Министерството за надворешни работи и надворешна трговија на Република Северна Македонија силно ја осудува објавата на лидерот на бугарска политичка партија Преродба, Костадин Костадинов, и актуелен пратеник во Народното собрание на Бугарија, на социјалната мрежа Facebook, со која изразува јасни територијални претензии кон нашата држава.

„Таквите злонамерни изјави на официјални личности од бугарската политичка сцена се директен напад на суверенитетот, интегритетот и независноста на нашата држава, и истовремено се во директна спротивност со правилата и принципите на меѓународното право, немешањето на државите во нивните внатрешни работи и политиката на градење на добри меѓусоседски односи.

Ваквата недолична изјава на Костадинов, очекуваме од официјална Софија да биде отфрлена како непримерна на духот и времето во кое живееме, европските стандарди кои силно ги почитуваме и спротивно на нашите залагања за обезбедување на траен мир, безбедност и просперитет во Европа и пошироко“, се вели во реакцијата на Министерството за надворешни работи.

Министерот за здравство Арбен Таравари не знае за проблемите со кои се соочија матичните лекари оваа недела кога ординациите им ги преполнија пациенти со грип и пневмонии, а упат за рендген не може да креираат. Министерот Таравари вели дека речиси и да нема болница во земјата во која нема рендген.

„Пред да дојдам тука имав состанок со екипата од ’Мој термин’ за да има што повеќе термини во болниците и на периферијата. Јас немам информација дека некој од рендген-апаратите не работи, повеќето функционираат.

Речиси и да нема болница во државата во која нема рендген-апарати.

Во „Здравствниот дом“ може да нема некаде, меѓутоа во повеќето населени места јас мислам дека постојат и работат. Можеби онаму каде што немаат два-тројца радиолози или педијатри, можеби нема дежурен“, рече Таравари денес по посетата на Детската клиника.

Синоќа, матичниот лекар од Скопје, Драган Ѓорѓиевски, кој истовремено е и претседател на Здружението на лекарите по општа семејна медицина, се пожали дека прегледал 90 пациенти, но ниеден не можел да испрати со итен упат да направи рендген на градите во ек на грипови и пневмонии. Рендген-апаратите биле прикажани како надвор од функција, а онаму каде што биле функционални, биле блокирани итните упати поради големиот метеж, па рендген-снимка на државно на пациентите не им е достапна.

Лекарите на Детската клиника не направиле грешка при лекувањето на седуммесечното бебе, кое почина на клиниката на почетокот на минатиот месец откога првин беше одбиено за хоспитализација, а по два дена, со влошена состојба, било примено на лекување. Министерот за здравство Арбен Таравари денес извести дека го добил извештајот од стручната комисија.

„Нема одговорност од докторите. Извештајот пристигна, јас го прочитав уште во понеделникот, ако не се лажам. За среќа, професионалците констатираа дека докторите немаат никаква грешка. Можеби болеста си го направила своето, можеби доцна е донесено детето, меѓутоа констатирано е дека нема лекарска грешка“, рече министерот Таравари.

Низа вонредни инспекции беа направени на Детската клиника минатиот месец по смртта на седуммесечното бебе. Државниот санитарен и здравствен инспекторат забележа пропусти и укажа дека Клиниката била должна да издаде писмено образложение за одбивањето прием на болничко лекување, т.е. кога не бил направен прием на бебето, а констатира и дека не е решен проблемот со присуство на специјалист во дежурната амбуланта за што најави прекршочна постапка. ДСЗИ, по констатирањето на неправилностите, му предложи на министерот да формира стручна комисија во чија надлежност е да утврди дали лекарите направиле грешка при лекувањето на бебето.

Родителите на бебето за медиумите изјавија дека првиот пат кога побарале помош оти бебето имало црвенило на лицето и нозете, по направената лабораторија, ги прошетале клиниките во „Мајка Тереза“, завршиле на Детската клиника, од каде што ги одбиле за хоспитализација. Но, по два дена, му се влошила состојбата на бебето, се вратиле на Детската клиника и бебето било хоспитализирано, но за пет дена починало.