Иницијативата „Стоп за Вардариште“ информира дека во сабота, 27 септември 2025 година, во 7:30 часот наутро од мостот Близнак, заедно со В.Д. градоначалникот на општина Аеродром, ќе го посетат Вардариште.

Тие јавно ги повикуваат и надлежните на останатите институции до кои, како што велат се имаат обратено да им се приклучат во 7:30 кај мостот Близнак, и заедно да го посетат Вардариште и да им ги презентираат конкретните мерки кои ќе бидат преземени веднаш, а не пoсле локалните избори.

„Ги повикуваме и сите заинтересирани граѓани да ни се приклучат. Вчера (25 септември 2025 година) истече рокот од 5 дена, кој го дадовме за започнување на исполнување на итните барања од директни засегнатите граѓани: Воспоставување 24-часовен јавно достапен видео-надзор на депонијата Вардариште. Воспоставување 24-часовно физичко обезбедување на Вардариште. Итно иселување и соодветно згрижување на лицата кои живеат бесправно на територијата на Вардариште. Поставување на ограда околу Вардариште. Започнување на процес за конечно затворање на Вардариште. Откривање и казнување на потпалувачите и организаторите на пожарите. Ригорозни мерки против граѓани и правни субјекти кои ќе продолжат да фрлаат отпад во Вардариште

Барањата беа доставени до претседателката на Македонија, Владата на Македонија, Министерство за животна средина и просторно планирање, Министерство за внатрешни работи, Министерство за социјални политики, демографија и млади, Град Скопје, Општина Гази Баба и Општина Аеродром. До сега, не добивме одговор од ниту една институција“, истакнуваат од таму.

Протестите кои од денеска се одржуваат два пати дневно, како што појаснуваат, ќе продолжат и денеска во 18:00 на раскрсницата кај мостот Близнак.

„Ги повикуваме сите граѓани да ни се приклучат за да го бараме заедно уставно загарантираното право за здрава животна средина, следствено и за ист воздух, што е приоритет за сите нас“.

Претседателката Гордана Сиљановска-Давкова присуствуваше на одбележувањето на 30-годишнината од воспоставувањето на дипломатските односи со Соединетите Американски Држави, што се одржа во Њујорк.

Сиљановска-Давкова порача дека посакува и во следните 30 години да го продолжиме стратешкото партнерство со САД бидејќи живееме во турбулентни времиња во кои е неопходна меѓусебна поддршка на глобален план.

Обраќајќи им се на претставниците од македонската дијаспора, таа оддаде почит за нивните успеси и им посака да останат сплотени и обединети. Претседателката изрази уверување дека заедно можеме да работиме на подобрување на животот во татковината.

„Должни сме кон вас. Јас ветувам дека ќе сторам сè да ги интензивираме контактите и тогаш кога сме одвоени“, рече таа додавајќи дека што побргу ќе го формира советот за дијаспората преку кој континуирано ќе се регулираат односите.

На настанот присуствуваа претставници на американските владини институции, македонски дипломати во САД, како и претставници на македонската заедница.

Со Мицкоски како премиер, трошоците за живот растат, реалната плата се намалува a животниот стандард на граѓаните опаѓа, обвини портпаролката на СДСМ, Богданка Кузеска.

Според неа, три месеци по ред се намалува реалната нето-плата, а два месеци по ред се намалува номиналната нето-плата.

„Во мај 2025 просечната плата била 45 796 денари, а во јули 45 276 денари. Тоа значи 520 денари пониска плата, во услови на повисоки цени на основните трошоци. Намалувањето на реална плата значи дека стандардот на граѓаните опаѓа а расте сиромаштијата. Синдикалната минимална кошничка за четиричлено семејство веќе надмина 65.000 денари месечно. Граѓаните со својата плата купуваат сѐ помалку, бидејќи цените растат, а примањата опаѓаат. Едно просечно домаќинство не може да ги покрие основните трошоци за храна, сметки, превоз и лекови. Ваквиот пад на стандардот е директна последица на неспособната на владата на Мицкоски и ВМРО-ДПМНЕ и промашените економски политики. Ова е влада која воопшто не се грижи за граѓаните и мисли само на својот луксуз“, рече Кузеска.