Македонија
Трговците се алчни, во септември ги покачија цените за во октомври да ги намалат и да останат со истиот профит по замрзнувањето на маржите, вели Трендафилов
Вклучување на Сојузот на синдикати при креирање на мерките кои Владата ги носи за да им олесни на граѓаните и зголемени контроли на Државниот пазарен инспекторат, побара денеска претседателот на Сојузот на синдикати на Македонија, Слободан Трендафилот. Тој смета дека последната мерка за замрзнување на маржите на основните продукти не го олесни животот на граѓаните оти трговците ја изиграле.
„За жал, трговците го искористија периодот кога Владата најавуваше дека ќе се донесе ваква мерка и што направија? Прво ги зголемија цените и минималната синдикална кошничка во делот на растот на трошоците за храна и за пијалаци беше зголемен за некаде околу 750 денари за месец септември. Сега, за месец октомври, се намалени за 960 денари. Тоа значи трговците беа алчни, на грбот на работниците повторно се обидуваат да заработуваат и зголемените цени, кои ги зголемија во септември, само ги намалија во октомври и повторно останаа со истиот профит кој го имаа. За жал во Македонија можеме да гледаме само зголемување на алчноста на трговците на штета на граѓаните и на работниците и сметам дека Владата треба да преземе навистина поригорозни чекори за да ги спречи ваквите појави“, рече претседателот на ССМ, Трендафилов.
ССМ очекува ограничувањето на маржите согласно Законот за нефер трговски практики да профункционира, ни за тоа не се големи оптимисти.
„Тоа што го гледаме на терен е дека е навистина слаб настапот на Инспекторатот, не поради тоа што не сакаат туку поради тоа што имаат многу мал број луѓе кои треба да исконтролираат огромен број трговци. Сметаме како ССМ дека треба да бидеме вклучени во начинот на креирање на новите мерки кои ќе ги креира Владата за ограничување на маржите имајќи предвид дека две третини од тоа што го предвиделе е од синдикалната минимална кошничка, а ние ја пресметуваме и знаеме најдобро што е потребно“, порача Трендафилов.
На крајот на месецов истекува мерката за замрзнати маржи на основните прехранбени продукти од есенската потрошувачка кошничка што ја одреди Владата. Министерот за економија и труд, Бесар Дурмиши, за разлика од ставот на ССМ, смета дека есенската кошничка дала ефект.
„Одредени производи се намалени од 5 до 10 отсто. Имаше одредени производи на кои цените се намалени малку или воопшто не, како лебот, млекото и маслото за јадење, но имаше и производи каде што цените се намалени повеќе од 10 отсто. Такви се месото, зеленчукот, млечните производи, кашкавалот, сирењето и така натаму. Тоа го кажа и Синдикатот, според нивната потрошувачка кошничка во октомври цените за храна и пијалаци се намалени за 935 денари. Одлуката на Владата дава резултат и се чувствува по џебот на граѓаните“, рече денес министерот Дурмиши.
Доколку од следниот месец, по истекот на мерката цените драстично се покачат и тоа го потврди Државниот пазарен инспекторат, министерот Дурмиш вели дека ќе донесат поригорозни мерки. До крајот на годинава тој најави дека по Законот за нефер трговски практики ќе се даваат предупредувања до трговците кои ќе ги покачуваат цените, а од Нова година ќе има и казни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николовски – Стамнова: Со еден клик Централниот регистар ќе има евиденција за царински долг
Царинската управа и Централниот регистер ги интензивираат активностите потребни за надградба на едношалтерскиот систем на Централниот регистар при што Царинската управа ќе им овозможи електронски пристап до базата на податоци за платени увозни давачки.
Ова беше главната тема на денешниот состанок помеѓу директорот на Царинска управа, Бобан Николовски и директорката на Централен регистар, Анита Стамнова.
Интенцијата е граѓаните и фирмите да не мораат да доаѓаат во Царинска управа да вадат потврди дека немаат доспеан неплатен долг по основ на царина и други увозни давачки коишто им се потребни при уписи во Централниот регистар.
Директорите истакнаа дека ваквите активности се во насока на подобрување на условите за водење бизнис при што и двете институции ќе работат на унапредување и олеснување на постапките преку нивна целосна дигитализација.
Македонија
Филков во работна посета на КПД Струга, се реактуелизира идејата за женски затвор
Министерот за правда Игор Филков беше во работна посета на КПД Струга кој е од отворен вид при што од страна на директорот на затворот, Ардит Мустафаи беше запознат со условите, капацитетите, човечките ресурси и можностите за ресоцијализација и рехабилитација на осудените лица.
,,Остваривме работна средба, ги видовме состојбите, ги видовме капацитетите на затворот. Ја реактуелизиравме идејата за комплетно женски затвор со тоа што би се преадаптирале многу работи и цело женско одделение од затворот Идризово би се префрлило тука. Како идеја ја зборуваме некое време, се надеваме дека ќе наидеме на поддршка од сите партнери и ќе можеме набрзо да ја реализираме. Идејата за женски затвор значи комплетно женски, а затворениците од овде ќе бидат преместени во друг. Се договоривме да се изготви проект и тогаш ќе знаеме колку финансии ќе се потребни, рече Филков, посочувајќи дека во ниеден затвор во државата состојбите не се најдобри и не е вложувано со децении”, изјави министерот за правда Игор Филков.
КПД Струга има капацитет за 60 лица, а во моментов 21 лице издржуваат затворска казна. Со оглед на тоа што станува збор за затвор од отворен вид, на осудените лица им е овозможено да бидат работно ангажирани. Идејата е да се пристапи кон изготвување на проект со цел да се утврдат финансиските импликации, затворот целосно да се пренамени за потребите на женската затвореничка популација. На овој начин се стремиме кон зголемување на безбедноста на затвореничките и целосно дистанцирање од проблемите со кои се соочуваат во КПУ Идризово. Воедно, постојните затвореници од Струга ќе бидат прераспоредени во други затворски установи, велат од Министерството за правда.
Македонија
Македонија ќе биде домаќин на Балканскиот форум на уставните судови во 2026 година
Претседателот на Уставниот суд, Дарко Костадиновски и судијката Татјана Васиќ-Бозаџиева денеска учествуваа на работен состанок со членовите на Балканскиот форум на уставни судови.
Учесниците го разработија Статутот на организацијата, изготвија планови за структурата на Форумот, идентитетот и неговото влијание во државите, начинот на финансирање и воспоставување на контакти за координација на активностите од секој суд.
Донесена е одлука следната годишна конференција да се одржи во Република Турије, а Република Северна Македонија да биде домаќин на Балканскиот форум на уставни судови во 2026 година.
На состанокот учествуваа претседатели и судии на уставните судови од Балканот кои се членки и набљудувачи на организацијата, меѓу кои и претставници од судовите во Босна и Херцеговина, Бугарија, Туркије, Албанија, Косово.
Со оваа активност делегацијата од Уставниот суд на Република Северна Македонија го завршува учеството на Втората годишна конференција на Балканскиот форум на уставни судови.
Во рамки на одржувањето на овој настан во Приштина беше одбележан и 15 годишниот јубилеј од основањето на Уставниот суд во Косово.