Властите во Газа соопштија дека во израелски воздушен напад загинале пет палестински новинари пред болница, но израелската војска објави дека нападналa возило со милитанти на Исламскиот џихад.

Лекарите соопштија дека најмалку 21 лице загинало во израелските воздушни напади врз палестинската енклава додека Хамас и Израел меѓусебно се обвинуваат за одложување на постигнувањето договор за прекин на огнот.

Синдикатот на палестинските новинари објави дека пет новинари од каналот Ал-Кудс Тудеј биле убиени во еден напад пред болницата Ал-Авда во бегалскиот камп Ал-Нусеират во центарот на Газа.

Повеќе од 190 палестински новинари се убиени од почетокот на војната во октомври 2023 година. Израелската армија објави дека „извршила прецизен удар врз возило со терористичката група Исламски џихад во областа Нусејрат“.

Израел редовно ги негираше нападите врз новинарите и тврди дека презема чекори за да избегне напади врз цивили.

Групата Исламски џихад, која е поддржана од Иран и е сојузник на Хамас, се приклучи на борбите против Израел во октомври 2023 година.

.

Претседателот на Сенатот на Казахстан, Маулен Ашимбаев, денеска изјави дека ниедна земја чии граѓани загинале во авионската несреќа над казахстанскиот град Актау нема намера да ги скрие информациите.

„Ниедна од овие земји, ниту Азербејџан, ниту Русија, ниту Казахстан, не се заинтересирани да скријат информации. Сите информации ќе бидат достапни на јавноста“, рече Ашимбаев.

Тој истакна дека причината за падот на авионот на „Азербејџан ерлајнс“ сè уште не е позната, пренесува „Ројтерс“.

Азербејџанскиот авион, кој летал од Баку за Грозни, се урна во средата наутро во близина на градот Актау во западен Казахстан, при што во несреќата загинале 38 лица.

Според првичните информации, меѓу жртвите се и двајцата пилоти на авионот.

Во авионот имало вкупно пет члена на екипажот и 62 патници, меѓу кои 16 Руси, 37 државјани на Азербејџан, шест од Казахстан и тројца од Киргистан.

Прес-службата на азербејџанскиот претседател Илхам Алиев соопшти дека авионот го променил курсот поради лошите временски услови, а до несреќата дошло при слетување во Актау.

Алиев нагласи дека постојат разни верзии за она што се случило и повика да се чека да се заврши истрагата, а меѓу другото, има информации дека авионот удрил во птици.

По објавената снимка од соборениот авион, на која се гледаат дупки од шрапнели, се појавија шпекулации дека авионот можеби бил погоден од противвоздушен оган.

Делови од Босна и Херцеговина сè уште се отсечени од светот и без струја поради снежните наноси, а голем број патишта во таа земја сè уште се непроодни за целиот сообраќај, известија службите задолжени за итни интервенции.

Најтешка е состојбата во северозападните и северните делови од земјата, а особено се погодени општините Дрвар, Кнежево, Лопар и Угљевиќ.

„Селата се блокирани“, изјави градоначалникот на Кнежево, Горан Боројевиќ, за локалните медиуми предупредувајќи дека верува оти има ранливи жители со кои нема комуникација.

Според податоците на РХМЗ РС, во Кнежево висината на снегот е 110 сантиметри, но мештаните велат дека наносите се многу поголеми и дека достигнуваат висина и од три метри.

„Сè е блокирано. Ситуацијата е тешка. Градот некако го исчистивме, струја немаме, вода засега има. Имаме тројца загинати, колку што знам. Меѓутоа, проблемот е што многу села немаат сигнал, ние воопшто немаме врска со нив и не знаеме што се случува таму и дали има итни случаи“, рече началникот.

Градовите и населбите во областа Шемберија и Мајевица трет ден се без струја откога снегот го оштети далноводот во тоа подрачје и екипите за поправка не може да стигнат до столбовите поради обилниот снег.

Автомото-клубот на Босна и Херцеговина (БИХАМК) соопшти дека поради снег целосно се затворени патиштата од Бихаќ кон Босански Петровац и Кључ, како и од Дрвар кон Босански Петровац и Гламоч.

Забранет е целокупниот сообраќај на возила и на релациите Гламоч – Млиниште и Купес – Ново Село. Прекината е и трасата од Бања Лука до Кнежево, како и од Котор Варош до Теслиќ.

Сообраќајот за камиони е забранет на низа други патни правци, особено на оние што минуваат низ планинските превои.

Слаб снег денеска падна во делови од Босна и Херцеговина, а состојбата се очекува да се подобри од утре кога се прогнозира дека врнежите ќе престанат и времето ќе се разведри.

Селото Пепелари, кое се наоѓа во близина на Зеница, четврти ден е целосно отсечено од остатокот од светот поради обилните снежни врнежи.

„Кликс.ба“ пишува дека висината на снегот надминува еден метар, а засега никој не презел конкретни мерки за пробивање до селото. Жителите се очајни, особено поради фактот што во селото живеат голем број болни и стари лица, на кои итно им е потребна помош.

Утрово, со теренско возило со помош на мештанин била евакуирана постара жена од селото. Сепак, остатокот од речиси 300 жители, меѓу кои има и деца, сè уште е отсечен.

Селото четири дена е без струја, а мештаните велат дека од војната не биле во таква изолација. Од ден на ден расте паниката кај жителите, а патните служби на Град Зеница сè уште не се дојдени да го направат патот прооден.

Екипата за брза помош од Бања Лука четири часа се бореше со снегот за да стигне до детето чиј живот беше во опасност.

Оваа информација на „Фејсбук“ ја објави еден од работниците на итната служба, кој рече дека не се откажуваат, без оглед на невозможните услови. На крајот, успеале да му ја укажат потребната помош.

„Пример за луѓе што покажаа најголем степен на хуманост и дружељубивост се медицинските лица од Бања Лука, кои поминаа четири часа низ снегот за да стигнат до дете што било приклучено на респиратор, а сето тоа кога снемало струја поради лошото време“, изјави вработен во итната помош.