Потенцијалните купувачи имаа можност изминатиот викенд да наддаваат за купување на стратешкиот бомбардер „Туполев ТУ-95″ од периодот на Студената војна, кој накусо беше огласен на eBay, а почетната цена изнесуваше три милиона американски долари.

Според порталот Aviationist, кој се специјализиран за новитети и информации од сферата на воздухопловството, продавачите на леталото навеле дека авионот се наоѓа во Украина, а дека демонтиран може да биде испратен од пристаништата во Одеса или во Николаево. Огласот беше без објаснување отстранет во саботата, а дотогаш се јавија три потенцијални купувачи. Еден од нив за стратешкиот бомбардер „Туполев ТУ-95″ од почетокот на втората половина на минатиот век дури понуди 5 милиони долари.

Во огласот, инаку, беше наведено дека авионот „е употребува, но дека по сервисирање може да биде оспособен да лета”. Го продаваше компанија чиешто седиште е во Швајцарија, но има свои филијали и во Германија и во Украина. Авионите од типот „Туполев ТУ-95 МС” е варијанта за којашто НАТО го имаше кодниот термин „Bear-H” и беше оспособена за лансирање на крстосувачки ракети од типот „Радуга Кх-55″, коишто можат да носат конвенционална или нуклеарна боева глава.

На фоторгафијата којашто беше објавена во огласот на авионот беа забележливи траги од советското и украинското воздухопловство. Беше наведено и дека авионот имал вкупно 454 часови лет, а неговиот век на траење е речиси 5.000 часови.

Иако украинската воена авијација не ги користи овие авиони, по распаѓањето на Советскиот сојуз во 1990-те, во нејзиниот состав останаа 25 вакви летала, кои се користат како поморски патролни авиони и стратешки бомбардери. Сите тие беа предвидени за „конечно приземјување” според договорот за стратешкото разоружување СТАРТ-1.

Во февруари 2000 година Украина со 11 вакви бомбардери и 600 ракети и’ го отплати долгот на Русија за природен гас./крај/мф/сн