Северна Кореја тестираше крстосувачки ракети море-земја западно од Корејскиот Полуостров, објави државната новинска агенција KCNA, токму во време кога американскиот претседател Доналд Трамп и другите лидери се собираат во Јужна Кореја на регионални состаноци.

Крстосувачките ракети беа испукани вертикално и летаа околу два часа по однапред одредена рута за да ја погодат својата цел, објави севернокорејската новинска агенција KCNA. Севернокорејскиот лидер Ким Џонг-ун не беше присутен на лансирањето.

Зборувајќи за лансирањето, Пак Џонг Чон, потпретседател на Централната воена комисија на Северна Кореја, рече дека „се постигнуваат важни успеси во практичниот развој на нуклеарните сили на Северна Кореја“ според планот утврден од владејачката партија во земјата.

Се очекува Трамп денес да пристигне во јужнокорејскиот град Гјонгџу за да им се придружи на другите шефови на држави и бизнис лидери кои учествуваат на форумот за азиско-пацифичка економска соработка на разни самити и состаноци. Се очекува тој да разговара со кинескиот претседател Кси Џинпинг подоцна оваа недела.

фото: принтскрин

Екстремнно моќниот ураган Мелиса се движи кон Куба откако ја опустоши Јамајка. Тоа е најсилната бура со која некогаш се соочила островската земја.

Со ветрови што се приближуваат до 300 километри на час, ураганот од категорија 5, највисок на скалата Сафир-Симпсон, стигна до копното во западна Јамајка околу пладне.

Ова е најлошиот ураган што ја погодил Јамајка откако се водат метеоролошки записи, а премиерот Ендру Холмс го прогласи островот за „зона на катастрофа“.

Во Света Катерина, во централна Јамајка, реката Рио Кобре се излеа од своите корита, а силните ветрови урнаа огради и покриви. Света Елизабет, парохија на југозападниот дел од островот со население од 150.000 жители и „житница“ на Јамајка, беше поплавена, изјави локалниот функционер Дезмонд Мекензи на прес-конференција. „Штетата во Света Елизабет е значителна, цела Јамајка претрпе уништување од Мелиса“, рече тој, додавајќи дека неколку болници се оштетени.

Дури и пред да стигне до копното, ураганот уби три лица на Јамајка, која се подготвуваше за неговото пристигнување, како и уште три лица на Хаити и едно лице во Доминиканската Република. Во Хаити, властите наредија затворање на училиштата, бизнисите и владините канцеларии во среда. ОН во вторник соопшти дека итно доставуваат по воздушен пат околу 2.000 пакети помош од Барбадос до Јамајка.

Последниот голем ураган што ја погоди Јамајка беше Гилберт во септември 1988 година, кој беше помалку моќен од Мелиса, при што загинаа 40 лица и предизвикаа голема штета.

Луѓе на Куба бегаат од брегот
Откако изгуби дел од силата и беше намалена на категорија 4, Мелиса почна да се оддалечува од Јамајка кон Куба, според Националниот центар за урагани на САД (NHC), кој предупреди дека ситуацијата останува „исклучително опасна“. Но, сега ураганот повторно се зајакнува и се очекува наскоро да стигне до Куба.

На Куба, жителите бегаат од брегот додека се приближува Мелиса. Локалните власти прогласија вонредна состојба во шест провинции на истокот од земјата, а жителите се обидуваат да се снабдат со храна, свеќи и батерии од понеделник.

Се очекуваат исклучително силни бури, како и сериозни крајбрежни поплави и поројни дождови што би можеле да предизвикаат катастрофални лизгања на земјиштето, низ целата земја. Властите ја повикаа јавноста да биде внимателна поради крокодилите, кои би можеле да претставуваат закана поради поплавите.

фото: принтскрин

Градоначалничката на Скопје, Данела Арсовска, преку објава на социјалните мрежи го повикува Ислам Абази од Основното јавно обвинителство за организиран криминал и корупција, да постапи по, како што вели, „доказите за криминал“ кои се однесуваат на актуелни случаи поврзани со дивоградби.

„Го повикувам Ислам Абази од Основното јавно обвинителство за организиран криминал и корупција, да ги оправда тие 2% доверба кои ги има обвинителството кај граѓаните и да постапи по доказите за криминал.

Во спротивно, вели Арсовска, креира опасен преседан.

„Ќе започнеме сите со капитални проекти за градење безбедни дивоградби и обезбедување гратис станови со џабе вода и џабе струја за оние на кои не им е решено станбеното прашање. И нема да смеат да ни писнат, ни да прашаат од кај се парите.
Плус ќе треба да им се извинат на сите кои ги казниле, им срушиле објект или отслужуваат казна за бесправна градба.
Затоа што еден од министрите на Владата, секој ден плаче, лаже, манипулира и праќа пораки по дипломатските претставништва да ми реагираат да престанам до избори да говорам за криминалов, еве повеќе не ве повикувам да постапите. Ве виде народ, се девалвиравте бидејќи не смеете да му писнете на Висар Ганиу“, пишува Арсовска.