенија, како што се наведува, доследно и принципиелно се залага за почитување на меѓународното право и заштита на човековите права. Владата најави дека во следните недели ќе подготви дополнителни национални мерки против актуелната израелска влада, чиј начин на дејствување претставува сериозно кршење на меѓународното хуманитарно право.
Министерството за надворешни работи на Словенија во четвртокот ја повикало израелската амбасадорка во Љубљана, Рут Коен-Дар, на разговор и ѝ доставило протест поради неодржливата хуманитарна катастрофа во Газа, предизвикана од ограничувањето на пристапот до итна хуманитарна помош.
Регион
(Видео) Од топлотен бран до бури: силно невреме во Солун и на Халкидик

Силното невреме што го погоди Солун во четвртокот наутро предизвика проблеми кај населението.
Обилните дождови ги претворија главните патишта во реки, а локалните извештаи покажуваат дека шахтите пукнале под притисокот на водата, објавува „Товима“.
Πλημμύρισε το κέντρο της Θεσσαλονίκης και οι δρόμοι γύρω από το Βαρδάρη#tanea #taneagr #news #rain #βροχη #kairos #καιρος #weather #thessaloniki #skg #viral #summer #fyp pic.twitter.com/eYTi1EDe7y
— TA NEA (@ta_nea) July 31, 2025
Мотоциклист е повреден кога изгубил контрола на лизгава улица во центарот на градот, поточно на прометната авенија Цимиски.
Според анализите на феноменот преку страницата Weather Analysis на „Фејсбук“, за помалку од еден час се забележани 37 литри дожд на квадратен метар, количина што одговара на просечните вкупни врнежи од дожд за цел јули, пренесува медиумот.
Службите за цивилна заштита се во состојба на готовност бидејќи слични временски услови се очекуваат и во наредните денови според прогнозите, објавува grtimes.gr.
Обилни врнежи од дожд се регистрирани во Солун, на Халкидик и во Кукуш, како и на планинските делови во Епир, Тесалија, Спорадиските Острови и во некои делови од Тракија.
Фото: принтскрин