Руските власти во четвртокот ги објавија имињата на двајцата, како што тврдат, украински диверзанти кои имале задача да извршат терористички напади на црноморскиот полуостров Крим, а министерството за надворешни работи ги предупреди украинските власти во Киев и „неговите странски ментори“ дека штетата која би ѝ била нанесена на Русија или загинување на руски граѓани или војници нема да остане без одговор. 

Руското министерство за надворешни работи изјави дека ја уништила на Крим разузнавачката мрежа на Главната управа за разузнавање на министерството за одбрана на Украина и притоа се уапсени државјани на Украина и на Русија, кои биел соучесници во подготвување на терористички напади на црноморскиот полуостров Крим.

Во соопштението наведувајќи ги имињата на две уапсени лица, руската страна истакнува дека тие веќе ги признале обвинувањата. Руската безбедносна служба ФСБ во средата објави дека е разобличена агентура на Украина која требало да изврши серија терористички акти на стратешки инфраструктурни објекти, како и дека во операцијата загинале војник и службеник на ФСБ.

„Обидот за дестабилизирање на ситуацијата на руски Крим е осудена на неуспех Стабилноста и безбедноста на Република Крим дефинитивно ќе бидат осигурени“, соопшти руската дипломатија.

„Би сакале, исто така, да го предупредиме Киев , како и неговите странски ментори, дека штети нанесени на руската страна, загинување на руски војници, нема да останат без последици“, се истакнува во соопштението на руското министерство за надворешни работи.

Москва притоа ги повикува западните партнери да влијаат врз Киев и да го предупредат на опасните чекори коишто можат да имаат негативни последици.

„Уште еднаш ги повикуваме партнерите да покажат најсериозно влијание врз киевските власти, да ти предупредат на опасните чекори кои може да ги имаат најнегативните последици“, предупредува руската дипломатија.

Притоа се истакнува дека поттикнувањето од страна на Западот на „воинствената реторика“ на украинскиот претседател имало негативно влијание врз Киев да „организира провокации“ на Крим.

Украинскиот претседател Петро Порошенко претходно во средата нареди сите воени единици да се постават во близина на границите со Крим и Донбас, пренесуваат украинските медиуми. „Беше одржан состанок со претставниците на безбедносните сили и министерот за надворешни работи. Наредено е сите единици да се постават близу административните граници со Крим и Донбас“, напишал Порошенко на својот профил на Twitter. Порошенко претходно изјави дека руските обвинувањата дека „Украина влегла на Крим се циничен изговор за да засилат воените закани против Украина“.

„Порошенко постојано ја истакнува ‘безусловната поддршка од САД, НАТО и ЕУ’ во ‘борбата за враќање на анектираниот Кирм’… Поттикнувањето на таа реторика од страна на Западот несомнено имало негативна улога во злосторничката одлука на украинските власти да организираат воени провокации на руски Крим“, порачува Москва.

Руската страна предупредува и дека Порошенко со ваквите одлуки станува „гробар на мировниот процес“, доколку знаел со ваквите активности на украинското разузнавање, но дека е „уште полошо“ доколку не бил запознаен.

Според руското министерство за надворешни работи, средба во ткн „Нормандиски формат“, односно Русија, Украина, Франција и Германија, на што повика Порошенко откако нареди засилување и упатување на украинската војска кон Донбас и Крим проширена со САД, „одвај има смисла доколку Киев не се откаже од тероризмот и провокации“.

„Како што истакна рускиот претседател Владимир Путин во средата, во сегашните услови и се додека не видиме некакви реални позитивни чекори од страна на Киев, негово откажување од политиката на тероризам и провокации, нема смисла да се одржи средба во нормандискиот формат, веќе во почетокот на септември во Пекинг, што неодамна го побара Петро Порошенко“, порача Москва.

На 11-ти март 2014 година, црноморскиот полуостров Крим со мнозинско руско и русофоно население, по превратот во Киев кога на власт дојдоа прозападните сили, на референдум со излезност од над 80 отсто и со над 96 отсто гласови „за“, си ја поврати автономијата укината во 1990-те со осамостојувањето на Украина од поранешниот Советски сојуз и се присоедини на Руската Федерација. Украина, САД и ЕУ тоа го сметаат за нелегална руска анексија на украинска територија./крај/мф/сн

Извор: Макфакс