Регион
Турција: Притворени 103 генерали и адмирали, продолжува чистката
Најмалку 103 турски генерали и адмирали се притворени во рамките на истрагата за неуспешниот воен преврат, објави провладината агенција Anadolu во понеделникот, додека медиумите јавуваат дека продолжуваат чистките во државните институции.
Според податоците на турските медиуми, од споменатите приведени 103 генерали и адмирали, 43 офицери се веќе уапсени со наредба на судовите. Другите се испрашувани од иследниците. Вкупно во турските вооружени сили има 359 генерали и адмирали.
Агенцијата Anadolu ја објавува целата листа со имиња на приведените на највисоки офицери, од која се гледа дека се од воздухопловството, копнените војски и морнарицата, и тоа од сите делови на земјата.
Претходно телевизијата Habertürk објави дека се уапсени најмалку 12 генерали и адмирали. Во извештајот беше појаснето дека офицерите биле приведувани во текот на ноќта со одлуки на Истанбулскиот суд, но не се појаснува каде се извршени тие приведувања. Тие се обвинети за обид за воен преврат, обида за атентат на претседателот на земјата и убиства со умисла. Тие се осомничени дека учествувале во неуспешниот пуч кој се одвиваше ноќта кон саботата, кој заврши со 296 жртви на двете страни и 1.440 ранети главно цивили, по што над шест илјади луѓе се уапсени.
Во неделата ноќта беше објавено дека 70 адмирали и генерали се во притвор. Меѓу нив се и генералот Акин Озтурк, командантот на воздухопловните сили до 2015 година и член на Високиот воен совет (YAS), тело кое ги контролира турските вооружени сили, осомничен дека бил еден од организаторите и идеолог на заговорот. Тој е меѓу илјадниците припадници на вооружените сили кои се уапсени, вклучително и командантот на една од најзначајните воздухопловни бази „Инџирлик“ Бекир Ерџан Ван и главниот советник и аѓутант на претседателот Ердоган за воени прашања, Али Јазиџи.
Озтурк, роден 1952 година, требало да биде пензиониран на 30-ти август на состанокот на YAS, кој се состанува двапати годишно. Меѓутоа, се појавија информации дека тој наводно дознал дека бил истражуван поради можни врски со луѓето на проповедникот Фетулах Ѓулен кој живее во САД, обвинет од владата за создавање паралелни структури во правосудството, образованието, полицијата и армијата, како и за сегашниот обид за пуч, што тој го негира.
Како втор по важност меѓу организаторите на неуспешниот преврат се смета Мухарем Косе, поранешен правен советник на началникот на Генералштабот, соопштиле тројца високи функционери од Анкара. Тие го опишале Косе како следбеник на Ѓулен. Косе беше отстранет од должноста во март под обвинение за лошо постапување, но не отстранет од армијата. Во моментов турските власти немаат информации каде тој се наоѓа.
Турското министерство за внатрешни работи соопшти во понеделникот дека 8.777 лица се отстранети од должностите, вклучително и 7.899 припадници на полицијата и безбедносните служби. Овие бројки не ги вклучуваат припадниците на војската.
Во саботата беше објавено дека биле отпуштени 2.745 судии. Притоа уапсени се 426 судии и обвинители низ цела Турција, од кои двајца се уставни судии, а само во Истанбул се уапсени 39 обвинители и 71 судија.
Телевизијата CNNTurk јавува дека 30 турските гувернери и повеќе од 50 високо рангирани државни службеници, исто така, се сменети од должностите во продолжување на чистката во државните институции која ја вети претседателот Реџеп Тајип Ердоган по неуспешниот воен удар најавувајќи најверојатно дефинитивна пресметка со она што тој го нарекува „паралелна структура“ во државата, алудирајќи на движењето на исламскиот проповедник Фетулах Ѓулен кој се наоѓа во егзил во САД, но кој ја негираше својата вмешаност во настаните во Турција./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Избрана е новата Влада на Србија
Собранието на Србија со 152 гласа ја изгласа новата Влада на премиерот Милош Вучевиќ. Два дена траеше расправата за составот на Владата и нејзиниот план за работа, при што опозицијата го оспори кредибилитетот на Вучевиќ, посочувајќи дека, како и досега, за секоја одлука ќе биде прашан претседателот на државата Александар Вучиќ.
Новата Влада на Србија брои 31 член, од кои една третина се нови имиња во споредба со претходната Влада на чело со Ана Брнабиќ.
Премиерот Вучевиќ претходно изјави дека длабоко верува во историскиот договор меѓу Србите и Бошњаците и рече дека сака добри односи и со Хрватите. Истовремено, тој рече дека нема да ги гради овие односи на штета на сопствените интереси и дека Србија нема да се откаже од традиционалните пријатели.
Посебно внимание предизвикаа двајцата министри кои се под санкции на САД: Александар Вулин ќе биде вицепремиер, а Ненад Поповиќ ќе биде министер без ресор.
Регион
Договорен текстoт на резолуцијата за Сребреница
Предлогот за резолуција за комеморација на геноцид врз Бошњаците од Сребреница, извршен во јули 1995 година, е договорен, а за него треба да се расправа на седницата на Генералното собрание на Обединетите нации, потврди амбасадорот на БиХ во ОН, Златко Лагумџија.
Лагумџија на социјалната мрежа „Икс“ објави дека процесот на усогласување на резолуцијата, чии формални предлагачи се Германија и Руанда, е завршен и испратен до претседателот на Генералното собрание на ОН, Денис Френсис, па нејзиниот текст ќе биде претставен до земјите членки. на светската организација, од која се очекува поддршка.
Резолуцијата повикува да се воспостави 11 јули како меѓународен ден на сеќавање на жртвите на геноцидот во Сребреница, уште еднаш се осудуваат сите дејствија со кои се величат сторителите на воени злосторства, злосторства против човештвото и геноцид утврдени со пресудите на меѓународните судови. Ја нагласува важноста од завршување на потрагата по останките на преостанатите жртви кои досега не се пронајдени и повикува на продолжување на гонењето на сторителите на геноцидот кои се уште се на слобода.
Резолуцијата има намера да ги повика сите држави целосно да ги почитуваат своите обврски од Конвенцијата за спречување и казнување на злосторството геноцид, да го почитуваат меѓународното обичајно право за спречување и казнување на геноцид и да ги почитуваат релевантните одлуки на Меѓународниот суд на Правдата (МСП).
Од генералниот секретар на ОН се бара да воспостави информативна програма наречена „Геноцид во Сребреница и Обединетите нации“, која треба да се спроведе пред следната година, кога се одбележува 30-годишнината од тоа злосторство.
Сите земји-членки на ОН, како и невладините организации и граѓанското општество, предлагачи на резолуцијата истовремено повикуваат на соодветни активности за комеморација и чест на жртвите на геноцидот во Сребреница во 1995 година.
Македонија е коспонзор на оваа резолуција.
Српскиот претседател Александар Вучиќ и лидерот на босанските Срби Милорад Додик инсистираат дека оваа резолуција е обид да се наметне колективна вина врз српскиот народ.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.