Политика
Трајковски: Космос како дивоградба не смееше да биде толериран зашто сопственикот е политичар
Зданието „Космос“ беше дивоградба и таа не смееше да биде третирана поинаку од која и да е друга дивоградба само заради тоа што сопственикот е богат или има политичка поддршка, а повеќепати со судски решенија е докажана законската постапка во овој случај, истакна во понеделникот градоначалникот на скопската општина Гази Баба, Тони Трајковски, како одговор на процесот што во врска со овој случај минатата седмица го најави Специјалното јавно обвинителство (СЈО).
Минатиот четврток на прес-конференција во СЈО, беше кажано дека „со уривањето на станбено-деловниот комплекс ‘Космос’, претседателот на Владата во 2011 година и претседател на ВМРО-ДПМНЕ, Никола Груевски, тогашниот министер за транспорт и врски Миле Јанакиески, и градоначалникот на Гази Баба, Тони Трајковски, искористувајќи ја својата политичка моќ, му нанеле голема штета на инвеститорот Фијат Цаноски“ и обвинија дека станува збор за „одмазда“ зашто Цаноски како челник на партијата ПЕИ „дотогаш бил во коалиција со нив, а потоа преминал во коалиција со опозициската СДСМ“.
Во понеделникот, на самиот почеток од прес-конференцијата, градоначалникот на Гази Баба го цитираше Член 289 од ЗКП кој се однесува на тајноста на предистражната постапка односно делот во кој се вели дека „Сите дејствија преземени во предистражната постапка од страна на јавниот обвинител или полицијата се сметаат за тајна“.
Овој потег на Трајковски следуваше откако изминатиот викенд медиумите објавија дека советникот од СДСМ и член на раководството на најголемата опозициска партија, Дарио Николовски, знаел за постапката којашто ја води Специјалното јавно обвинителство уште пред таа да биде објавена на споменатата прес-конференција минатиот четврток. Според медиумите, како што се повика Трајковски, и пред од СЈО да го објават формриањето на случајот кој го нарекоа „ТНТ“, советникот знаел за кого е истрагата и под кое име се води.
„Неговото објавување на детали на Фејсбук профилот од предистражната постапка значи две работи. Или СЈО е под целосна контрола на СДСМ и ажурно ги спроведува наредбите кои ќе ги добие од централата на Бихаќка, па од таму точно знаат што и кога ќе се објави, или заради непрофесионализмот и партиската пристрасност на Катица Јанева и некои обвинители од СЈО, незаконски се брифираат луѓе од СДСМ“, заклучи градоначалникот на Гази Баба.
Трајковски притоа констатираше дека за која и да можност од споменатите да станува збор, се работи за кршење на Законот за кривична постапка и за кривично дело.
Според него, СЈО изигрува „инквизиција“ и „партиските прес-конференции“ на СЈО биле само параван за анводно да се покријат конструкциите кои не се базираат на докази, туку се базираат на наредби за кривично гонење дадени директно од Зоран Заев.
„Затоа и СДСМ смета дека е неопходно нивните активисти преку социјалните мрежи да се закануваат и да шират хистерија , уште пред театралните настапи на Катица Јанева. Да имаа барем еден правен доказ, немаше така да постапуваат. Да биде срамот уште поголем, советникот од СДСМ Дарио Николовски, викендов бришеше и ги менуваше постовите на својот фајсбук профил за да ги отстрани трагите кои укажуваа на поврзаност и координираност на неговата партија со СЈО“, рече Трајковски.
Инсистираше дека треба да се спроведе сериозна кривична истрага околу пробивањето тајни информации од делокругот на работењето на СЈО и сите одговорни и од тимот на Катица Јанева и од СДСМ да бидат повикани на службен разговор и да ги објаснат релациите.
„Катица Јанева од ден на ден сé повеќе заглавува во политика и ја губи довербата од граѓаните. Сепак, таа добива пари од Буџетот на државата и мора да работи законски. Граѓаните од неа не очекуваат да функционира како приватно обвинителство на Зоран Заев“, порача Трајковски.
Во продолжение истакна дека ќе ги презентира фактите од, како што рече, „Вистината за случајот Космос“.
„Космос беше дивоградба и таа не смееше да биде третирана поинаку од која било друга дивоградба само заради тоа што сопственикот е богат или има политичка поддршка. Повеќепати низ судските постапки во Управен суд и Виш Управен суд, како и со решение од Уставен суд ,сме ја докажале нашата законска постапка во случајот ‘Космо’с, ќе ја искористам секоја правна можност согласно Законот и Уставот уште еднаш да докажам дека законски се постапуваше“, појасни Трајковски.
Изрази жалење што СЈ, според негова оцена, не ги презентирало сите факти и аргументи кои „ние им ги доставивме, односно нé обвинија без докази“ и оти затоа „ќе ја презентираме Вистината за случајот Космос“.
Трајковски посочи дека од аргументи кои беа искажани пред јавноста во полза на постапката на СЈО но без да бидат презентирани јавно, беше само споменатото Стручното мислење од Архитектонскиот факултет.
„Од сите документи што ги добивме од факултетот, се констатира дека незаконски е дадено Стручното мислење и незаконски е постапено од страна на професорите, за што имаме и записник од страна на Државниот просветен инспекторат. Но и покрај тоа, во самото стручно мислење на еден од професорите, потврдува дека објектот се градел повисоко и била направена одредена пренамена“.
Вториот неаргументиран напад врз него бил, рече Трајковски, дека била избрана фирмата за уривање и дека е направена штета од 2.999.560 денари.
„Ова не е точно, односно сакам да потенцирам дека согласно законот за Општо управна постапка и Законот за градење обврската за спроведување на решението од инспекторката е на Инвеститорот, но во конкретниов случај затоа што инвеститорот не пристапи кон извршување на решението од инспекторката, односно тој понатаму продолжи со градење, ние моравме да направиме присилно административно спроведување на решението, а согласно член 143 став 2 од Законот за градење надоместокот за рушење, општината го наплаќа од инвеститорот, за што веќе имаме и правосилна Пресуда од Вишиот управен суд и сме во постапка со извршител за наплата на паричните средства. Ова беше уште една невистина и лага од страна на СЈО дека е оштетен буџетот на Општината“, нагласи Трајковски.
Пред новинарите потсети дека Цановски претходно во понеделникот во изјава за медиумите сето она што го изградил го градел легално, но оти само по неколку дена се демантирал поднесувајќи барање за легализација на факултетот ФОН за сите три парцели на коишто е сместен факултетот
„Повторно ја излажа македонската јавност и најверојатно повторно ќе бара аргументи за новата дивоградба во политиката а не во законот. Доблесно беше од негова страна наместо пред Општина Гази Баба, денешната прес конференција тој да ја одржи пред неговата нова дивоградба факултетот ФОН“, порача градоначалникот на оваа скопска општина./крај/мф/бб
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”
Македонија
Аваја: Треба да се искористи потенцијалот на ромската заедница
Ромската заедница има најмлада популација во државата и тој потенцијал треба да се искористи, порача Ќемал Сулејманов, носител на листа во Изборна единица 3 на средба со жителите на Криволак.
„Нашата заедница е најмладата популација во државата. И нашите млади бегаат надвор од државата, барајќи решенија, а ние увезуваме работници од азиските држави. Мора да најдеме решение како нашите млади да останат во државата. Заеднички да ги направиме промените иво нашите инситтуции да имаме наши луѓе. Ветуваме дека промените почнуваат со Аваја. Вашиот глас го давате за подобра иднина и соединети да покажеме дека сме тука“ порача Сулејманов.
Според него, доволно е ромската заедница да биде третирана само како чистачи и амалџии „Драги браќа и сестри, ги знам вашите проблеми со кои се соочувате, тие се мои проблеми и мора да засукаме ракави по избори и заедно да ги решаваме. Мора да се сооединиме и да почнеме со промени. Мора да имаме наши луѓе во сите институции и тоа на раководни позиции. Доста не гледаа само како чистачи и нивни амалџии“, рече Сулејманов.
Претседателот на Аваја, Акиф Кариман, рече дека одлучил да ја жртвува индивидуалната кариера за да придонесе кон напредокот на народот. Тој говореше за тоа како другите политичари ги гледаат и вреднуваат Ромите.
„Зошто? Затоа што секогаш не потценуваат. Велат ние знаеме лесно да се справиме со вас. Малку ќе ве преплашиме и вие ќе се повлечете. Ќе ви дадеме под рака и вие ќе бидете на наша страна. Или ако тоа не функционира, ќе почнат со притисоци. И тоа досега функционираше. Но, сега ја имаме Аваја, формирана да биде рамо до рамо со сите нас. Ние сме тука да направиме голема промена и да го предизвикаме статус квото“, порача Кариман.
Македонија
Џафери за Велигден: Обединети да продолжиме и да осигураме благосостојба денес и за идните поколенија
Претседателот на Владата на Република Северна Македонија, Талат Џафери, во име на Владата на Република Северна Македонија и во свое име, испрати телеграма со честитки за најголемиот христијански празник, Воскресение Христово – Велигден, до поглаварот на Македонската православна црква – Охридска архиепископија, архиепископ охридски и македонски, г.г. Стефан, до Светиот архиерејски Синод, свештенството и монаштвото на МПЦ-ОА, до православните верници и до сите граѓани кои денеска го чествуваат празникот.
„Задоволство ми е во име на Владата на Република Северна Македонија и во мое име, да Ви го честитам најголемиот христијански празник, Воскресение Христово – Велигден, Вам, на Светиот архиерејски Синод, на свештенството и монаштвото на Македонската православна црква – Охридска архиепископија, на православните верници и на сите граѓани кои денеска го чествуваат празникот.
Велигденската порака за победата на животот над смртта е порака која влева надеж дека за животот, вреди да се преземе секој чекор на храброст и пожртвуваност, чекор кој води кон светла цел. Заедничкото добро, е благословена човекова определба, и тоа може да се постигне само ако се почитуваат основните постулати на кои упатуваат бројните примери низ историјата. Особено во денешен контекст, кога човештвото и светот секојдневно се соочуваат со најразлични предизвици кои се закана по животот, мирот, здравјето и менталната благосостојба, потребни се повеќе од кога било пораките на надеж, единство и верба во тоа заедничко добро, засновано врз практикувањето на универзалните вредности како што се хуманоста, солидарноста, одговорноста и взаемната почит.
Вашата улога има голема одговорност и јас Ви посакувам мудрост во исполнувањето на благородната мисија. Ви пожелувам празникот да го поминете во добро здравје, спокој во душата и среќа меѓу саканите, а со разбирање, меѓусебна почит и обединети, да продолжиме да ја унапредуваме Република Северна Македонија и да обезбедиме благосостојба денес и за идните поколенија“, стои во честитката од премиерот Џафери до поглаварот на МПЦ – ОА, г.г. Стефан.