Македонија
Специјалисти за изгореници и интензивна нега од Израел, Србија и Чешка доаѓаат утре на помош на македонските лекари

Од вкупно 115 пациенти кои денес беа примени на лекување во болниците во Кочани, Штип и Скопје по смртоносниот пожар во дискотека во Кочани, 47 ќе заминат на лекување во странство, а за останатите повредени утре во земјава ќе пристигнат лекари од странство кои ќе помагаат во лекувањето. Министерот за здравство Арбен Таравари вечерва рече дека сите пациенти кои остануваат на лекување во домашните болници засега се во стабилна состојба, но таа секој момент може да се смени.
„Утре на помош ни доаѓаат и колеги кои што се специјалисти за изгореници и интензивна нега и тоа од Израел, од Белград и од Прага. Ќе помагаат на нашите колеги кои неуморно работат, тука се од утрово и не само во Клиничкиот центар туку и во Градската болница и во ’8 Септември’ и во Штип и во други установи во кои се наоѓаат нашите доктори“, рече министерот Таравари.
Директорот на Фондот за здравствено осигурување, Сашо Клековски, рече дека освен веќе договорените 47 пациенти, други нема да бидат праќани на лекување во странство. За лекување на засега 68 повредни во пожарот во Кочани ќе помагаат експертите од Израел Србија и Чешка кои имаат поголемо искуство во лекување изгореници отколку нашите лекари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Студентите на УКИМ неделава организираат собири за жртвите во пожарот, имаат дозвола за прекин на наставата

Студентите и професорите на Скопскиот универзитет ќе присуствуваат на организирани собири – Заеднички час за да изразат почит на жртвите во пожарот на концертот во Кочани и поддршка на нивните семејства.
УСС на УКИМ упати повик до сите студенти, целата академска заедница и граѓаните на државава да присуствуваат на собирите Заеднички час. УСС на своите профили на социјалните медиуми ќе известува за локациите на наредните собири.
Повик за присуство на денешниот собир во 12 часот на платото на УКИМ упати и студентската организација „Студентски отпор“.
Собирите ќе се одржат денеска и во текот на целата недела. Првиот заеднички час е денеска од 12 часот на кампусот на факултетите од општествените науки. Од Ректоратот студентите имаат дозвола за прекин на наставата.
Македонија
Денеска протест во Кочани: Не можеме да ги вратиме нашите мили сограѓани, но сме должни да се бориме во нивна чест

По трагичниот настан во дискотеката во Кочани, во кој животот го загубија над 59 лица, а над 100 се хоспитализирани, на социјалните мрежи се шири повик за протест. Тој е закажан во 13 часот во Градскиот парк во Кочани .
„Граѓаните бараат конкретни промени. Ќе се борат за за град без партиски вработувања, за институции кои функционираат, за полиција која е тука за нас, за инспекциски служби кои ќе ги вршат своите обврски, за јавни простори кои ќе бидат безбедни и чисти. Протестот е за правдата, за секој од нас, за секоја жртва која што ја изгубивме и за сите нас кои го живееме овој град секој ден. Не можеме да ги вратиме нашите мили сограѓани, но сме должни да се бориме во нивна чест и за нив да го смениме овој неефикасен систем кој не обезбедува сигурност, благосостојба и праведност“, стои во објавата на Фејсбук профилот Кочани.
Македонија
ЈОРМ: Пребарување на серверите и на уште еден компјутер во Министерството за економија, наредено е графолошко вештачење на потписи на одредена документација

Обвинителскиот тим кој работи на истрагата за утврдување на причините за катастрофата во Кочани од утрово е проширен и во моментов го сочинуваат:
– 2 јавни обвинители од ОЈО Кочани
– 2 јавни обвинители од ОЈО Штип
– 5 јавни обвинители од ОЈО Скопје
Синоќа се издадени повеќе дополнителни наредби, вклучително наредба за пребарување на серверите и на уште еден компјутер во Министерството за економија, како и наредба за графолошко вештачење на потписи на одредена документација, извести Обвинителството.
Увидот на лице место денеска продолжува.