ОМД со загриженост ги следи настаните во татковината и редовно го информира своето членство за состојбата. Целосно е несфатлива и загрижувачка атмосферата која владее кај македонските партии кои со приоритизирање на партискиот и личен интерес над националниот, неоспорливо го уништуваат интегритетот и унитарноста на македонскиот народ.

ОМД верува дека размерите на политичките игри, непочитувањето на Пржинскиот договор од страна на сите партии потписнички како и апсурдниот обид за одземање на правото на гласна граѓаните на Македонија надвор од неа, доведуваат до сериозно заладување на односите помеѓу земјата и нејзините иселеници во странство.Таквиот однос и креирана ситуација, неминовно резултираат со анемичност кај иселеникот како би се пријавил и искористил своето право на глас.Воедно, повеќепати во минатото, ОМД се огласи дека електронското гласање и основањето на Министерство за Дијаспора претставуваат начин на кој државата би покажала грижа и чуство на одговорност кон дијаспората и нејзиното уставно право на глас.

Според ОМД, апсурдноста во односот на партиите кон дијаспората кулминира со регулирањето на единствениот избирачки список и самиот избирачки процес.Додека иселеникот може електронски да се регистрира во единствениот избирачки список, на изборниот ден, тој мора да патува илјадници километри како би гласал за претставник во Собранието кој може да е дури и од друг континент.По тој основ, ОМД јавно го прашува ДИК по кој закон го признава електронското поднесување документи за регистрација и поради која причина истото не може да биде спроведено на изборниот ден.

Со верување дека македонската дијаспора е нераскинлив дел од македонскиот идентитет и вистински бранител на македонското битие, оневозможувањето и создавањето на технички препреки при искористување на уставно загарантираното право на глас и делување со прогресивни идеи стекнати со престој и работа во високодемократските општества, води до уништување на македонскиот идентитет, малцинства и јазик.

Таквиот тек на настани е во прилог на соседните држави, или поточно во прилог на грчкото негирање на македонското постоење, бугарското негирање на македонскиот јазик и историја, како и во прилог на српскиот однос кон МПЦ и албанизацијата во западна Македонија. Имајќи го тоа во предвид, ОМД отворено прашува кој работи за интересите на соседните земји, наместо во корист на својот добробит?

Како бастион на унитарноста и глас на македонските малцинства во соседите, македонската дијаспора не смее да биде изоставена во Сообранието и државното уредување. Политичките интриги и партиски интереси се далечни за македонските иселеници, кој што факт укажува дека ставот на дијаспората е објективен и непристрасен. Со таквиот пристап за допринос кон татковината, краткиот рок за регистрација, работни часана дипломатските и конзуларни претставништва кои во целост не соодејствуваат со достапноста на иселениците како и отежнатата изборна процедура која исклучиво предвидува физички наместо електронски начин на гласање, помеѓу дијаспората се доживува како манипулативна политика на македонските партии за нејзино дистанцирање. Според ОМД, потегот на усложнување наместо олеснување на гласачкиот процес за дијаспората претставува обид за одземање на нејзиното право на глас со што се отвара јаз помеѓу македонците кои живеат во и надвор од земјата. Но и покрај нееднаквиот третман како гласачко тело, дијаспората нема да се поколеба во намерата да ја поддржи својата татковина, туку напротив, ќе дејствува во зачувување на македонското ткиво во овие исклучително тешки времиња за нашата нација. 

Додатно, неизвесното оддржување на изборите закажани на 5ти јуни ги обврзува граѓаните на Македонија надвор од неа на повторна регистрација во случај на нивно одложување, што го намалува интересот на дијаспората за искористување на правото на глас, како што е евидентно со само 3500 регистрирани гласачи според информациите на ДИК.

Во прилог на партиските малверации, евидентираните 3500 гласачи во дијаспората се прикажани како потврда на слабиот интерес помеѓу иселениците за делување и допринос во државата од која што доаѓаат. Но од перспектива на дијаспората, понижувачкиот број од 3500 регистрирани македонски иселеници објавен во медиумите е обид за етикетирање на дијаспората како незаинтересирана за состојбата во татковината. Со таквото верување, ОМД прашува дали стотиците илјади македонци ширум светот со легитимно право на глас се само бројка за политичка и предизборна употреба? Дали постои обид за дискриминација и дистанцирање на македонските иселеници преку усложнувањето на нивното гласање? Кому смета македонската дијаспора? Кој има корист од заговорната политика кон македонската дијаспора? – прашува ОМД. 

Но и покрај се, ОМД верува дека актуелните политички партии се свесни за бројноста на македонската дијаспора која е повеќекратно поголема од  3500. Со цел да се дознае квантитативното членство на дијаспората, ОМД  воедно повикува на попис кој што долго време е занемарен од страна на политичката елита во Македонија./крај/мф/бс

Извор: