Градоначалникот Горан Герасимовски информира дека Општина Центар ќе се мобилизира за чистење на јавните површини во Центар откако вчера градот Скопје потфрли во чистењето на сметот на улиците и булеварите под чија надлежност е градот Скопје.

„Вчерашната глетка беше страшна за центарци, недозволиво е центарот на градот да изгледа така поради неизвршувањето на работата од страна на градот Скопје. Решивме да се мобилизираме и самите да го исчистиме Центар затоа што градската администрација подолг временски период доцни со чистењето на градот и нашата општина. Денеска ќе одржам состанок со вработените од јавното претпријатие Паркинзи на Општина Центар – ПОЦ со цел организирање голема акција за чистење на критичните места на територија на општината. Ова не е првпат општината да го чисти сметот на градот Скопје, но не смееме да дозволиме Центар да биде преплавен во смет поради негрижата на градската власт“, порачува Герасимовски.

За потсетување, кон крајот на минатата година, Општина Центар ја исчисти и депонијата во близина на трговскиот центар Ист Гејт Мол иако и таа не беше под нејзина надлежност, туку на градот Скопје.

„И за овој случај, службите на Општина Центар го исчистија натрупаната депонија која беше оставена со години. И тогаш, и сега непостапувањето на градот Скопје нема да се спречи ние да не постапиме. Срамота е и недозволиво ова што се дозволува да се случува во центарот на градот кадешто доаѓаат голем број на туристи. Наместо да бидеме пример за чист град, ние се гушиме во смет. Повторно ќе ги засукаме ракавите се со цел граѓаните да имаат подобри услови за живот. Кога Градот Скопје не може тогаш Општина Центар може“, истакнува Герасимовски.

Општина Кисела Вода продолжува со посветена поддршка за најмладите жители и нивните семејства. Денес Советот на Општината едногласно одлучи еднократната парична помош за семејствата со новороденчиња двојно да се зголеми. Со оваа одлука, износот кој досега беше 6.000 денари се зголемува на 12.000 денари, со што се овозможува значајна помош за родителите во еден од најважните моменти во нивниот живот.

Градоначалникот Орце Ѓорѓиевски истакна дека оваа мерка е дел од пошироката стратегија на Општина Кисела Вода за унапредување на социјалната слика и создавање поволни услови за развој на младите семејства.

-Поддршката за новороденчињата е многу повеќе од финансиска помош. Таа претставува симбол на нашата заложба за иднината, за создавање општина која расте и се подмладува. Ова е само еден сегмент од нашите заложби. Градиме нови градинки за да обезбедиме предучилишно образование за сите деца, субвенционираме целодневен престој за децата од семејства во социјален ризик, а за овие деца обезбедуваме и бесплатни оброци, курсеви по странски јазици и информатика во училиштата. Дополнително, во рамките на програмите за поддршка на младите, сите првачиња во општина Кисела Вода добиваат бесплатни ранци и училишен прибор преку проектот „Ранче за секое прваче“, додека за децата од социјално загрозените семејства се организираат бесплатни летувања, што придонесува за нивниот развој и рамноправни можности- истакна градоначалникот Ѓорѓиевски, додавајќи дека со вложувањата во образованието, инфраструктурата и социјалната поддршка, Општина Кисела Вода создава услови за хармоничен развој на секое дете и активно работи на создавање здрава и просперитетна иднина.

Градоначалникот на Општина Ѓорче Петров, Александар Стојкоски, продолжува со посветената работа за подобрување на условите за живот на сите граѓани.

Со цел да се поддржат младите семејства и да се поттикне населението, општината донесе значајна одлука за зголемување на надоместокот за новороденче од 5.000 на 7.000 денари. Денес градоначалникот Стојкоски потпиша нови решенија за оваа поддршка, со што се потврдуваат заложбите за инвестирање во најмладите генерации.

Дополнително, општината активно вложува во подобрување на условите за предучилишно образование. Во моментов е во тек изградбата на нова градинка во населбата Стопански Двор, а паралелно се работи на подготовка на документација за изградба на уште две нови градинки на територијата на Општина Ѓорче Петров.

„Создаваме услови за секое дете и секое семејство да имаат сигурна и подобра иднина во Ѓорче Петров. Ова не е само наша обврска, туку и наша мисија. Општината се развива заедно со граѓаните и за граѓаните,“ изјави градоначалникот Стојкоски.