Американската писателка на крими романи Патриша Корнвел тврди дека открила нови докази според коишто славниот лондонски сериски убиец Џек Мевосек бил познатиот британски сликар Волтер Ричард Сикерт, пишува британскиот весник The Telegraph.

Авторката Патриша Кронвел позната по серијалот во кој главен лик е форензичкиот патолог Кеј Скарпета наскоро планира да ги објави резултатите од своите 11-годишни истражувања кои укажуваа на Сикерт како еден од главните осомничени за бруталните убиства на проститутките во областа Вајтчепел во источен Лондон во втората половина од 1888 година.

Англискиот сликар Волтер Ричард Сикерт, живеел од 1860 до 1942 година, бил член на лондонското уметничко движење Камден Таун Груп и еден од највлијателните личности на британската уметничка авангарда во XX век. Покажувал голем интерес за Џек Мевосек и некои од неговите убиства му послужиле како инспирација. Теориите коишто го поврзуваат со злосторствата на Мевосек постојат одамна, а за тоа и самата Корнвел во 2002 година ја напиша книгата под наслов „Портрет на убиецот: Џек Мевосек – случајот затворен“.

Корнвел сега наведува дека утврдила дека водениот печат на писмата коишто наводно мистериозниот убиец ги испраќал на лондонската полиција е идентичен на оној од хартијата којашто ја користел познатиот сликар и печатар Сикерт.. Таа внимателно ги прочитала сите писма, коишто денес се чуваат во Националната архива во Кев, недалеку од Лондон. Верува, исто така, дека открила докази коишто Сикерт го поврзуваат со британското кралско семејство, што додава тежина на многуте шпекулации и теории за „кралскиот заговор“, чии поборници се многу теоретичари на заговорите.

Писателката соработувала со поранешниот офицер на Скотланд јард, Џон Гилберт Грив и потрошила милиони долари свои пари за откуп на 32 дела на Сикерт во обидот да пронајде решение на историската криминална мистерија во којашто брутално се распарчени пет лондонски проститутки.

„Чувствувам дека сум ја решила мистеријата. Верувам дека тоа бил Сикерт и убедена сум во тоа повеќе од кога и да е“, изјави 57-годишната писателка во разговорот за лондонскиот весник The London Evening Standard.

Меѓутоа, на прашањето дали некогаш ќе успее тоа и да го докаже, децидно одговара негативно. „Како и можеме? Доказите се само посредни,а единствено на што поп сиве овие години можеме да сметаме во научна смисла е форензичката анализа. Многу е тешко да се поверува дека појавата на идентичните водени печати на хартијата којашто ја користел Џек Мевосек и онаа што ја користел Сикерт е само случајна“, смета Корнвел, која има продадено повеќе од 100 милиони книги на различни светски јазици.

„Тоа покажува дека Сикерт ги напишал некои од писмата на Мевосек, но не докажува и дека тој е убиецот, што би можело да се покаже проблематично на суд“, додава Корнвел, и оценува дека идентитетот на Џек Мевосек, без оглед на сите докази, засекогаш ќе остане непознат./крај/мф/сн