Судот им ги врати патните исправи на членовите на партијата „Левица“, Здравко Савески и Владимир Куновски, кои се обвинети дека учествувале во демолирањето на Народната канцеларија на претседателот на протестите на 13-ти април против одлуката за аболиција.

Судијката го прифати барањето на одбраната, на обвинетите да им бидат укинати превентивните мерки, односно да им бидат вратени патните исправи, бидејќи имаат семејства, академски обврски, семинари и бидејќи е период на годишни одмори. Тие ќе имаат обврска редовно да се јавуваат во судот или пред надлежен орган.На денешното рочиште Обвинителството достави докази до судот, имотен лист и одлука на Владата, со кои, според Обвинителството, се докажува дека просторот во кој се наоѓа Народната канцеларија на Претседателот е државен имот кој бил отстапен на користење за потребите на Претседателот, Ѓорге Иванов.Со ова Обвинителството го оспори тврдењето на одбраната дека Народната канцеларија не е државен имот и поради тоа државата не може да биде оштетена. Адвокатите побараа дополнително време за разгледување на доказите.„Има повеќе правни субјекти кои се лоцирани на локацијата на ул. „Вељко Влаховиќ“ бр. 7, односно според катастарот има повеќе објекти. Ние ги извадивме сите имотни листови и, по наше мислење, сметаме дека тој објект, за кој денеска ни беше дадена одлука на Владата, не е односниот објект, но ќе ни треба време да го проучиме, и можеби ќе ангажираме и вешто лице кое ќе ги спореди и нашите имотни листови и ќе изврши идентификација за кој објект станува збор“, рече адвокатот Сашо Дуковски.Судењето се одложи за на 13-ти септември.Членовите на „Левица“ беа во куќен притвор повеќе од еден месец и се товарат за кривично дело „учество во толпа“ што ќе стори кривично дело./крај/мф/