Денеска (24.03.2025) полициски службеници од СВР Скопје го лишија од слобода М.Р.(26) од Скопје затоа што околу 13.50 часот на бул. “Партизански одреди” во Скопје со патничко возило “ауди” со скопски регистерски ознаки, удрил во малолетен пешак и малолетник кој туркал велосипед.

Двајцата малолетници со Итна медицинска помош се пренесени во клинички центар “Мајка Тереза” во Скопје за укажување лекарска помош.

Извршен е увид од СВР Скопје и надлежен обвинител.

По документирање на случајот, ќе биде поднесена кривична пријава по итна постапк, соопшти МВР.

Извршени се 116 вонредни надзори врз основа на Законот за угостителска дејност, пришто во делот на прекршочна санкција, решенија за привремена забрана им се изречени на 10 фирми – кафулиња и клубови, истакна портпаролката на Владата, Марија Митева.

Утврдено е дека 15 угостителски објекти од вкупно 23 коишто имаат активна лиценца не ги исполнуваат минимално технички услови. Кај нив ќе бидат изречени две мерки, прво решение за забрана за вршење на дејност, и второ предлог до Министерството за економија за одземање на лиценцата.

Кај шест правни субјекти кои немаат активна лиценца или им е истечена, а утврдено е дека во изминатиот период работеле, издадени се решенија за забрана за вршење на дејност.

Во однос на идните чекори, во координација со МВР, Државниот пазарен инспекторат почнува со инспекциски надзори во објектите за организирање на прослави и настани со посебен акцент на утврдување на минимално техничките услови.

„За жал бројките зборуваат сами за себе, но ја потврдуваат потребата од решително и одговорно дејствување. Посветени сме на транспарентност и секоја неправилност да се санкционира. Наша цел е да создадеме систем кој ќе им служи на граѓаните“, рече Митева.

Инспекциите се случуваат по пожарот во дискотеката во Кочани во којшто загинаа 59 лица, а која имала фалсификувана лиценца.

Управниот одбор на Заедницата на локалните самоуправи (ЗЕЛС) донесе заклучок со кој ќе препорача сите локални самоуправи да ги откажат или да најдат соодветна замена за планираните јавни настани. Претседателот на ЗЕЛС и градоначалник на Кисела Вода вели дека еден од прифатливите предлози за замена на планираните јавни настани е садење дрвја во чест на загинатите во пожарот во Кочани.

„Донесовме заклучок како ЗЕЛС сите оние јавни настани што биле планирани од страна на локалната самоуправа во наредниот период, нашата препорака е до градоначалниците, до директорите на училиштата и до директорите на јавните установи, да бидат откажани или да се најде соодветна замена за начин на нивна интерпретација. Еден од предлозите беше во чест на жртвите, за жал, на оние млади лица што ги изгубија своите животи, да бидат засадени дрвја во наредниот период целата држава. На тој начин да оддадеме почит кон нив“, рече Ѓорѓиевски.

Тој денес извести дека во вонредните надзори во училиштата, градинките и сите јавни објекти во кои се собираат деца и млади во земјата, иницирани по пожарот во Кочани, е утврдено дека тие се безбедни. Во следниот период најави вонредни инспекции во сите станбени згради.