Македонија
„Јас сум мртов човек, изгубив се“: Потресни сцени, семејствата очајно чекаат вести за најблиските повредени во пожарот

Страшниот пожар во ноќниот клуб „Пулс“ во Кочани однесе најмалку 59 животи, додека повеќе од 150 лица се во болници со тешки повреди. Семејствата на повредените и исчезнатите се собраа пред болниците, очајно чекајќи каква било вест за нивните најблиски.
Би-Би-Си ја пренесува изјавата на Мустафа Саидов, волонтер на Црвениот крст, кој ја опишува атмосферата надвор од болницата како „брутална и хаотична“.
„Внатре, каде што се уште се идентификуваат жртвите, ситуацијата е уште полоша. Родителите се млади луѓе на околу 40 години, а нивните деца имаа само 18, 20 години.
„Приказните се ужасни, многу млади животи се изгубени засекогаш“, рече Саидов.
Еден маж, чиј внук беше тешко повреден во пожарот, рече дека некои родители се уште не можат да ги најдат своите деца.
Меѓу очајните родители е и Драги Стојанов кој во пожарот го загуби синот единец. Неговите зборови одекнуваа како крици од болка и гнев.
„Да ви кажам нешто пред сите. Снимај ме. Јас сум мртов човек, изгубив сè. Цела Европа мора да знае што се случило овде“, им рече тој на новинарите.
„По оваа трагедија каков живот остана за мене? Не ми треба. Имав едно дете, а сега го нема“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Митева: Во Скопје само 2 објекти од вкупно 13 имаат важечка лиценца за кабаре

Имало 22 лиценци за вршење угостителка дејност, а 15 со истечена важност. Во Скопје има само 2 објекти за кабаре со лиценца од вкупно 13 објекти, 8 со истечена, 3 немаат никаква лиценца, посочи на денешната прес-конференција портпаролката на Владата Марија Митева.
„Во Куманово 3 објекти со важечка лиценца. Во Струмица има 4 лиценци од кои еден објект со истечена лиценца. Во Прилеп два објекти , и двата со истечена лиценца за кабаре или ноќен клуб“, рече Митева и додаде:
„Освен тоа се испитува дали има техничка документација за сите тие објекти на територија на целата држава’.
Додаде и дека во изминатите два дена извршени се 50 контроли во угостителски објекти и тоа кабариња, диско клубови.
Македонија
Обвинителството ја продолжува истрагата за пожарот, побаран притвор за уште едно лице

Обвинителството ја продолжува истрагата за пожарот во Кочани. Во притвор се 16 осомничени, а ќе се бара притвор за уште едно.
„И во текот на денешниот ден, со цел координација на активностите, во Кочани е и Јавниот обвинител на Република Северна Македонија Љупчо Коцевски. Врз основа на обезбедените докази, се испитува улогата на 16 лица за кои обвинителството побара и обезбеди мерка 48-часовен притвор. Претрес денеска беше извршен и во просториите на Општина Кочани. Попладнево, до надлежниот суд, Основното јавно обвинителство Кочани ќе достави предлог за определување краткотраен притвор за уште едно лице“, велат од ОЈО.
Претходно, министерот Панче Тошковски, изјави дека уапсено е и лицето кое издало и потпишало проект дека дискотеката „Пулс“ во Кочани ги исполнува сите потребни услови за да добие лиценца за работа. Ова лице, како што кажа министерот, се товари за Тешки дела против општата сигурност во врска со предизвукување општа опасност.
Македонија
Тошковски: Началниците од Кочани и Штип се заменети со скопјани за да нема сомнежи и влијанија во истрагата

Разрешувањето на раководните лица во Кочани и Штип и нивна замена со службеници во Скопје, е со цел процесот да се одвива без притисоци, сомнежи или влијанија, објасни министерот за внатрешни работи, Панче Тошковски на прес-конференција.
Тошковски претходно во текот на денот донесе одлука за разрешување на пет началници, еден помошник-началник и еден командир од полицијата во Кочани и Штип.
„Во моменти како овие, клучно е инситуциите да работат со највисока транспаретност и професионалност, и затоа воспоставуваме оперативна поставеност која ќе овозможи целосна непристрасност со луѓе кои немаат лични или професионални релации со самата средина“, вели Тошковски.
Тој рече и дека началникот на кочанската полиција не меѓу лицата кои беа на распит деновиве, и ниту тој, ниту пак, началникот на СВР Штип засега не се предмет на распит.