Македонија
Бугарија испрати јасна политичка порака дека не се посветени на изградбата на Коридорот 8, вели Николоски, кој алармирал во банките за пренамената на средствата

Министерот за транспорт и врски Аленсандар Николоски утрово алармирал во двете банки со кои земјава има потпишано договори за кредит од 350 милиони евра за изградба на железничкиот Коридор 8 дека доколку не се користат средствата, тоа ќе биде по вина на Бугарија. Писмата ги испратил со цел да го заштити финансискиот интерес на државата, која доколку не ги користи одобрените пари, ќе треба да плаќа резервации.
„Со жалење ја примив информацијата што стигна вчера, а која веќе е и официјален документ усвоен од бугарската влада, со кој Бугарија одлучи да ги тргне средствата што претходно беа предвидени за реконструкција на делот на пругата од Софија до Ѓуешево. Имајќи предвид дека има пруга, но таа е во очајна состојба и практично не може да се користи, не треба само да се изведе клучка и да се изгради тунелот со Бугарија, туку многу побитно – да се направи реконструкција од Софија до Ѓуешево со цел Скопје и Софија да се спојат. Имајќи предвид дека донесоа одлука средствата за реконструкција на делот од Софија до Перник и од Перник до Радомир да ги пренасочат за изградба на пруга од Софија до Бургас, мислам дека јасно испраќаат политичка порака во однос на нивната посветеност, односно непосветеност на изградбата на желеничкиот Коридор 8“, рече министерот Николоски.
Според него, со овој потег на Бугарија паднала во вода целата пропаганда водена изминативе седум месеци против нашата Влада, против него и против премиерот дека се против поврзување со Бугарија.
Николоски вели дека останува силно посветен на железничкиот Коридор 8 и оти во овој момент активно се работи на втората секција во должина од 34 километри, која оди од Бељаковце до Крива Паланка.
„Остануваме посветени на дијалог со Бугарија за изнаоѓање заеднички прифатливо техничко решение за тунелот што треба да ги спојува двете држави и за изградба на третата секција. Сметаме дека Коридорот 8 е исклучително значаен не само за Македонија туку за целиот регион и за цела Европа. Тоа е НАТО-коридор, коридор што е втор најзначаен за НАТО и нашата посветеност останува“, вели министерот Николоски.
Освен банките, тој за новите случувања во врска со железничкиот Коридор 8 испратил писма и до европската делегација и до европската транспортна заедница. Очекува дијалогот со Бугарија да продолжи, а последниот чекор за средба извести дека го направил на 7 март кога преку Министерството за надворешни работи испратил формално писмо до бугарската влада, до бугарското Министерство за транспорт и до сите одговорни. Формирал и работна група на највисоко ниво, во која членува и самиот тој, и очекува и Бугарија да постапи исто за железнички да се поврзат Скопје и Софија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Коридорот 8 е национален приоритет за Бугарија, велат од бугарското министерство за транспорт

Министерството за транспорт и врски не ја одложи изградбата на пругата кон Република Северна Македонија, се истакнува во информацијата на ова министерство која ја пренесуваат бугарските медиуми.
Министерството за транспорт и врски со години работи на развој на Коридорот 8, кој го поврзува Јадранското Море со Црното Море преку Албанија, Република Северна Македонија и Бугарија, се нагласува во информацијата.
„Од вкупно 1.220 километри железница, повеќе од половина од нејзината должина – 747 километри – е на територијата на Република Бугарија. Од нив останува да се изградат само 2,5 километри железничка пруга – од Гуешево до Деве Баир (границата со Република Северна Македонија)“, информираат од бугарското министерството за транспорт, пренесува БГНЕС.
Делницата, како што велат е финансирана во рамките на Програмата „Транспортно поврзување“ 2021 – 2027 година и ќе биде завршена во планираниот период од 2029 година. За споредба, делот што недостасува од територијата на РСМ е приближно 70 километри.
„Медиумска шпекулација е тврдењето дека нашата земја ја одложи модернизацијата на бугарската делница. Железничката линија Радомир – Ѓуешево е во функција и по завршувањето на делницата од Ѓуешево до Деве Баир долга 2,5 километри ќе може да се приклучи на мрежата на операторот ПЦМ преку прекуграничен тунел. Исто така, NKŽI го нарача дизајнот на рехабилитација на целата делница за брзини до 160 km. Овој проект е финансиран и од Програмата за транспортна поврзаност 2021 – 2027 година.
На 15 јануари 2025 г. согласно утврдената процедура, Бугарија ѝ предаде на Република Северна Македонија нацрт-договор за прекуграничен железнички тунел со Република Северна Македонија, во кој се претпоставува дека страните имаат заедничка цел – изградба на прекуграничен железнички тунел меѓу Република Бугарија и Република Северна Македонија во граничната област, вклучително и преку спроведување на јавна набавка за изградба и надзор на изградбата на тунелот од страна на една од договорните страни и напорите за обезбедување грант помош за негова изградба, бидејќи изградениот објект треба да ги исполнува барањата на ЕУ и НАТО за ваков тип на инфраструктура. До денес нема официјален одговор од РСМ, наведуваат во својот став од бугарското Министерство.
Македонија
ДОМ: Кривична одговорност за еколошката хаварија на Крива Река

Политичката парија ДОМ го повикува Обвинителството да покрене кривична пријава за денешното загадување на Крива Река поради испуштање на енормно количество јаловина со тешки метали и хемикалии од рудникот Тораница и помор на рибниот фонд долж сливот кон Пчиња и Вардар.
Согласно кривичниот закон ваквото загадување на животната средина претставува тешко кривично дело против природата и животната средина каде се предвидени затворски казни над 10 години за одговорните лица во правното лице, оценуваат од партијата.
Министерството за животна средина и Обвинителството, како што велат, треба да ги превземат сите дејствија во нивна надлежност, а не се исклучува можноста согласно Законот за животна средина за одземање на А интегрирана еколошка дозвола на рудникот Тораница поради тоа што ова е трета еколошка хаварија во последните 5-6 години.
Македонија
Ова е победа на правдата: ВМРО-ДПМНЕ ја поздравува одлуката за притвор на Јахоски

ВМРО-ДПМНЕ ја поздравува одлуката на Кривичниот суд за определување на притвор на Асмир Јахоски, Пуцко Петрол. Ова е победа на правдата, се вели во соопштението од оваа партија.
„Само со одлуката за ставање во притвор на Јахоски е единствено исправна и очекувана за криминалот од 160 милиони евра, криминална шема во која еден од обвинетите е во бегство.
Само со исправни одлуки ќе го победиме системот кој мора да го смениме“.
Оваа одлука, според владејачката партија немало да се случи без народот жеден за правда.
„П.С Порака до целата политичко бизнис бандитска исповрзана мрежа:
Заедно со народот жеден за правда ќе ве победиме сите вас кои ја злоупотребувавте државата, сите вас кои ја доведовте Македонија до ова дереџе. Правда ќе има. Ред ќе има“, порачуваат од партијата на Мицкоски.