Осомничени се осум лица поради убиството во Чаир се случи ноќта помеѓу 10 и 11 февруари.

Од нив шест се гонат за убиство и обид за убиство, а другите двајца за помагање оти по настанот ги сокриле пиштолите за да им помогнат на дел од осомничените да не бидат откриени.

Убиството се случи на паркинг на улицата Втора Македонска Бригада, а претходела расправија поради сообраќајно недоразбирање кај поликлиника Чаир. Потоа, според информациите од Обвинителството, почнала вооружена престрелка меѓу две групи, при што првоосомничениот 28-годишник, со употреба на огнено оружје, со умисла го го убил Хебиб Буњаку и го довел во опасност животот на уште едно лице.

„Уште петмина осомничени исто така директно учествувале во престрелката, возвраќајки со дејствија на помагање и соизвршителство во убиство и обид за убиство. Последните двајца осомничени, по престрелката сокриле два од пиштолите користени во оружениот инцидент“, информираа од Обвинителството.

Предложен е притвор за двајца осомничени за  убиство и обид за убиство, како и мерка куќен притвор за уште еден од осомничените. Притвор е предложен и за двајцата кои се сомничат дека помагале.

По три лица полицијата се уште трага.

Премиерот Христијан Мицкоски во рамките на работниот престој во Минхен, Сојузна Република Германија денеска оствари средба со претседавачот на Минхенската безбедносна конференција, Кристоф Хојзген.

На средбата се разговараше за актуелните безбедносни предизвици во Европа и регионот, како и за можностите за зајакнување на меѓународната соработка во доменот на безбедноста и стабилноста.

Премиерот Мицкоски ја истакна заложбата за унапредување на стратешкото партнерство со сојузниците од НАТО и потребата за напредок на патот кон Европската унија, како и за активната улога на земјата во регионалната безбедносна архитектура.

Тој нагласи дека стабилноста на Западен Балкан е клучна за европската безбедност и ќе продолжи да работи на продлабочување на билатералните и мултилатералните односи во оваа област.

Двете страни се согласија дека соработката е клучна за справување со глобалните предизвици и дека иднината на регионот е во одржлив развој, економски просперитет и сигурност за сите граѓани.

Мицкоски денеска оствари билатерална средба и со премиерот на Република Хрватска, Андреј Пленковиќ. Средбата се одржа во духот на пријателските односи меѓу двете земји, при што беше нагласена важноста на продолжувањето на политичкиот дијалог и економската соработка.

Двајцата премиери разговараа за билатералните односи, евроинтегративниот процес и предизвиците со кои се соочува регионот на Западен Балкан. Премиерот Мицкоски изрази благодарност за континуираната поддршка што Хрватска ја дава на Македонија во процесот на европските интеграции и нагласи дека Владата останува посветена на реформските процеси со цел забрзување на пристапните преговори.

Премиерот Пленковиќ ја потврди поддршката на Хрватска на патот кон Европската унија, истакнувајќи дека стабилноста и развојот на регионот се од заеднички интерес.

Во текот на денот Мицкоски ќе земе учество во дел од активностите на Минхенската безбедносна конференција, каде ќе има свое обраќање на панел дискусијата на Форин Полиси, говерејќи за геополитиката, енергетската сигурност и улогата во промените на глобално ниво.

Европските лидери треба да почнат да создаваат европска армија како одговор на военото засилување на Русија, изјави украинскиот претседател Володимир Зеленски.

„Навистина верувам дека дојде време да се создадат европски вооружени сили“, рече Зеленски во говорот на Минхенската безбедносна конференција.

„Да бидеме искрени, сега не можеме да ја исклучиме можноста дека Америка би можела да ѝ каже „не“ на Европа за прашања кои би можеле да ја загрозат“.

Како што се приближува третата годишнина од почетокот на руската инвазија на 24 февруари, Зеленски рече дека Европа мора да се обедини зад обединета надворешна и одбранбена политика што ќе и покаже на Америка дека блокот е сериозен за сопствената безбедност.

И покрај големите загуби, рускиот претседател Владимир Путин додава 150.000 војници во своите вооружени сили, поголеми од повеќето европски армии, рече Зеленски, и секоја недела отвора воени канцеларии за регрутирање.

Украинскиот претседател истакна дека неговите разузнавачки служби „имаат јасни информации дека Русија планира да испрати војници во Белорусија ова лето под изговор на вежби“, додавајќи дека ова може да биде почеток на операциите против другите соседни европски земји.

Се повеќе се зборува за напорите предводени од САД да се стави крај на војната, при што претседателот Доналд Трамп започна директни разговори со Путин. Но, Зеленски предупреди дека рускиот лидер е многу несигурен партнер.

Зеленски на безбедносната конференција во Минхен изјави и дека Путин лаже и не може да му се верува за постигнување на мировен договор.

И покрај разговорите за напорите за прекин на борбите, Русија продолжува да води војна против Украина.