Свет
(Фото) Карла Бруни го испрати сопругот Никола Саркози во затвор, прегратки и бакнежи

Поранешниот француски претседател Никола Саркози денес почна да ја издржува петгодишната затворска казна станувајќи првиот француски лидер зад решетки по Втората светска војна. Тој беше осуден за заговор за финансирање на неговата претседателска кампања во 2007 година со пари од либискиот диктатор Моамер Гадафи.
Никола беше придружуван од сопругата Карла Бруни кога беше однесен во парискиот затвор „Ла Санте“. Тие се држеа за раце, се прегрнуваа и се бакнуваа пред тој да влезе во полициското возило, кое го однесе во затвор.
Стотици поддржувачи скандираа „Никола, Никола“ и ја пееја француската химна додека тој го напушташе својот дом и влегуваше во полициското возило утрово.
Синовите на Саркози, Жан, Пјер, Луј и ќерката Џулија, како и неговите внуци, се појавија на митингот.
Саркози се ожени со Бруни – неговата трета сопруга – по бурна романса на почетокот на неговото претседателствување во 2008 година, само неколку месеци по многу јавната разделба од втората сопруга Сесилија. Никола и Карла имаат ќерка заедно, а тој има три сина од претходните бракови.
Живот зад решетки
Саркози се соочува со пет години затвор во ќелија од 9 до 12 квадратни метри, една осамена прошетка дневно и живот без личен мобилен телефон. Последниот поранешен француски лидер што бил затворен бил нацистичкиот соработник Филип Петен, осуден за предавство во 1945 година.
„Невин човек е затворен“
На пат кон затворот Саркози во изјава објавена на социјалните мрежи изјави дека невин човек е затворен. Неговите адвокати потврдија дека веднаш е поднесено барање за негово ослободување.
Фото: принтскрин
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Украина и Европа подготвуваат мировен план од 12 точки за крај на војната

Европските земји во соработка со Украина изработуваат предлог од 12 точки за запирање на војната, кој би се темелел на задржување на постојните линии на фронтот, објави „Блумберг“.
Според изворите на агенцијата, планот предвидува прекин на огнот, враќање на украинските деца депортирани во Русија, размена на заробеници, гаранции за безбедност и финансиска помош за обнова на Украина, како и забрзан пат кон членство во Европската унија.
Спроведувањето на договорот би го надгледувал мировен одбор под раководство на американскиот претседател Доналд Трамп. Санкциите кон Москва би се укинале постепено, а околу 300 милијарди евра замрзнати руски средства би ѝ биле вратени дури по прифаќањето на руската финансиска помош за реконструкцијата на Украина.
Планот засега не е финализиран и може да претрпи измени. Европски претставници оваа недела ќе отпатуваат во Вашингтон за разговори, а целта е со договорот да се отвори пат за почеток на мировни преговори меѓу Киев и Москва, наведува Блумберг.
Регион
Хрватска урива стотина дивоградби покрај брегот

Во наредните три недели на плажата Зрќе во Новалија ќе бидат урнати 124 бесправно изградени објекти, соопшти Државниот инспекторат на Хрватска, пренесе „Јутарњи“. Од нив, 119 се наоѓаат во камп, а пет се угостителски објекти изградени без дозвола надвор од градежната зона.
Инспекторатот соопшти дека отстранувањето ќе се врши на трошок на сопствениците и е проценето на околу 720 илјади евра. Акции за уривање на нелегални градби ќе има и во други делови oд Хрватска.
Од 2019 година досега во таа земја се отстранети повеќе од 2300 нелегални градби, спроведени се повеќе од 42 илјади инспекциски надзори, поднесени се 334 кривични пријави, а изречените парични казни достигнуваат 16,5 милиони евра, соопшти Инспекторатот.
Свет
„Дојче веле“: Хамас и ИСИС добиваат пари од Германија

Терористички организации како Хамас и Исламска држава добиваат финансиска поддршка од Германија преку донации собрани на социјалните мрежи, објави Дојче веле. Според истражувањето, повици за „давање богатство за џихад“ кружат на интернет, а од германски следбеници се бараат пари за оружје.
Главна фигура во мрежата на финансирање, според германските истражители, е жена од Минхен, Елиф О., која како тинејџерка заминала во Сирија и наводно сега ги координира донациите за жените-припаднички на ИСИС. Судовите веќе осудиле неколку нејзини помагачи кои собрале околу 40 000 евра.
Поради правни ограничувања, тешко е да се докаже дека конкретна донација директно финансирала терористички чин. Затоа германското министерство за правда подготвува закон со кој би се казнувал и обид за финансирање тероризам.
Според експертот за тероризам Ханс-Јакоб Шиндлер, Германија треба да го следи американскиот модел каде секоја донација кон организација од листата се смета за финансирање тероризам и се казнува со најмалку десет години затвор.
Истражувањето наведува и пример со австрискиот активист Мустафа А. од Линц, кој преку својот Телеграм-канал „Gaza Now“ собирал крипто-донации во милионски износи, дел од кои, според американската компанија Chainalysis, завршиле кај Хамас. Тој е во притвор, а САД и Британија го ставиле на своите санкциски листи уште во март 2024 година.