Политика
Заев: Аболицијата мора да биде целосно поништена
Лидерот на опозицијата Зоран Заев, по новонастанатата политичка ситуација, откако собранието повторно заседава, не ја исклучи можноста повторно да објавува материјали од прислушуваните разговори, појасни дека во четврток не учествувале на седницата затоа што се одлучувало за укинување на аболицијата ретроградно, што според него е неуставно, а очекува и Никола Груевски да се врати на позицијата премиер.
На прес-конференција Заев а рече дека денеска, пратениците на опозицијата нема да присуствуваат на седницата на Собранието, затоа што Груевски, ВМРО-ДПМНЕ и ДУИ предлагаат закони коишто се спротивни на интересите на граѓаните, на државните интереси и на Договорот од Пржино.
„Повторно носат еднострани одлуки. Главната цел им е да ги спасат криминалците во своите редови. Не може да има селективно поништување на аболицијата. Не смее поништувањето на аболицијата да зависи од волјата на Ѓорге Иванов или од барањето на аболицирани поединци.Аболицијата мора да биде целосно поништена. Законот мора да важи подеднакво за сите“, рече Заев.
Рече дека нема да бидат соучесници во еднострани одлуки на власта од ВМРО-ДПМНЕ и ДУИ.
„Со овој предлог закон којшто го пуштаат во Собранието, едниот член е неуставен, заради ретроактивноста, и тој ќе биде кога-тогаш укинат од Уставниот суд и е спас за аболицираните криминалци. А вториот член покажува дека само неколкумина евентуално би поднеле барање до Ѓорѓи Иванов, за да им биде поништена аболицијата“, рече Заев.
Лидерот на опозицијата, одговарајќи на новинарско прашање, рече дека, по вчерашната одлука за враќање на старите министри и од Никола Груевски може да се очекува да се врати на премиерското место.
„Тоа нема да не зачуди воопшто да тој повторно се врати на премиерксата функција. Но, како што рековме сите еднострани одлуки досега сами ги погазија“, рече Заев.
Исто така, најави дека досега не постоела ниту законска, ниту уставна можност, Зоран Заев, СДСМ и опозицијата да продолжи со објавување на бомбите, „ако тоа биде потребно ние и тоа ќе го направиме“.
За заострената реторика кон ДУИ, Заев вели дека никогаш ДУИ не бил поштеден од овде.
„Нашиот став е исти. Криминалци се и ВМРО-ДПМНЕ и ДУИ и ова го прават од тие причини. Јас не гледам никаква причина за да не видат јасно и гласно граѓаните дека се придвижува Македонија кон крајот на излезот од оваа криза. Не можат да очекуват опозицијата да го контролира и ВМРО-ДПМНЕ и ДУИ. Тие се во кашата исто заедно влезени“, рече Заев.
Заев не прецизира, кога очекува да се одржат избори, туку дека изборите кои би се одржале треба да се исполнети минимум услови за нив.
„Ние не очекуваме реформи во правосудството, во тајната полиција, антикорупциска комисија и сите други укажувања до изборите. Со Груевски тоа не е возможно. Разграничување на партијата од државата, не се надеваме на тоа додека Груевски го води ВМРО-ДПМНЕ. Не е возможно. Но, услови во коишто ќе има кредибилен прочистен избирачки список, список во кој ќе веруваат граѓаните и минимум реформи во медиумите коишто ќе дадат фер шанса, не за здружената опозиција, туку за сите партиципиенти во регуларни и демократски избори, тогаш изборите ќе се случат во Македонија. Да не заборавиме , оваа борба ја отворивме за неколку цели. Една од најважните е брзи избори. Зошто? За да замине оваа криминална власт од Република Македонија“, рече Заев.
На прашањето какви последици очекува од сето ова што се случи со договорот од Пржино, за СЈО, Заев вели дека никој нема право и не смее да се дрзне кон СЈО, затоа што СЈО е последната насушна потреба која опстојува согласно договорот од Пржино.
„Не верувам дека некој ќе се дрзне да направи нешто по повод СЈО. Тогаш мислам дека гневот на граѓаните толку силно ќе се излие на улиците и домашен и меѓународен фактор нема да го спречи тој гнев“, заврши Заев./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница
Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.
Македонија
Џафери за Велигден: Обединети да продолжиме и да осигураме благосостојба денес и за идните поколенија
Претседателот на Владата на Република Северна Македонија, Талат Џафери, во име на Владата на Република Северна Македонија и во свое име, испрати телеграма со честитки за најголемиот христијански празник, Воскресение Христово – Велигден, до поглаварот на Македонската православна црква – Охридска архиепископија, архиепископ охридски и македонски, г.г. Стефан, до Светиот архиерејски Синод, свештенството и монаштвото на МПЦ-ОА, до православните верници и до сите граѓани кои денеска го чествуваат празникот.
„Задоволство ми е во име на Владата на Република Северна Македонија и во мое име, да Ви го честитам најголемиот христијански празник, Воскресение Христово – Велигден, Вам, на Светиот архиерејски Синод, на свештенството и монаштвото на Македонската православна црква – Охридска архиепископија, на православните верници и на сите граѓани кои денеска го чествуваат празникот.
Велигденската порака за победата на животот над смртта е порака која влева надеж дека за животот, вреди да се преземе секој чекор на храброст и пожртвуваност, чекор кој води кон светла цел. Заедничкото добро, е благословена човекова определба, и тоа може да се постигне само ако се почитуваат основните постулати на кои упатуваат бројните примери низ историјата. Особено во денешен контекст, кога човештвото и светот секојдневно се соочуваат со најразлични предизвици кои се закана по животот, мирот, здравјето и менталната благосостојба, потребни се повеќе од кога било пораките на надеж, единство и верба во тоа заедничко добро, засновано врз практикувањето на универзалните вредности како што се хуманоста, солидарноста, одговорноста и взаемната почит.
Вашата улога има голема одговорност и јас Ви посакувам мудрост во исполнувањето на благородната мисија. Ви пожелувам празникот да го поминете во добро здравје, спокој во душата и среќа меѓу саканите, а со разбирање, меѓусебна почит и обединети, да продолжиме да ја унапредуваме Република Северна Македонија и да обезбедиме благосостојба денес и за идните поколенија“, стои во честитката од премиерот Џафери до поглаварот на МПЦ – ОА, г.г. Стефан.