Во време кога животниот стандард на граѓаните е сериозно загрозен, а трошоците за живот се зголемуваат, СДСМ ја обвини Владата за неефикасни мерки и погрешни економски политики кои на крајот ги плаќаат обичните граѓани. Според партијата, ДПМНЕ не прифатила ниту еден од предложените мерки за подобрување на животниот стандард, вклучувајќи ги и законот за покачување на минималната плата, амандманите за зголемени плати и укинување на ДДВ за храна.

„ДПМНЕ не прифати ниту една наша предлог мерка за подобрување на животниот стандард. Со тоа, ги одбија нашите напори да им помогнеме на граѓаните во време кога нивниот економски стандард се влошува. Мицкоски и неговата влада наместо да понудат реални решенија, ги оставија граѓаните да се борат со растот на цените, додека трговците се збогатуваат“, вели Кристина Костова од СДСМ.

Трошоците за живот се значително зголемени, а според податоците на СДСМ, едно четиричлено семејство во моментов има потреба од 62.021 денар за да може да го покрие месечниот буџет, додека истовремено сметките за струја се зголемени за една третина во однос на минатата година.

„Не знаеме како, со минимална плата од 22.567 денари, дури и двајца членови на едно семејство можат да преживеат. Мицкоски треба да одговори на ова прашање, затоа што одговорноста за овие тешки економски услови лежи на него и неговата влада“, додава Костова.

Додека СДСМ продолжува да се бори за покачување на минималната плата, Мицкоски најави новогодишна кошничка со пониски цени на прехранбените производи, но како што велат од партијата, трговците имаат време да ги зголемат цените, оставувајќи ги граѓаните без реална корист.

„Јасно е дека кошничката на граѓаните ќе остане празна, додека трговците ќе ги наполнат своите каси. Владата треба да понуди конкретни мерки, а не празни ветувања“, вели Костова.

СДСМ повика на итно зголемување на минималната плата и отфрлање на ДДВ-то за храна, како решенија кои ќе им помогнат на сите граѓани. Според партијата, растот на минималната плата до 500 евра е морална и економска потреба.

„Веќе сега, со ова темпо на раст на трошоците за живот, сме на ивица на економска криза. За 2025 година, минималната плата мора да се зголеми на 500 евра за да се заштити стандардот на граѓаните и работниците“, изјави Костова.

СДСМ најавува дека нема да отстапи од својата борба за посигурен и квалитетен живот за граѓаните, со што се обврзува на понудување реални решенија и мерки за економски напредок.

Поранешниот директор на ТИРЗ, Јован Депостовски, им честита на „Авеста Батерис енд Инжинеринг“ (АБЕЕ) за официјалниот почеток на градежните работи во ТИРЗ Кичево.

Деспотовски вели дека особено го радува што реализацијата на проектот се одвива според договорените рокови од Договорот за инвестиција, кој беше потпишан во мај 2023 година.

„Оваа инвестиција, со вкупна вредност од 40 милиони евра, претставува важен чекор за развој на регионот, носејќи над 600 нови работни места за нашите сограѓани. Ваквите проекти имаат директно влијание врз подобрување на животниот стандард на населението и отвораат нови перспективи за локалната економија. Она што е особено позитивно е дека новата Влада го продолжува тоа што го започнавме. Континуитетот во реализацијата на вакви стратешки инвестиции е клучен за просперитетот на нашата земја. Ова покажува дека кога во работата ја ставате Македонија на прво место, придобивките се за сите граѓани“, вели Деспотовски.

Тој посакува успешна и брза реализација на овој проект, со надеж дека ќе биде пример за многу други инвеститори кои веќе ја препознааваат Македонија како стабилна и атрактивна бизнис дестинација.

Претходно денес во присуство на премиерот, Христијан Мицкоски, беше поставен камен-темелникот за изградба на фабриката за електронски батерии за автомобили во ТИРЗ Кичево. Очекувањата се 600 нови вработувања и извоз до половина милијарда евра.

Северна Македонија има пензиски дефицит и без реформа, тој уште повеќе би се зголемил, оценува Светската банка во новиот извештај „Преглед на јавни финансии на Северна Македонија: Обезбедување стабилност и зајакнување на отпорноста“.

За справување со овие предизвици, се предлагаат повеќе политики за намалување на пензискиот дефицит во услови на општество што се повеќе старее.

Тие опфаќаат укинување на неодамна воведениот модел на индексирање според цените и платите (т.н Швајцарски модел) и враќање на претходното индексирање согласно индексот на цени на мало, постепено зголемување и изедначување на возраста на пензионирање на мажите и жените и постепено зголемување на стапката на придонесот, се вели во извештајот, што го пренесе Радио Слободна Европа.

Неодамна Фискалниот совет до Собранието достави Мислење со кое бара во 2026 година да се зголеми старосната граница за одење во пензија на 67 години за мажи и жени. Фискалниот совет смета дека буџетската дупка во Фондот за пензиско и инвалидско осигурување е голема, а линеарните зголемувања од 2500 денари ќе придонесат Фондот на долг период да не биде одржлив.

Во делот на даноците, Светската банка предлага зголемување на стапката на ДДВ од сегашните 18 на 19 проценти и отстранување на повластената стапка за сите стоки, освен за основните производи.