Доналд Трамп зборуваше од Мар-а-Лаго, Флорида, за денешната средба во Саудиска Арабија меѓу САД и Русија.

Тој рече дека е посигурен во мировниот договор по разговорите на кои присуствуваше и американскиот државен секретар Марко Рубио.

Американскиот претседател, исто така, рече дека нема да се спротивстави на стационирање на европски мировни сили во Украина како дел од мировниот договор со Русија.

„Ако сакаат да го сторат тоа, тоа би било добро“, рече Трамп, додавајќи дека САД „воопшто нема да се спротивстават на тоа“.

„Знам дека Франција го спомна. Други го спомнаа, Велика Британија го спомна“, додаде тој, нарекувајќи го „убав гест“.

На прашањето Доналд Трамп да им одговори на Украинците кои се вознемирени што официјалните лица на нивната земја не биле поканети на мировни преговори.

„Тие имаа место на маса три години и многу пред тоа“, одговори Трамп.

„Ова можеше многу лесно да се реши“, додаде тој.

Трамп рече дека би можел да „направи договор“ за Украина доколку беше претседател на САД кога изби војната.

„Можев да склучам договор за Украина што ќе им ја дадеше речиси целата земја“, рече тој.

„Цела, речиси цела земја. И ниту еден човек нема да биде убиен и ниту еден град не би бил уништен“.

Францускиот претседател Емануел Макрон најави дека ќе биде домаќин на уште една средба за Украина по разговорите меѓу новата американска администрација и Русија, додавајќи дека Доналд Трамп може повторно да започне корисен дијалог со Владимир Путин.

Во интервју за француски регионален весник, Макрон повторно изгледаше отворен за идејата за испраќање војници во Украина, но нагласи дека тоа може да се случи само во многу ограничена форма и надвор од зоните на конфликтот.

Неговите коментари уследија откако Трамп ја шокираше Европа со промената на американската политика речиси три години од почетокот на руската инвазија на Украина, обновувајќи ја дипломатијата со Кремљ со надеж дека ќе постигне договор за ставање крај на конфликтот.

„Трамп уште еднаш создава стратешка двосмисленост за претседателот Путин користејќи многу силни зборови и создавајќи несигурност што може да помогне да се изврши притисок“, рече Макрон.

Францускиот претседател, кој некогаш редовно разговараше со Путин, но не разговарал со него од 2022 година, додаде дека и самиот е подготвен да разговара со својот руски колега „кога е соодветно во претстојните преговори“.

Тој рече дека Париз „не се подготвува да испрати копнени сили за учество во конфликтот на фронтот во Украина“.

Сепак, Франција и Велика Британија размислуваат да испратат „експерти или дури војници во ограничени околности“.

„Таков потег ќе ги зајакне Украинците и ќе покаже солидарност. Размислуваме за ова со Британците“, потврди тој.

Поранешниот украински претседател и актуелен пратеник Петро Порошенко ја обвини канцеларијата на Володимир Зеленски за уцена. „Ми беше кажано дека ако мојата парламентарна група гласа за нацрт-законот за нуклеарната централа „Хмелницки“, нема да имам проблеми со санкциите“, рече Порошенко во интервју за „Украинска правда“.

Да потсетиме, Зеленски на 13 февруари ја одобри одлуката на Советот за национална безбедност и одбрана за воведување неограничени санкции за неколку лица од висок профил, вклучувајќи го и Порошенко. Порошенко ги осуди санкциите како неуставни и политички мотивирани.

Парламентарната пратеничка група на Порошенко се спротивстави на неодамнешниот предлог-закон за купување на два руски реактори од Бугарија за нуклеарна централа, потег што Зеленски го нарече клучен за енергетската независност на Украина.

Некои пратеници го критикуваа договорот, нарекувајќи ги реакторите застарени и скапи. Парламентот се соочуваше со постојано одложување на усвојувањето на законот, што доведе Бугарија да го продолжи рокот за договорот до март.

Порошенко, исто така, го обвини Зеленски за пречекорување на неговите овластувања со санкции. Тој го критикуваше нацрт-законот против олигарсите од 2022 година, кој ги дефинира олигарсите како поединци со значително медиумско влијание, политички ангажман и имот што надминува 2,27 милијарди украински гривни (52 милиони евра).

„Зеленски манично сонуваше за санкции“, рече тој, додавајќи дека само силниот одговор од Венецијанската комисија го спречи усвојувањето на законот.

Порошенко даде интервју и за украинскиот информативен сајт Censor.net. Во тоа интервју тој посочи дека украинските власти планираат да одржат претседателски избори до крајот на оваа година. „Запишете го – 26 октомври годинава“, рече тој. Тој додаде дека државната печатница сега го пресметува бројот на гласачки ливчиња потребни за одржување на изборите.

Тој истакна дека оваа информација ја добил од анонимни упатени лица од кабинетот на украинскиот претседател. „Според нашите извори, Украинската изборна комисија почнува да го ревидира избирачкиот список. Ова е исклучиво заради подготовка за изборите“, изјави тој.

Петгодишниот мандат на Зеленски требаше да заврши на 20 мај минатата година. Изборите требаше да се одржат во март или април 2024 година, но беа одложени затоа што земјата се уште е во вонредна состојба. Според украинскиот устав, Зеленски продолжува да ги извршува своите должности додека не биде избран нов шеф на државата.