Македонија
Преку проект ќе се утврдуваат причините зошто жените над 50 години не може да најдат работа
На 29 октомври, со почеток во 10 часот, во просториите на Економскиот институт – Скопје, ќе биде означен почетокот на проектот: „Идентификување на причините за долгорочната невработеност на постарите жени во Северна Македонија и Србија“, кој се реализира во рамките на програмата Visegrad+ Grants (2xV4 + 2xWB6/EaP) како дел од повикот за акциски грантови за 2024 година во областа на јавната политика и институционалните партнерства.
Проектот почна со реализација на 1.10.2024 година и ќе трае до 31.3.2026 година. Во реализација на овој проект се вклучени четири високообразовни и научни институции од четири европски држави:
– Економски институт – Скопје, единица на УКИМ, Република Северна Македонија
– Институт за економски науки од Белград, Република Србија
– Институт за економски истражувања на Академијата на науките од Словачка
– Универзитет за информациски технологии и менаџмент од Рзесов, Полска
Целта на проектот е да се идентификуваат причините кои ги спречуваат жените на возраст од 50 и повеќе години да најдат работа. Вакво истражување ќе биде спроведено и во Србија, додека искуствата на Словачка и Полска ќе бидат искористени да се предложат решенија, мерки и политики со кои би се зголемила вработливоста на оваа категорија на жени. Истражувањето во проектот ќе биде насочено кон проблемите на долгорочно невработените жени стари 50 и повеќе години во Скопскиот и Белградскиот регион.
Проектот „Идентификување на причините за долгорочната невработеност на постарите жени во Северна Македонија и Србија“ нуди уникатна можност преку анкетен прашалник и фокус групи со дел од овие жени, пореално да се утврдат проблемите со кои се соочуваат невработените жени на возраст од 50 и повеќе години, причините за нивната долгорочна невработеност, идентификување на недостатокот на вештини, како и други релевантни аспекти кои би биле значајни за развој на соодветни стратегии, програми и мерки со кои би се овозможило ублажување на неповолната ситуација на овие жени. Тоа би го постигнале првенствено со нивно учество како корисници на овој проект, а потоа и преку зголемување на свесноста за проблемите и потребите на овие жени меѓу релевантните стеикхолдери.
Целни групи во проектот се:
– Долгорочно невработените жени на возраст од 50 и повеќе години на локалните пазари на работна сила во Скопскиот и Белградскиот регион.
– Релевантни стеикхолдери како што се: Министерството за труд и социјална политика, Агенцијата за вработување на РСМ, Организацијата на работодавачи, локалните стопански комори, невладините организации кои се занимаваат со проблемот на невработеност на ранливите групи и други.
Планирани активности и очекувани резултати од проектот:
– Анкетно истражување на примерок од околу 150 невработени жени на возраст од 50 и повеќе години;
– Фокус група со невработени жени постари од 50 години за дополнително да се идентификуваат проблемите со кои се соочуваат жените во процесот на барање на работа, причините за недоволната мотивираност да бараат работа, како и за недостатокот на соодветни вештини;
– Фокус група со релевантните стеикхолдери за подобро да се разбере каде е најголема неусогласеноста во вештините што ги поседуваат овие жени и вештините кои ги бараат работодавачите, како и да се утврдат другите бариери кои постарите жени треба да ги надминат за да најдат и да задржат вработување;
– Тркалезна маса на која ќе бидат претставени резултатите и сознанијата од анализата на квантитативните и квалитативните податоци добиени од спроведената анкета и организираните фокус групи;
– Работилница на која ќе бидат презентирани примери на добра пракса и знаење во однос на политиките и мерките во Словачка и Полска за подобрување на перспективите за вработување на ранливите групи, со посебен акцент на оние кои се однесуваат на невработените жени постари од 50 години;
– Сублимиран извештај врз основа на добиените сознанија од сите активности кои се предвидени во текот на проектот. Во него, освен добиените резултати од реализација на целокупниот проект, ќе бидат сумирани и соодветни предлози, мерки и препораки во однос на активните политики и мерки на пазарот на работна сила, кои Министерството за труд и социјална политика и Агенцијата за вработување на Република Северна Македонија би можеле да ги искористат при креирање на идните политики и активности во овој домен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Инспекторите влегоа на скопскиот пазар за стари работи, запленета небезбедна храна
Околу 100 килограми небезбедна храна запленија и уништија утрово инспекциските служби на Агенцијата за храна и ветеринарство (АХВ) во рамки на спроведениот вонреден инспекциски надзор на пазарот за стари работи познат како бувљак, во скопската населба Маџари.
Запленета и нештетно уништена е небезбедна храна (чипсови, чоколадни бонбони, наполитанки, конзерви со месен нарезок, кроасани и други производи ) се продавала од физичко лице во несоодветни услови (на отворено), со поминат рок на употреба и без познато потекло, за што е изречена парична казна.
Агенцијатаа апелира до граѓаните да бидат свесни и одговорни потрошувачи и храна да купуваат исклучиво од одобрени/регистрирани оператори од АХВ кои се под надзор на инспекциските служби на Агенцијата, бидејќи производите кои се продаваат на диво, од нерегистрирани оператори, најчесто од физички лица може да бидат небезбедни.
Македонија
Меџити: Подготвени сме да се соочиме со предизвиците во животната средина
Првиот заменик-претседател на Владата и министер за животна средина Изет Меџити денеска учествуваше на панел дискусијата „100% посветени за тебе” на која кој се осврна на најактуелните прашања во животната средина.
Меџити во своето обраќање истакна дека Министерството за животна средина и просторно планирање и Владата се соочуваат со бројни предизвици во животната средина во време на енергетска криза, децениско загадување на амбиенталниот воздух, отстранување на историскиот отпад, справување со проблемите на управувањето со отпадот, обезбедување на инфраструктура за водоснабдување, одведување на отпадни води и нивно пречистување и заштита на природните вредности и биодиверзитетот.
„Нашата неприкосновена определба е обезбедување одржлив развој и членството во ЕУ и на тој пат мора да покажеме подготвеност за имплементирање на високите европски стандарди во оваа област, која бара многу работа, интерсекторска соработка и многу финансиски средствата“, рече Меџити, нагласувајќи дека министерството и Владата се подготвени да се соочат со предизвиците во животната средина.
Меџити се задржа на два најактуелни проблеми, загадувањето на воздухот и воспоставувањето на системот за регионално управување со отпад.
„За справување со загадувањето на воздухот делуваме во повеќе насоки согласно дефинираните мерки пропишани во националните и локалните плански документи, а тоа се замена на нееколошки системи за греење, намалување на емисиите од сообраќајот, намалување на емисиите од стационарните извори, подобрување на енергетската ефикасност, заштеда на енергија и користење на обновливи извори на енергија, намалување на емисиите од отпадот“, рече Меџити.
Нагласи дека министерството со средства од националниот буџет, од Европска Унија и други билатерални донатори активно работи на модернизација, обнова и проширување на Државниот мониторинг систем за квалитет на амбиентален воздух и тој е во добра кондиција.
Потсетувајќи дека со децентрализацијата најголемиот дел од оперативните зафати се обврска на локалните самоуправи, вклучително и справување со изворите на загадувањето на воздухот, Меџити истакна дека министерство ги подржува Единиците на локална самоуправа во подготовката на Плановите за квалитет на воздух што е нивна законска обврска.
Исто така, преку Програмата за инвестиции во животната средина финансираше и изработка на катастри на загадувачи на воздухот за седумнаесет општини, кои што овозможуваат идентификација на изворите на загадување на воздухот и утврдување на количините на емисии на загадувачки супстанци во воздухот, што е предуслов за приоретизација на мерките за намалување на аерозагадувањето.
Поддршка се обезбедува и од меѓународните донатори и агенции. Во тек е изработка на планови за квалитет на воздух за Струмица и ажурирање на плановите за Куманово, Кавадарци, Гостивар и Струга во рамките на проектот „Справување со загадувањето на воздухот“ имплементиран од страна на УНДП, а во рамки на ИПА 3 проектот „ЕУ за Чист воздух“, чија главна цел e да придонесе за намалување на загадувањето на воздухот во Северна Македонија и намалување на ризиците по здравјето на луѓето, односно да се подобри квалитетот на воздухот во четири големи градови во Северна Македонија (Скопје, Битола, Тетово и Куманово), се предвидени следните активности: промена на системите за греење во 70 јавни објекти во четири општини.
Дополнително, во време на грејната сезона кога редовно се забележува зголемена концентрација на загадувачки супстанци во воздухот, Министерството заедно со Државниот инспекторат за животна средина планира спроведување вонредни и континуирани посети на индустриските капацитети за кои МЖСПП има издадено А-Интегрирана еколошка дозвола со цел да се зголеми внимателност при исполнувањето на обврските од дозволите.
Во делот посветен на активностите за воспоставување на регионалните системи за управување со отпад, првиот вицепремиер и министер за животна средина Меџити нагласи дека справувањето со отпадот како едно од најактуелните прашања е возможно исклучиво со поставување и профункционирање на регионалниот систем за управување со отпад. Согласно националните политики и стратешки плански документи во државата ќе се воспостават 5 регионални системи за управување со отпад.
Со поддршка на Европската Унија, направен е исчекор напред во Источниот и Североисточниот регион и неодамна е објавен оглас за јавна набавка за изградба на централна постројка за управување со отпад и изградба на 6 претоварни станици за овие региони.
„За крај ќе напоменам дека течат фазите за затварање на нестандардните депонии, а во тек е набавка на опрема за собирање на отпад и возила и за другите региони“, истакна Меџити.
Македонија
Општина Кисела Вода го доби најголемиот парк на шахот во Македонија
Нов модерен парк добија жителите на општина Кисела Вода. “Паркот на шахот”, лоциран во населбата 11 Октомври Бараки, се протега на 4000 м2. На просторот кој до неодамна беше дива депонија, сега жителите на општината добија за себе катче со современа урбана опрема, хортикултурно и партерно уредување, а во центарот на паркот се поставени статуетки-шаховски фигури, крал и кралица. Воедно, за шахистите и љубителите на шахот ќе има маси со шаховски табли, информираат од општината.
– Со особено задоволство денес го отвораме новиот модерен „Парк на шахот“ во населбата 11 Октомври Бараки, кој се простира на површина од 4000 м². Наместo дивата депонија која тука постоеше, сега жителите на нашата општина добија прекрасно уредено катче, опремено со современа урбана опрема, хортикултурно уредување и шаховски маси, каде што љубителите на шахот ќе можат да уживаат во оваа интелектуална игра. Во самиот центар на паркот се поставени и шаховски статуетки на кралот и кралицата, симболизирајќи го значењето на шахот како игра која го поттикнува умот и развива стратегиско размислување.
Посебна благодарност упатувам до Шаховската федерација на Македонија и нејзиниот претседател, Саша Богдановиќ, за севкупната поддршка при реализацијата на овој проект. Ова партнерство е пример за тоа како заедно можеме да создадеме нешто вредно и трајно, нешто што ќе го збогати секојдневието на нашите граѓани.
Шахот, како игра на стратегија и размислување, носи многубројни придобивки – ги развива когнитивните способности, го зголемува фокусот и ги стимулира аналитичките вештини. Силно верувам дека ова ќе биде место за дружење, рекреација и опуштање за сите генерации, посебно шахистите и љубителите на шахот, кои сега ќе можат да уживаат во масите со шаховски табли, поставени специјално за нив.
Претворањето на поранешната депонија во зелен парк не е само голем естетски придонес, туку и важен еколошки момент, значаен за подобрување на квалитетот на животната средина во општината, а со тоа и за создавање на поубаво секојдневие за сите нас. Ова е уште еден пример за тоа како може да се трансформира едно некогаш запоставено место во простор за релаксација, дружење и забава, и сакам да најавам дека ваквите проекти ќе продолжат и во иднина.
Апелирам до сите жители совесно да се однесуваат кон новопоставената урбана опрема и зеленило, бидејќи само заеднички можеме да ја зачуваме и одржуваме оваа нова локација во општина Кисела Вода создадена за дружење и релаксација“, рече градонаќалникот.