Македонија
Да се заложиме за комуникација без омраза, порачува КСЗД по повод Светскиот ден за нулта дискриминација

Комисијата за спречување и заштита од дискриминација (KСЗД) по повод 1 Март – Светскиот ден на нулта дискриминација апелира да изградиме општество засновано на разбирање, солидарност и праведност за сите.
– На 1 март, Светскиот ден за нулта дискриминација, потсетуваме дека секој човек има право на достоинство, почит и еднаквост, без разлика на неговите лични карактеристики. Дискриминацијата не е само индивидуален проблем – таа го засега целото општество, ја нарушува социјалната кохезија и го спречува напредокот. На овој ден, не зборуваме само за еднаквост – зборуваме и за одговорност. Секој од нас има моќ со своите зборови и постапки да придонесе кон општество засновано на разбирање, солидарност и почит. Начинот на кој комуницираме со другите ја обликува средината во која живееме. За говорот што вклучува дискриминација, предрасуди или поттикнување поделби нема место во нашето секојдневие, се вели во соопштението.
Според KСЗД, кога дозволуваме стереотипите и нетолеранцијата да станат дел од нашата култура, го поттикнуваме неединството и ја намалуваме довербата меѓу луѓето.
– Но, зборовите имаат сила – можат да изградат мостови на разбирање и поддршка, да поттикнат емпатија и да создадат средина во која секој се чувствува прифатено. Затоа, овој ден нека биде потсетник дека секој од нас има улога во создавањето на инклузивно општество. Да се заложиме за комуникација без омраза, за односи базирани на почит и заедништво. Промената започнува со нас – со нашите дела, зборови и избори, секој ден. Ова нека биде повик за акција – да изградиме општество засновано на разбирање, солидарност и праведност за сите, стои во соопштението од КСЗД.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Собранието ќе формира комисија за избор на нов претседател на антикорупциската

Собраниската Комисија за прашања на изборите и именувањата во 12 часот ќе одржи седница на која се очекува да ја формира Комисијата за селекција на кандидати за нов претседател на Државната комисија за спречување на корупцијата (ДКСК).
Процесот следи откако на 5 август беше распишан јавен оглас, со рок за пријавување од 10 дена. Оваа постапка се спроведува по оставката на претходната претседателка Татјана Димитровска, која е обвинета за оддавање службена тајна и компјутерски фалсификат.
Според Законот за спречување на корупцијата и судирот на интереси, до изборот на нов претседател, функцијата ја врши заменик-претседателот на ДКСК. Новиот претседател мора да има најмалку десет години работно искуство, од кои осум во областа на борбата против корупцијата, владеењето на правото или добро управување.
Македонија
Свечена седница по повод 24 години од потпишувањето на Охридскиот рамковен договор

Во Владата ќе се одржи одбележување на 24 години од потпишувањето на Охридскиот рамковен договор.
По тој повод со почеток во 10:00 часот во Свечената сала во Владата на Република Северна Македонија ќе се одржи свечена седница на која ќе се обрати премиерот Христијан Мицкоски.
Настанот ќе биде пренесуван во живо на „Фејсбук“ и „Јутуб“ каналот на Владата.
Охридскиот рамковен договор беше потпишан на 13 август 2001 година помеѓу претставниците на тогашните најголеми политички партии и специјални претставници на ЕУ и на САД.
Македонија
Сончево и многу топло со мала локална облачност: максималната температура до 39 степени

Времето денеска ќе биде сончево и многу топло со мала локална облачност. Ќе дува слаб до умерен ветер од југоисточен правец. Минималната температура ќе биде во интервал од 13 до 21, а максималната ќе достигне од 32 до 39 степени.
Во Скопје сончево и многу топло со слаб до умерен ветер од југоисточен правец. Минималната температура ќе се спушти до 19, а максималната ќе достигне до 38 степени.
Времето во наредните денови
Ќе се задржи сончево и топло време со умерена облачност преку денот. Ќе дува слаб до умерен ветер претежно од југоисточен правец.