Со Програмата за поддршка на електронски медиуми во рамки на Сеавус инкубаторот, од вторникот официјално започна поддршката за два онлајн портала, со можност да се приклучат и други.

„Сеавус и Сеавус инкубаторот беа поттикнати од идејата да се промовира независно истражување, достапност на информациите секаде подеднакво, поттикнување на јавна дебата и возможност на целото граѓанство да учествува во неа. Од денеска ја започнуваме Програмата за поддршка на електронски медиуми во рамки на Сеавус инкубаторот. Слободата на изразување е значаен предуслов за демократијата на секое општество. Таа е неопходна за реализација на човековите права, а впрочем и за себереализирање на секој од нас. Ние веруваме дека достапноста на информациите е императив во секое демократско општество и дека треба да се поддржи размена на мислења и затоа ја започнуваме оваа програма“, рече директорката на Сеавус инкубаторот, Бисерка Конеска. Програмата вклучува едногодишна, бесплатна помош за електронските медиуми, и тоа во вид на техничка помош од аспект на хостирање на порталите на серверите коишто Сеавус ги обезбедува. „Многу позначајно е менторството од локални и меѓународни експерти од областа на истражувачкото новинарство за што имаме соработка со повеќе меѓународни организации. Секако и помош во опрема. Без разлика каков тип помош ќе понудиме на медиумите, она што е сигруно е дека ние нема да се мешаме во уредувачката политика на самите портали“, вели Конеска. Дел од инкубаторот ќе бидат портали од најразлични сфери, како култура, забава, спорт, хумор, сатира. па сé до оние портали коишто објавуваат економски и политички вести.Издвоени се 1.000 квадратни метри простор од кои половина е отворениот модерен простор и уште половина во канцелариски простор. Сеавус инкубаторот ќе помага бизниси од три различни индустрии: од информатичката, од креативната и од електронските медиуми.„Сеавус е еден од најголемите и најуспешните шведски амбасадори во Македонија, којашто ја основа шведско-македонскиот претприемач Игор Лештар и во текот на овие години додека Сеавус работи во Македонија, Сеавус секогаш бил на чело на технологијата, претприемништвото и креативните, инвентивни бизнис решенија, како и на чело на општествената и корпоративна одговорност“, рече шведскиот амбасадор во Македонија, Матс Стефансон. Тој е многу задоволен од идејата и подготвеноста на Сеавус да поддржи помали бизниси и да го потпомогне нивниот раст.„Ова е нова појава во Македонија и многу ми е драго што Сеавус тука денеска претставува вистински пионер во оваа област и го трасира патот за натамошен развој на вакви општествено одговорни компании. Тоа директно нé поврзува со денешниот инкубатор, што го почнуваме, ова е извонреден проект, кој нема само да му донесе профит на Сеавус, туку, сигурен сум, ќе влијае вистински и на обликувањето на општеството. Проектот ќе им помогне на помалите компании во ИТ индустријата во креативната индустрија и во областа на онлајн медиуми  да почнат со својата работа“, додаде Стефансон. „Мислам дека како портал кој веќе трета година постои, кој изоде и преживеа некои ‘детски болести’, можам слободно да си земам за право да кажам дека ваквата помош којашто ја нуди Сеавус инкубаторот за сите онлајн медиуми кои ќе бидат дел од него, значи еден одгромен ветер в грб, и тоа во најтешките моменти кога медиумот сé уште не е застанат на свои нозе. Ние речиси три години постоиме, а сé уште не можеме да застанеме на свои нозе“, рече Сашо Кокаланов, од порталот Коза Ностра. Во вторник официјално започнува програмата за поддршка на електронски медиуми, а два портала веќе се инкубираа и престојуваат во Сеавус инкубаторот, а тоа се Коза Ностра и Среќа.мк. Конеска ги повика сите оние кои имаат потреба, коишто работат од дома, коишто имаат потреба од поддршка, обука и ткн., да им се обратат и да се вклучат во Програмата за поддршка на електронски медиуми преку Сеавус инкубаторот.На прес-конференцијата на која присуствуваа претставници од меѓународната заедница, невладиниот сектор, медиуми и претставници од бизнис сферата се одбележа официјалниот почеток на програмите Dot up Technology, Dot up Creative и Dot up Media. Најголем акцент се стави на програмата Dot up Media наменета за поддршка, развој и поттик на независното и истражувачко новинарство, каде беше соопштен пакетот на економски и логистички бенефиции и програмата за поддршка на дигитални медиуми во инкубаторот./крај/мф/бб

Извор: Макфакс