Попладнево околу 16 часот во близина на Спортскиот центар „Борис Трајковски“ во Скопје изби пожар кој предизвика паника кај учесниците и посетителите на меѓународниот ракометен турнир. Благодарение на брзата реакција на полициските службеници и противпожарните екипи, спречено е ширење на огнените јазици кон паркираните возила, околните објекти и лизгалиштето кое е во рамки на спортскиот комплекс.

Според информациите, полицијата извршила навремена евакуација на сите спортисти, спортски работници и публика, со што е избегната поголема несреќа.

Како последица на вдишаниот чад, девет полициски службеници завршија на Одделот за токсикологија каде им е укажана лекарска помош и се на кислородна поддршка. Од болницата информираат дека сите се во стабилна состојба.

Надлежните служби остануваат на терен за да ги утврдат причините за пожарот.

Попладнево скопскиот регион беше зафатен од силно невреме проследено со силен ветер и дожд, по што речиси истовремено избија повеќе пожари на отворен простор кои беа видливи од различни делови на градот и предизвикаа вознемиреност меѓу граѓаните.

Според информациите на Центарот за управување со кризи (ЦУК), пожарот кој го зафати подрачјето над селото Локе–Крушопек е локализиран, а екипите остануваат на терен за следење на состојбата и целосно гасење на сите жаришта.

Од Дирекцијата за заштита и спасување (ДЗС) соопштија дека за дел од овие пожари постојат сомневања дека се намерно подметнати. Силниот ветер и дождот во регионот на скопскиот аеродром го оневозможија полетувањето на авионите-ер трактори и армискиот хеликоптер, иако тие беа ставени во состојба на готовност за поддршка на пожарникарите.

Пожари избувнаа на повеќе локации:

Општина Сарај, с. Крушопек, кон падините на Водно (ниска вегетација и мешана шума).

Општина Карпош, кај спортската сала „Борис Трајковски“ (ниска вегетација).

Општина Гази Баба, с. Виниче и Црешево (ниска вегетација и мешана шума).

Општина Бутел, кај последна 57 (ниска вегетација).

Општина Гази Баба, с. Инџиково (трева и ниска вегетација).

Сите пожари се изгаснати или ставени под целосна контрола.

ЦУК апелира до граѓаните кои имаат претрпено материјални штети или забележале дополнителни ризици веднаш да се јават на бројот за итни повици 112.

Голема благодарност беше упатена до екипите на скопската Бригада за противпожарна заштита за нивната брза и пожртвувана реакција, како и до тимовите на ДЗС, доброволното противпожарно друштво од Чаир и граѓаните кои несебично помогнаа на терен.

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.

Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.

Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.

Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.

Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.