Берзи
Курсот на доларот близу најниските нивоа во шест месеци
Курсот на американскиот долар на меѓународните девизни пазари во понеделникот падна на најниското ниво во последните пет и пол месеци во однос на кошничката валути, бидејќи вложувачите проценуваат дека во САД оваа година само еднаш ќе биде зголемена каматните стапки, доколку воопшто има.
Во таквата атмосфера на пазарите, индексот, кој ја мери вредноста на американската валута во однос на другите шест најзначајни светски валути од земјите најголеми трговски партнери на САД, остана горе долу непроменет во споредба со затворањето на тргувањето во петокот, на 94,639 поени. Со тоа се држи во близина најниското ниво во последните пет ипол месеци од 94,319 поени, на кое се лизна минатата седмица.
Курсот на американската валута се лизна и во однос на јапонската за 0,2 отсто, на 111,54 јени, близу најниското ниво во последните 18 месеци, од 110.67 јени, на кои се спушти во тргувањето во март.
Еврото во таквата атмосфера на валутните пазари остана речиси непроменето во однос на доларот, на 1,179 долари. Се здржа така во близина на највисокото ниво во последната речиси половина година од 1,1438 долари, колку што достигна на тргувањето во петокот.
Доларот минатата седмица се најде под поголеми продажни притисоци, откако претседателката на американската централна банка (Federаl Reserve – Fed), Џенет Јелен на пазарите им упати претпазливи пораки во поглед на зголемувањето на каматните стапки во најголемата светска економија. А претходната седмица поткрепа на американската валута ѝ дојдоа од изјавите на неколку функционери на Fed кои насочуваа на можно зголемување на каматните стапки во оваа година најмалку двапати.
Таквите очекувања по претпазливите изјави на челничката на Fed набрзо стивнаа, па почна да се нагаѓа дека може да се случи каматните стапки, воопшто да бидат подигнати до крајот на годината, откако ланскиот декември беа првпат зголемени во речиси десет години. Во петокот солидниот извештај за 215.000 новоотворени работни места во САД во американското стопанство во март само накусо му даде поддршка на доларот, имајќи предвид дека ни се успеа да се промени мислењето на вложувачите дека Fed оваа година ќе ги зголеми каматните стапки само еднаш, доколку воопшто и го зголеми.
„Претседателката на Fed, Џенет Јелен, помалку или повеќе ја одреди насоката на движењето на курсот на доларот во блиската иднина. Но, имајќи предвид дека клучниот извештај за вработеноста во САД повеќе не е во фокусот на вложувачите, секоја валута веројатно ќе се движи кон доларот врз основа на развојот на ситуацијата на домашен план“, смета во анкетата на Reuters Шин Кадота, валутен аналитичар во банката „ „Barclays“.
Во фокусот на пазарите оваа седмица ќе биде објавувањето на записникот од седницата на Fed во март, што треба да се случи во среда./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Берзи
Доларот нагло падна, еврото зајакна
На девизните пазари вредноста на доларот во однос на кошницата валути драстично падна минатата недела, бидејќи инвеститорите сметаат дека поради забавувањето на инфлацијата во САД заврши циклусот на зголемување на каматните стапки од страна на американската централна банка. Индексот на доларот, кој ја следи вредноста на САД во однос на шесте најважни светски валути, потона минатата недела за 1,9 отсто, на 103,81 поен, што е најниско ниво од почетокот на септември.
Истовремено, доларот падна за 2,1 отсто во однос на европската валута, па цената на еврото достигна 1,0910 долари. Остриот пад на курсот на доларот уследи по објавувањето во вторникот дека стапката на инфлација во САД се лизна на 3,2 отсто во октомври, од 3,7 отсто во септември.
И низа други извештаи потврдија дека инфлацијата се намалува, што ја поддржа тезата дека ФЕД нема да има потреба дополнително да ја заостри монетарната политика. Од март минатата година, ФЕД ги зголеми клучните каматни стапки за 5,25 процентни поени за да ја ограничи инфлацијата.
Сепак, на последните две седници челниците на ФЕД ги оставија каматните стапки непроменети, па инвеститорите сметаат дека циклусот на зголемување на цената на парите е завршен, иако од ФЕД велат дека е можно дополнително заострување на монетарната политика.
Во наредниот период, движењата на пазарот ќе зависат главно од шпекулациите за тоа кога ФЕД би можел да започне со намалување на каматните стапки. На пазарот на пари се проценува дека првото намалување на каматните стапки на ФЕД би можело да се случи во мај следната година, а до крајот на следната година каматните стапки би можеле да се намалат вкупно за еден процентен поен.
Берзи
Светските берзи драстично паѓаат, можно е дополнително зголемување на каматите
На светските берзи цените на акциите нагло паднаа минатата недела поради растот на приносите на обврзниците и пораката на претседателот на ФЕД Џером Пауел дека централната банка може дополнително да ги зголеми каматните стапки. На Волстрит, Доу Џонс индексот минатата недела падна за 1,6 отсто, на 33.127 поени, додека S&P 500 се лизна за 2,4 отсто, на 4.224 поени, а индексот Nasdaq се намали за 3,2 отсто, на 12.983 поени.
На берзата негативно влијаеше растот на приносите на американските државни обврзници. Во петокот приносите на 10-годишните обврзници се пробија над нивото од 5 отсто за прв пат по 16 години. Ова може да влијае на каматите на хипотеките и автомобилските заеми, каматите на кредитните картички… Покрај тоа, повисоките приноси на обврзниците ја намалуваат привлечноста на акциите бидејќи на инвеститорите им нудат добри приноси без никаков ризик.
Во такви околности, инвеститорите се повлекуваат од поризични инвестиции, како што се акциите, и бараат засолниште за својот капитал во инвестиции кои се сметаат за побезбедни во несигурни времиња, како што е златото. Како резултат на тоа, цената на унца злато се движи близу највисокото ниво во последните два месеци, околу 1.980 долари.
Поради сето ова, инвеститорите не беа охрабрени ниту од кварталните деловни резултати, иако поголемиот дел од компаниите од индексот S&P 500, кои досега објавуваа извештаи, остварија поголема заработка од очекуваната.
И на европските берзи цените на акциите драстично паднаа минатата недела. Лондонскиот FTSE индекс се лизна за 2,6 отсто, на 7.402 поени, додека франкфуртски DAX потона за 2,5 отсто, на 14.798 поени, а париски CAC 2,7 отсто, на 6.816 поени.
Берзи
Колапсот на моќната американска банка ги потресе светските берзи
Минатата недела на светските берзи е забележан голем пад на цените на акциите, бидејќи поради високата инфлација централните банки ќе продолжат да ги зголемуваат каматните стапки.
Волстрит беше потресен и од колапсот на банката во Силиконската долина (SVB).
На Волстрит, акциите на Dow Jones паднаа за 4,4 отсто минатата недела, на 31.909 поени, додека S&P 500 „потона“ за 4,6 отсто, на 3.861 поен, а индексот Nasdaq за 4,7 отсто, на 11.138 поени.
Во февруари овие индекси значително пораснаа бидејќи инвеститорите се надеваа дека американската централна банка наскоро ќе престане да ги зголемува каматните стапки и дека конечната каматна стапка, која ќе го прекине циклусот на затегнување на монетарната политика, ќе остане под нивото од пет проценти. Но, последниве недели индексите изгубија најголем дел од тие добивки бидејќи се појасно е дека ова сценарио нема да се оствари.
Серијата неодамнешни податоци покажуваат дека побарувачката на пазарот на трудот е сè уште силна, па може да се очекува раст на платите и трошоците, што значи дека американската централна банка ќе продолжи да ги зголемува каматните стапки. Претседателот на Федералните резерви на САД, Џером Пауел, оваа недела изјави дека централната банка е подготвена да преземе повеќе чекори доколку идните економски податоци покажат дека се потребни построги мерки за ограничување на инфлацијата.
Ова предизвика страв кај инвеститорите дека централната банка ќе ги зголеми клучните каматни стапки за агресивни 0,50 процентни поени на мартовската сесија, додека неодамна се очекуваше зголемување од 0,25 поени. Затоа сега на пазарот на пари се проценува дека до септември каматните стапки ќе бидат зголемени во интервал од 5,50 до 5,75 отсто, додека сега каматните стапки се движат меѓу 4,50 и 4,75 отсто.
Негативно влијание на Волстрит имаше и колапсот на банката на Силиконската долина (SVB), најголемиот банкрот на американска банка од финансиската криза во 2008 година. Таа банка, која со години го финансираше технолошкиот сектор, беше под притисок бидејќи многу стартап компании почнаа да повлекуваат депозити. За да го собере капиталот, банката прво неодамна продаде постоечки обврзници, но со голема загуба, а потоа во средата објави план за продажба на нови акции за да собере 2,25 милијарди долари свеж капитал.
Но, тоа предизвика паника кај граѓаните и претприемачите, кои само во четвртокот повлекоа 42 милијарди долари депозити од банката, па банката денот го заврши со негативно готовинско салдо од речиси милијарда долари. Како резултат на тоа, регулаторот ја затвори банката во петокот и ја презеде контролата врз преостанатите депозити. И на европските берзи цените на акциите паднаа минатата недела.